نزیکەو هەشتا ساڵا بۍ، پارتەکاو فەلەکوو ئەتاتورکیزمی تورکیانە حوکم کەرێنی، تا بوومەلەرزەکەو ساڵەو ١٩٩٩ی، کە پەیشا بەر کەوت، بە ئەزموونوو هەشتا ساڵاوە ئا حیزبۍ نەتاوانشا ئیدارەو کارەساتێوە بدا، پەی هەقۊسانایشا ساڵەو ٢٠٠٠ی دەنگشا بە ڕەوتێوی ئیسلامیی دا کە
"بوومەلەرزەکە بەیەکجاری سەروو ئا پەرسێشە نیاوە"
نزیکەو ویسوودووۍ ساڵان "ئەردۊغان" وڵاتەکەی بەرۊ ڕاوە، جگە جە تورکیای بە وەرمە سوڵتانییە عوسمانییەکەیشۊ دەسی سیاسی و سەروازییش جە فرەو وڵاتە هامسایا و مەنتێقەکەیچنە هەن، خولقنەر و جووڵنەروو دەمودەسوو فرەو مشکیلەکاو ئا وڵاتانە، چارەنویسوو بڕۍ حیزبا و دەستەڵاتوو وڵاتاو مەنتێقەکەیچ، بڕێشا بەسیان بە چارەنویسوو ئەردۊغانی و ئاک پارتییوە.
قەرارا یەرۍ مانگۍ تەر کە مۍ، ( ١٤و ئایاری) ورچنیەی پەڕلەمانی و سەرۊکایەتی تورکیانە کریۊ. بەقووەتتەرین چەکوو هەڵمەتەو ورچنییەکەیچ پەی ئەردۊغانی و چ پەی ئۊپۊزسیۊنوو تورکیایچ، جەکۊڵێکەرڎەیۊ ئا ملوێنان ئاوارە سوورییانە کە تورکیانە مەنێنۍ، ئەردۊغان ئەجیاش ئا چەکشە جە ئۊپۊزیسیۊنی سانانۊ. بۊنەو هەوڵدای و ئاشتکەرڎەیۊ "بەشار ئەسەڎ"ی و ڕێککەوتەی سەروو گێڵنایۊ ئاوارە سوورییەکا پەی دلۍ وەڵاتەکەو وێشا. حەرچنڎە ئەسەڎ ئاماڎە، نەبۍ بێوەراوەر کریۊ بە بابەتوو ورچنیایەکەو تورکیای، وەلێم بوومەلەرزەکە بەیەکجاری سەروو ئا پەرسێشە نیاوە.
"بوومەلەرزەکە بتەکەو ئەردۊغانییش بەتەمامەتی ماڕا"
هەمان وەختەنە، گەورەیی کارەساتوو زەمینلەرزەکەی و تەرخانکەرڎەی سوپۍ پەی دەمۊلوای شارەوێرانەکا، ڕاگێرێنی وەردەموو بەکارئاورڎەی چەکوو دووەمووئەردۊغانینە، کە ئادیچ هجوومکەرڎەین سەروو کورڎەکاو سووریای بە نامۍ پارێزنای ئەمنیەتوو تورکیایۊ.
مەتاوۊ چی وەختەهەستیارەنە کردێوە سەروازیتا ئاستوو جەنگی قۊمنۊ، ئادەێچ سەرەوەرێنە پەیش ئەگەر تاقییەش کەرۊوە، کە دماوستەی ورچنییەیەکان بە بەهانۍ قۊمیای کارەساتی نەوازیایۊ جە وڵاتەکەشنە، بوومەلەرزەکە بتەکۍ ئەردۊغانییش بەتەمامەتی ماڕا، بە ماڕای ئا بتێچە فاڕیایۍ گەورۍ مەنتێقەکەنە گناوە، بۊنەو پەیوەسبییەی سیاسی و ئابووری و سەروازیی چنڎەها حیزب و تاقم و هێزە دەستەڵاتداراوە جە وڵاتاو مەنتێقەکەینە بە ئۊردۊغانی و حوکمەتەکەیشۊ، وڕیای ئا بتی دنیایۍ وڕیایۍ تەرێچ مەنتێقەکەنە شۊنەو وێشەرە مارۊ.
هەورامیکەرڎەی: س.ز"هونەر تۊفیق"
