دکتۊر داھات حەوێزی ماچۊ" بەعزۍ جە توشبېا نەوەشی شەکرەی گێڵاۋە حاڵەتو ئاسایی پەنەوازشا بە ئەرە چارەو شەکرەی مەبۊ ، ئەگەر پارێزېێوە خاس و ۋەرزش بکەرا ڕەنگە دماو ماوێوی بتاوا واز جە دەرمان و شەکرەی بارانۍ و تەنېا سەرو پارێزی ۋەردەوامۍ با .
دکتۊر داھات حەوێزی " پسپۊڕ جە نەوەشېەکاو ھەناوی و شەکرەو دڵی جە نوېستەېێنە ئاماژەش پانەی کەرڎەن ، جە بەعزە حاڵەتێوەنە کرېۊ ئا کەسۍ کە توشو نەوەشی شەکرەی بېێنۍ نەوەشېەکەېشا پڕنانۍ ، کە دەق و نویستەکەېش پی جۊرەنە :.
ئاېا شەکرە دلێنە مشۊ ؟ ھېچ ھېوێوە ھەن کەنەوەشا شەکرەی بتاوا واز جە دەرمان و شەکرەی بارا ؟ چ جۊرۍ جە نەوەشی شەکرەی چانەنە گێڵۊوە حاڵەتو ئاساېې و واچۊ شەکرەم نەمەنەن ؟
بەعزۍ جە توشبېا نەوەشی شەکرەی گێڵاۋە حاڵەتو ئاسایی ئېتر پەنەوازشا بە ئەرە چارەو شەکرەی مەبۊ چانېشا :.
توشبېا شەکرەو جۊرو دوۍ ئەگەر بتاوا پارێزېێۋە خاس و ۋەرزش کەرا جە سەرەتاۋە ئەرەچارەېې خاس بەکار بارانۍ ۋەڵۍ ئانەی توش و ماکەکا شەکرەی با، چانەنە دماو ماوێوی بتاوا واز جە دەرمان و شەکرەی باراو تەنېا سەرو پارێزی ۋەردەوامۍ با .
شەکرەو لەم پەڕی ، ژەنۍ دووە گېانۍ ئەگەر جە ۋەخت و لەم پەڕېشانە شەکرەکەېشا کۊنتڕۊڵ کەرانۍ ، چانەنە دماو لەم پەڕېەکەېشا بتاوا واز جە دەرمان و شەکرەی بارا .
ئا کەسۍ دماو نەۋەشی توش و شەکرەی با ، پێسە ئا کەسا کە دماو کۊرۊنای توش و شەکرەی بېێنۍ ، دماو ماۋێۋە ئەگەرش فرەن بتاوا واز جە دەرمانەکاو شەکرەی بارا .
ئا نەۋەشۍ کە بە مەڵامەت و بەکارئاوردەو حبێو شرێقاوە توش و شەکرەی بانۍ ، پێسە دەرمانەکاو " ڕەبۊ ، ڕۊماتیزمە ، ھەوکەرڎەی " دماو مدرناو دەرمانەکا چانەنە شەکرەکەشا ئاساېې بۊۋەو بتاوا چارەکەرڎەو شەکرەی مدرنا .
ئا کەسۍ کە فرە خېشێنۍ و عەمەلېات و ۋۍ زەعېف کەرڎەی ئەنجام مرا ، دماو عەمەلېاتەکەی چانەنە بتاوا واز جە چارە کەرڎەو شەکرەو فشارو ونۍ بارا .
شەکرەو جۊرو ېوەمی جە ڕاو ئەنجامداو عەمەلېات و نېایرەو خانەکاو لانگەرھانسی و نېایرەو پەنکرېاسی و عەمەلېات و نېایرەو خانە بنەڕەتېەکاوە ئاست و ھۊڕمۊنو ئەنسۊلېنی جە لاشەشانە ئاساېې بۊۋەو، چانەنە بتاوا واز جە شرێقەو ئەنسۊلېنی بارا .
جە گرڎو ئا حاڵەتانە کە باسما کەرڎۍ کە شەکرەشا ئاساېې بۊۋە و نەۋەشەکە متاوۊ واز جە ئەرەچارەو شەکرەی بارۊ ، پەنەوازەن ۋەردەوام بۊ جە پارێزی و ۋەرزش کەرڎەی و وشکنای پۍ شەکرەکەېش کەرۊ ېەرۍ پۍ شش مانگا کەڕەتۍ ، ۋەرو ئانەی شەکرە جە ھەر ۋەختێنە بۊ ئەگەرش ھەن گێڵۊۋە .
ھ.ئ
