کەمپەینو ھانای بە دەسۋەڵۍ وستەو کۊمەڵۍ جە چالاکاو سېاسەڎمەداراو ۋێبەخشا، دماو ڕوۋۍ جە ڕوۋەداو بومەلەرزەکەو سەرنېشتوو ۋەرنېشتوو کورڎسانی، جە شارو سلێمانی ئەرەیاۋیېا، پۍ یاوناو ھامکاری بە قوربانېاو زەرەر ۋنەکۊتاو بومەلەرزەکەی. کەمپەینەکە جە ناۋەنڎو ڕۊشنۋیری جەمال عېرفانی جە شارو سلێمانی ئەرەیاۋېیا و ھامۋڵاتېۍ شارو سلێمانی بایەخۍ فرە عالشا بە کەمپەینەکەی داو ھامکاریۍ عالشا پێشکەش بەکەمپەینەکەی کەرڎ. ۋەلێم جە ھێزیۊن ئاسایش بەبەھانۍ ھورنەگێرتەو مۊڵەتیۊ ڕاگېری جە کۊکەرڎەیۊ ھامکاری مگێرۊنە.

بەپاو ئا زانېاریا کە جە تەرەفو ڕێکوزو کەمپەینو ھانایۋە ۋزیان ڕوۋە، ئاسایش ڕا مەرۊنە ھامکاریەکۍ بېاوا مەعمەلو جگەرەکەی و فشار وزۊنە سەرشا ۋەرو ئانەی دمایی بەکۊکەرڎەیۊ ھامکاریەکا بارانۍ.

ڕێکوزاو کەمپەینو ھانای داوا جە تەمامو ھامۋڵاتېا شارو سلێمانی و پارتو ڕێکوزیاکاو گلێرگەی مەڎەنی و خێرۊمەنڎاو ۋێبەخشا کەرا سەربڎا ئەو مەعمەلو جگەرەکەو سلێمانی و پەشتېوانی ۋێشا پەی کەمپەینەکەو ھانای بەربڕانۍ، پۍ ئانەی ڕاگېری ۋەرو دەمو کەمپەینەکەی دمایش پنە بۍ.

ڕێکوزاو کەمپەینەکەی ئەرەیاۋناشا، ئەگەر ڕاگېریەکۍ پۍ کۊکەرڎەیۊ ھامکاریەکا ۋەردەوامۍ با، کۊڼفرانسێۋە ڕۊنامە وانی پۍ ڕای گرڎی ڕێکوزانەو جە ئاژە (دۆخ)کەی ئاگاڎارشا کەراۋە.

ئېنە جە ۋەختێنە ھێزی ھێزەکۍ ئاسایش و سلێمانی یەرۍ ھامۋڵاتېۍ سەرنېشتوو کورڎسانېشا گێرتێنۍ، کە پۊستەرۍ کەمپەینو ھانایشا بازاڕەنە بەش کەرڎێنۍ. بەپاو زانېاریەکا ئا یەرە کەسە ئێشەو نېمەو شەۋۍ ئازاڎۍ کریێنۍ.

ھ.ش