ڕێبەر ئۆجالان سەبارەت بە کۆمارو کوردستانی واتەنش: کۆمار وەرم و خەیاڵو کوردی بێ و ئەزموون و سیستەمێوی دیمۆکراتی و نەتەوەیی گەورە بێ و دلێشەنە ژەنی رێکەۋزیا و بەشدارە کۆشای کریا. پەوکەی پنەوازەن ئا ئەزموونە بپارێزیۆنە.
ئەرەمەرزنای کۆمارو کوردستانی جە مەهاباد ٧٧ ساڵێش سەرەرە ۋیەرد. کۆمار سەرەڕاو ئانەی کە خاوەن گرنگییەن پەی کوردی، هامکات جە ئەرەمەرزنایش تا بە ئارۆچ یاگێ شانازین پەیشان. پەیوەست بە کۆماری هەزاران وتارێ و شیعرێ و دەیان کتێبێ و کتێبچێ نویستێنێ و جە بارەشەوە هۆرسەنگنایێ جۆراوجۆرێش پەی کریێنێ کە جە میانشانە رابەر ئۆجالان بە بایەخ و گرنگییەوە هۆرش سەنگنان. بەتایبەتی کە ئێساڵ ئەرەمەرزنای کۆمارو کوردستانی جە مەهاباد هاموەختەن چەنی ئاخێز وسەرهۆردای (ژەای ژیای ئازادی) جە ئێران و وەراسان کوردستانی گرنگەن جارێۋی تەرگوزەرێ بکەمێنەوە بە شەیکەردەی و ڕاڤەکەردەی رابەر (ئاپۆ)یەرە.
پارێزنای ئەزموونو کۆماری
رابەر عەبدوڵا ئۆجالان هۆرسەنگنایێ گرنگێش سەبارەت بە کۆمارو کوردستانی کەردەێنێ و بابەتەکەش شەی کەردەنەوە و واتەنش: پنەوازەن کورد ئەزموونو کۆمارو کوردستان بپارێزیۆنە و پارێزگاریش چنەبکەرۆنە.
ئۆجالان جە پارێزنامەکەشەنە بەنامێ ”کورد دلێ هاڕای کلتوریەنە“ قوڵ و ورد هۆرسەنگناییش پەی خەبات و کۆشای وەراسان (ڕۆژهەڵات)و کوردستانی کەردەن و ئاشکراش کەردەن: "ئەزموونو کۆماری بە پێشەنگی پێشەوا قازی موحەمەدی و گەلی وڵاتپارێزی هەرچنڎە ئەزموونێوی سەرکەوتەبێ، بەڵام نەتاواش وێش جە ڤییەرەکێ ئا ڕۆزگارەیە ڕزگار بکەرۆنە. ساڵەو ١٩٣٧یەنە فاشیزمی چەرمەی تورکی و فاشیزمو ڕەزا پەهلەوی پێورە پەیمانو (سەعدئاباد)یشان ئیمزا کەرد کە هامشێوەو پەیمانو قەسر شیرینی بێ کە ئامانجی سەرەکی پەیمانەکەی دلێنەبەردەی کوردی و بەشکەردەیش بێ".
کۆمار وەرم و خەیاڵو کوردی بێ
ڕێبەر ئاپۆ وەر جە ئانەی کە گەلەکۆمەی میاندەوڵەتی دژش ئەنجام بدریۆن، جە سوریا بە ئی جۆرە باسش جە کۆماری کەردەبێ: "کۆمارو کوردستانی وەرم و خەیاڵو کوردی بێ. ڕاستەن هەلومەرجێ و ڤییەرە دلێویێ و بەرەکیەکێ دەرفەتشان بە کۆماری نەڎا زیاتەر جە ١١ مانگێ بەردەوام ببۆنە، بەڵام سەرەڕاو ئانەیە سەرجەم کارێ و کەردەکێ کۆماری پەی ئێمە بنەڕەت و بنەمانێ و جە ئارۆچەنە بە بنەماشان مەگێرمێنە و ئازموونو کۆماری مۆدێلێوەن کە مەتاوۆنە ئەنجامێ فرێ بپێکۆنە و سودش چنە هۆربگێرمێنە".
کۆمار ڕۆحیەتو وڵاتپارێزی و نیشمانپەروەریش خۆڵقنا
ئۆجالان جە بەشێ تەر جە هۆرسەنگنایەکانشەنە سەبارەت بە کۆماری واتەنش: "ئەزموونو کۆماری دلێ کوردیەنە ڕۆحیەتو وڵاتپارێزی و نیشمانپەروەریش خۆڵقنا. پەوکی هەرگیز نمەتاومێنە کۆماری جە یاد بکەرمێ. هەرگیزچ ڕاست نییەن وەرو ئانەیە تەمەنش ١١ مانگێ و ٢٠ ڕوێ بییەن، کەمبایەخانە باس جە کۆماری بکریۆن و بواچمێنە؛ کۆمار وەختێوی کەمەنە ئاوما و لوا. چونکە جە ئەرەمەرزنای و ڕاوەبەردەی و پارێزنای کۆماریەنە کوردێ هەر چوار بەشێ کوردستانی بەشدارێ بێنێ و کەس باس جە پارچەگەرایی نەکەرێ و گرد کەس و لایێش یاونێ-بێنێ هەنتری و سەرجەم چوون یەک تیم مەکۆشێنێ".
کۆمار سیستمێوی دیمۆکراتیک بێ
ڕێبەر ئۆجالان جە شەیکەردەی و هۆرسەنگنای کۆماریەنە، کۆمارش بە مۆدێلێوی دیموکراتی و نەتەوەیی بەنامێ کەردەن و ئاشکراش کەردەن: "کۆمارو کوردستانی جە سەرەتاشەوە تا دماییش، مۆدێل و سیستمێوی دیمۆکراتی بێ کە بە هیچ کەس و لایەنێ ڕاش نەڎا تا وێش بسەپنۆن ملشەرە. ئانەیچە یەکەم جار بێ دلێ کوردیەنە ڕووە بڎۆنە".
ئەزموونو کۆماری گەورەن
ڕێبەر عەبدوڵا ئۆجالان دەستنیشانش کەردەن: "پنەوازەن ئەزموونو کۆمارو کوردستانی گەورە تەماشا بکریۆنە و بپارێزیۆنە و هامکات کار پەی سەروستەیش بکریۆنە. نمەبۆ ئەزموونەکەیش بە کەم بوینیۆنە، چونکە کۆمار و ئەزموونەکەش مێژوو و شەرفمانە و دلێشەنە ژەنی رێکەۋزیا و بەشدارە کۆشای کریا. جە ڕاو کۆماریەوە مەتاومێنە یەکێتیی، یەکڕێزی، دیمۆکراتی و وڵاتپارێزی وێمان هێقم و پتەو بکەرمێنە"
