قەرارەکۍ کۆنگرەو ١٢ـەمینو پەکەکەی و هەرپاسە بانگەوازو 'ئاشتی و گلېرگەی دیموکراتیک'ـی ٢٧و شوباتو ڕابەر ئاپۆی سەرو مېڎانی مېیاننەتەوەینە کاروەدایۆ و دەنگدایۆ بەهێزش شۊنەو وێشەرە ئارڎ. جە گرڎو جەهانی و بەتایبەت جە ئۊروپانە چڼین لایەنۍ مېیاننەتەوەیۍ جیاوازۍ پاڵپەشتی ۋێشا پەی مژارەکەی بەربڕی.

یۆ جە پەشتیوانا هەڵمەتۊو "ئازادی پەی ئۆجالانی، چارەسەری سیاسی پەی پرسو کوردی"، سیاسەتمەداری نامیەو سویسرای ڕیمی پاگانی پېوەس بە مژارەکەیۆ پەی ئاژانسوو هەواڵوو فوراتی (ANF) قسێش کەردۍ و هۊرسەنگنای وردش کەرڎ.

'پەکەکە هەنگامېوە تاریخیەش نیا، کاتو ئانەینە دۊڵەت ۋەرپرسیاری ۋێش جابەجێ بکەرۆ'

ڕیمی پاگانی جە سەرەتاو قسەکاشەنە دەسنیشانش کەرڎ پەکەکە بە کۆنگرەو ١٢ هەنگامېوە تاریخیەش پەی ئارڎەی ئارای ئاشتی نیان و جەختش چانەی کەردۆ ئیتر پەنەوازا دۊڵەتیچ پەی سەرکۊتەی پرۆسەکەی ۋەرپرسیاری ۋێش جابەجێ بکەرۆ و واتش: "بەپەیلواو من کۆنگرە، هەنگامېوەنە بەرەو بنیاڎنیای ئاشتی  و هەرپاسە بنیاڎنیای سردێوەنە جە مابەینو گەلو کوردی و دۊڵەتو تورکینە. هەڵای دیار نییا ئەردۆغان پېوەس بە دڎانیای بە گەلو کوردیرە هەنگامە منیۆ یا نا. تا ئیساتێچ چڼین سیاسەتەمەدارۍ و سەرۆک شارەوانیۍ ۋەرو کوردبیەیشا وزیێنۍ زینان.

ئی پرۆسە جە لایەنو پەکەکەیۆ دەسشپنەکریان، بەڵام پەنەوازا ئەردۆغان و پەڕلەمانو تورکیایچ ئاگاڎارۍ پرۆسەکەی با جە کاتێنە موخاتەبی سەرەکینۍ. ئانەی سەرشانە مشۊم بە جددیەتۆ پێشوازی چی هەنگامۍ پەکەکەی بکەرا، وە بەبێ حیچ فشارێوە پەنەوازا گەلو کوردی قبوڵ بکەرۆ و هەرمانە پەی چارەسەری ئاشتییانەی بکەرۆ."

'شەرتەی بنەڕەتی دیموکراتیزەکەردەیا'

پاگانی دەسنیشانش کەرڎ شەرتەو سەرکۊتەی پرۆسەکەی دیموکراتیک بیەو تورکیایا و ئینەش وات: "نوقتۍ بنەڕەتی و گرنگەو پرۆسەکەی مشۊم دیموکراتیکبیەو تورکیای بۆ. ئاخۆ بەڕاسی تورکیا بۆ بە دۊڵەتێوە دیموکراتیکی، ئاخۆ ئەردۆغان و دۊڵەتو تورکی فاڕیا؟ پەنەوازا تەماشە کەرمۍ و چەمەڕاو ئینەی بکەرمۍ. بەڕاسی ئیمکانو ویرکەردەیۆ دیموکراتیکی نییا جە کاتێنە جە تورکیانە هەڵای چڼین سیاسیۍ ئینۍ زینانەنە. زینانی کەردەی کەسانێ کە هۊرچنیێنۍ مژارێوە جددیی و هەستیارا. هرووژمېوە کاریگەرا پەی سەرو دیموکراسی. بەڕاسی یاگۍ قبوڵکەردەی نییا کەسانیوە وزیا زینان کە بە دەنگو گەلی هۊرچنیێنۍ یان قەیوم سەرو مەنسەبەکەیشارە سەپیۆنە. بەبێ حیچ تاوانێوە ساڵانێوە جە زینانەنە مەناوە. ئینە حیچ پەیوەندیێوەش بە دیموکراسییوە نییا. بەڕاسی دیکتاتۆرییا.

پەی سەرکۊتەی دیموکراسی مشۊم ئەردۆغان هەنگامەی دیموکراسیانۍ دەسپنە بکەرۆ. گێرتەی پەڕەلەمانتارا بە ماناو دیکتاتۆریەتی مۍ. ئەر بەڕاسی گەرەکشانە چوارچێوۍ یاسایی بنیاڎ بنیا، سەرەتا مشۊم گرڎو ئا کەسا بەشێوێوە ناحەق گیریێنۍ ئازاڎۍ بکریا."

'مشۆم گرڏ و مافەکا مسۆگەر کریانە'

پاگانی ئەرەیاوناش پەی سەرکەوتە و پرۆسەکەی مشۆم گرڏ و مافە بنەڕەتییەکا گەلوو کوردی مسۆگەر کریانە، واتش: "جە سویسرا _با نەواچمێ گەلی جیاواز_ بەڵام زوان و کلتوور و سیاسەتی جیاواز هەن. بە پاو بنیادنیاو  کۆنفیدراڵی ئی مافە بنەڕەتییێ مسۆگەرکریێنی و بە گرنگیۆ تەماشەشا مکەرمێ. پەی نموونەی، ئێمە ئیسە جە هەرێمێوە سویسراینە مژیومێنە کە بە فەرەنسی قسێ مکەرمێ، بەڵام هەرێمێوە سویسرای هەن کە تەنیا بە ئەڵمانی قسێ مکەرۆ، کەچی قبووڵ مەکریۆنە ئا سویسرییا کە بە فەرەنسی قسێ مکەرا ڕووبەڕوو فشاری باوە. بەڵام قەدەغەو سەر و گەلوو کوردی حەر ئینەن: قبووڵنەکەردەیش جیاوازییا. پۆکەی مشۆم گەلوو کوردی خاوەن مافو دیاریکەردە و چارەنووس و وێش بۆنە. ئینە مەرجە و دیموکراسین".

'تەرسە و چەکنییارەی'

پاگانی ئەرەیاوناش چەکنیارە و ئا جمیەرا ئەوەکۆشای ئازادی بەرا ڕاوە، بڕێ تەرسەش ئینا چنە، واتش: "پەی پەشتگیری جە پرۆسەو چەکنیارەی فارک [هێزە چەکدارە شۆڕشگێڵنەکا کۆڵۆمبیا] ی لوانی کۆڵۆمبیا. چنی حکومەتی و سەرۆککۆمارو وڵاتەکەی گلێربییانیۆ. فارک بەشێوێوە ئەرێنی مامەڵەش چنی پرۆسەکەی کەرد و واتەبێش 'گەرکما چەک بنیۆرە'. چی بارۆ، حکومەت قەولش دا، بەڕاسی گرڏ و گەریلاکا فارکی چەکشا نیارە. بەڵام بەرکەوت حکومەت قەولەکێش نەبەردێ سەر. پۆکەی بەشێوە جە فارکی دیسانۆ چەکشا هورگێرتۆ. ئیسە هەمان دۆخا، داخەم مەشۆم دۆڵەت وەرپرسیارێتیی وێش جبەجێ مەکەرۆ. پۆکەی نیگەرانی من ئینەن، چی ڕەوشانە، پرۆسەکێ ئاشتی فرە ئاڵۆزێنێ. گرڏ وەختێ ئینایمێ تەرسینە. مشۆم هەردوولا هەوڵدانە و خەبات بکەرا پەی بەدیئاردە و ئاشتی".