یەرەکە ئەرەیاۋاش، هێزی باڵەفڕە جەنگییەکۍ دۊڵەتو تورکی ٢ کەڕەتۍ هەرێمو ئاسۆسیشا بۊمبواران کەردەن، هرووژمەکە حیچ زەرەرۍ گیانیش چنە نەکۊتەنۆ بەڵام زەرەرۍ فرە ۋەرو سرووشتی و ڕەز و باخا هاموڵاتیا هەرێمەکەی کۊتەن.
مېیانو چاپەمەنی و ئەرەیاۋنای یەکینەکاو پارېزنای ۋەرکۊتوو کوردەسانی (یەرەکە) ئەرەیاۋنێوە نوویسیاش وەڵاکەرڎۆ و ماچۆ: "هرووژم و پەلامارەکۍ دۊڵەتو تورکیای پەی سەرو دەسکەوتەکا گەلەکەیما، بە تایبەتیچ جەنگەوانا و گەریلای و یەکینەکاو پارېزنای ئازادی کوردەسانی بەردەواما. هېزی جارێوەتەر سەعات ٢٣:٢٣ دەیەقۍ باڵەفڕە جەنگیەکۍ دۊڵەتو تورکی ٢ جارۍ هەرێمو ئاسۆسیشا بۊمبواران کەردەن. حەرچنە حیچ زەرەرۍ بە یەکینەکاو پارێزنای ۋەرکۊتوو کوردەسانی نەکەوتەن، بەڵام زەرەرێوە فرە بە سروشتو ناوچەکەی و ڕەز و باخو هاموڵاتییا کۊتەن و دڵەتەپۍ و ناڕەحەتیش دلۍ ئەرەنیشتا ناوچەکەینە وەش کەردەن".
جە درێژەو ئەرەیاۋناو یەرەکەینە ئامان: "ئی هرووژمۍ جە کاتێنە ڕووەشا جە زیاڎ بیەی کەردەن، جە ئیساتێنە بە دەسوەڵێوستەی ڕابەر ئاپۆی و تەڤگەرو ئازادیوازا گەلوو کوردەسانی قۆناغێوە ئاشتی و دیموکراتیکی دەسش پنەکەردەن، کەچی ۋەرپەرسا دۊڵەتو تورکی بە بێ ۋەرچەم گێرتەی ئا هەنگاما و هەستیاری قۆناغەکەی، ڕووانە بە فڕۆکەی بێ فڕۆکەوان و فڕۆکەی جەنگی پەرەشا بە هرووژمەکاشا پەی سەرو هێزەکاو پارېزنای کوردەسانی مڎا. پۊکەی جە ڕوانگەو ۋەرپرسیاریەتیماوە جە ۋەرا ۋەرو قۆناغەکەی و جا بەجۍ کەردەی ئا ئەرک و ۋەرپرسیاریەتیەی ئینا سەرو شاناماوە؛ داوا جە گەلەکەیما و ڕاو گرڎیی مېیان دۆڵەتی مکەرمۍ، ئی پاشێلکاریە زەق و ۋەرچەمەو دۊڵەتو تورکیای بوینا و بە پاو ئانەی هەڵوێسو ۋێشا نیشانە بڎا".
