هونەرمەند، شێوەکار و دیزانەر ئیبراهیم زۆراب گەنجێۋی بەهرەمەندەن و بەکێشتەی و نەخشانی تابلۆکاش و دیزاینە ناوازەکاش، سەرەنجو خەڵکیش وستێنە سەرو کارە هونەریەکاش. بە تایبەتی جەدمای ئانەی کە تابلۆو شاعیرو نامی دکتۆر ڕەفیق سابیرـیش نەخشانا زیاتەر ئەشناسیا و تابڵۆکەش دلۍ تۆڕە کۆمەڵایەتیەکا و دیجیتاڵ میدیایەنە دەنگشداوە.
بەشو هەورامی ئاژاسەکەیما (فوڕات- Anf)ی، شۆنیەرەلۋای و پەیجۆرێ پەی کارە هونەریەکاش کەردەن و دیمانێوەش چەنی ئەنجامدان و ئی زایاریێ جە بارەشەوە بەس وزیێنۍ:

ئیبراهیم زۆراب، شێوەکارو دیارو هەورامان و کوردستانی تاوانش ئەوپەڕو سەلیقەی جە دلۍ تابلۆکاشەنە بەتایبەتی تابلۆکەو دکتۆر ڕەفیق سابیر-ینە بەکار باوەرۆنە کە بە جۆرێ هەست نەکەری ئی تابلۆ بە دەس نەخشێنیان. ئانەیچە بییەن یاگۍ سەرسامی هەر کەسێ کە تابلۆکەش دییەن.
ئیبراهیم زۆراب پێسە وێش بە بەشو هەورامی (فوڕات نیوز- Anf)ی واتەن: تابلۆکەش پێسەو وەفایێوە پەی ئا شاعیرەیە کێشان کە ساتەوەختو کیمیایی وارانو هەڵەبجەیەنە شیعرە بەنامبانگەکێش (بەتەنیا جێی مەهێڵن- بەتەنیا نمازدێش جیا) نۋیستێنە.
ئی هونەرمەندە شێوەکارەو هەورامانی جیا جە ئی تابلۆی، چنڎەها تابلۆ و بەرهەمۍ تەرێ هونەریش هەنۍ کەهیچشا جە تابلۆکەی کە پەی ڕەفیق سابیر-یش کەمتەرۍ نییەنۍ و سەرجەمشا بینۍ بە یاگۍ سەرنجو خەڵکی و جە ئەرمانگا کوردستانیی و میاندەوڵەتییەکانە ئەرمانیێنێ و پێشوازیش گەرمشان چەنە کریان.
ئیبراهیم زۆراب، جە ئەدابییەو ١٩٨١و هەڵەبجەیا و خەڵکو دەگاو خەرپانی هەورامانیا. ساڵەو ٢٠٠٦ی جە کۆلێژو هونەرو زانشتگاو سلێمانیۍ، بەکالۆریۆسش جە نیگارکێشای بەدەس ئاردەن. هەر پاسە ماستەرەکەش جە هەمان بەشەنە جە زانشتگاو تارانی بەدەس وستەن.
نامبریا، ئەندامو دەسەو مەرزنارەی پەیمانگاو هونەرە جوانەکاو هەڵەبجەیا جە ساڵەو ٢٠٠٧ی.
ئەندامو کاراو سەندیکاو هونەرمەنداو کوردستانیا. تا ئیستە دوۍ ئەرمانگای تایبەتێش کەردێنێوە و بەشداریچش جە ٢٥ ئەرمانگایێ هامبەشێنە جە دلۍ و بەرو وەڵاتی کەردەن.
هەر پاسە بوارو دیزاینینە کاری فرەش کەردەن و جە ئا بوارەنە خوتان چنڎین بەرهەمێ ناوازێن. هاموەخت چنڎین لۆگۆیێ تایبەتێش پەی ناوەندە حکومیی، ئەهلیی، هونەریی و وەرزشییەکان دروسۍ کەردێنۍ.
هەرپاسە خوتانو پۆستەرەکاو ٣١مین و ٣٢مین ساڵیادو کیمیاۋارانو هەڵەبجەین.
ئیبراهیم زۆراب، ئیسە جە پەیمانگاو هونەرە جوانەکاو شارو هەڵەبجەیەنە سەرقاڵو مامۆستایی و فێرکارین.

جیهاد هەورامی