ناوەندو گلېرگەو کوردی دیموکراتیکی (ناڤ_بەرلین) جە بەرلینو پایتەختو ئەڵمانیای، جە لایەنو کەسانۍ نەشناسیۆ هەوڵو سۆچنایش دریا.

تاوانبارا نزیک بە سەعات ١٥:٤٥ دەیەقۍ ئامۍ ۋەردەمو ناوەندەکەی و دماو متەی بەنزینی ۋەردەمو بیناکێنە کۊششاکەرڎ کە سۆچناش. بەڵام وەڵۍ ئانەینە کە ئێرش ۋەردانە، ئەنداماو ناوەندەکەی درکشا پنە کەرد و هرووژمکەرەکۍ تەرسۍ و بڕەمۍ. نزیکەو ٤٠ کەسا ناوەندەکەنە بێنۍ.

ڕاوەبەرا ناوەندەکەی گومان مکەرا کە ئی هرووژمە جە لایەنو نەتەوە پەرسا تورکیوە ئەنجامدریابۆ.

هامسەرۆکو ناڤ_بەرلینی حوسەین یەڵماز کە هێزی جە ئاکامو هۆرکوای سەرو پۆلیسینە باڵبەس کریا و دماتەر ئازادکریا، سەبارەت پی ڕووەدایا قسێش پەی ئاژانسەکەیما کەردۍ، ئەرەیاۋناش درێژە بە کۆششی دیموکراتیکی ۋێشا مڎا و هرووژمەکا قبووڵ نمەکەرا، واتش: "زیهنیەتو ئا چەتا کە ۋەرنیشتەنە کوردی بە زیننەیی سۆچنا و زیهنیەتو ئا کەسا کە هەوڵشادا ناوەندو گلېرگەو دیموکراتیکی کوردی جە بەرلینەنە سۆچنا، هەمان زیهنیەتا. ئانۍ کە دژو ئی کاریە دەنگ هۆرمەبڕا، هامبەشۍ تاوانێڼۍ. پۊکەی دیسان ماچمۍ، پېسە هەر گەلێوە کە ڕێز جە دیموکراسی و یاسای و مافەکا مرۆڤی مگێرۆ، ئێمەیچ خاوەن مافو ئەرەکۆشاینمۍ. ئانۍ هەوڵمڎا ئێمە تاوانبار بکەرا و ئا هێزە چەکڎارۍ هۆرکوا سەرو ناوەندەکاما، مشۆم دەسهۆرگێرا جە سیاسەتو کەنار وستەی گەلوو کوردی. داواشا ۋنە مکەرمۍ، بە عالی ئەرکو ۋێشا جابەجێ بکەرا".