ژمارەو گیان جەدەسدای کرێکارە کوردا جە هەرمانەی بیناسازیینە زیاڏش کەردەن
تەنیا جە ساڵەو ویەردەینە ٢٧ کرێکارێ کوردی خەڵکو وانی کە مەڵامەتو قەیرانو ئابووری و بێ هەرمانی کۆچشا کەردەن پەی شارەکا تەری، کاتو هەرمان کەردەینە گیانشا جە دەسدان.
گیان جەدەسداو کرێکارا
شەپۆلەو کۆچو کرێکارە کوردا جە وان و شارەکا تەرینە پەی گۆرە شارەکا تورکیای ئینا زیاڏبییەینە. سەرەڕاو ناچاربیەو کرێکارا بە هەرمەنکەردەی، بەمەڵامەتو خراپ بییەو بارودۆخو هەرمانەکەردەی و نەبییەو ئاسایش و کۆنترۆڵ کەردەو هەرمانێ جە گرڏو کەرتەکانە و بە تایبەت جە کەرتو بیناسازیینە کارەساتی دڵتەزێنش ونەکەوتۆ. جە ساڵەکا ویەردەینە ڕێژەو گیان جەدەسدای کرێکارە کوردا شارە کوردییەکا کە کۆچی گۆرەو شارەکا تەرو تورکیاش گێرتەنۆ، بەشێوێوە ترسناک زیاڏ کەردەن.
جە یەکساڵەنە ٢٧ کرێکارێ خەڵکو وانی گیانشا جە دەسدان
کرێکارێ کوردی بە فرەی کۆچو شارەکا وەرنیشتوو تورکیای مکەرا پەی هەرمانکەردەی جە کەرتەکا بیناسازی و کۆشتووکاڵیەکانە. چنی سەختی هەرمانکەردەی و نەبییەو ئاسایشو هەرمانەو کرێکارا، جە ساڵەو ٢٠٢٢نە لانیکەم ٥٦ کرێکارێ وانی جە ڕوەدای پێوەس بە هەرمانەکەردەی گیانشا جەدەسدان. جە ساڵەو ٢٠٢٤ و ئی چن مانگەو ٢٠٢٥نە ٢٧ کرێکارێ جوانێ وانی بەمەڵامەتو هەرمانێ ژیوایشا جەدەسدان. بەشێوە فرەو گیان جە دەسداکا کرێکارا کاتو هەرمان کەردەینە بییەن کەوتێنێرە وار جە باڵەخانەکانە.
کارەساتو هەرمانەو بیناسازی گرڏ کاتێ بەردەواما
بە پاو داتاکا ئەنجوومەنو تەندروسی کرێکاران و سەلامەتی پیشەیی (ISIG) ساڵەو ٢٠٢٤نە لانی کەم ١٩٨٧ کرێکار گیانشا جەدەسدان. بەشێوە فرەو گیان جەدەسداکا کرێکارا جە کەرتەکا بیناسازی، کشتوکاڵینە بییەن.
