بە واچەو سەرچەمێۋە کە نامۍ ۋێش ئاشکەرا نەکەرڎەن، زانېاری ئانەیش جە ۋەرپەرسۍ ئاکەپەیۊ ھورگێرتەن، کە ژمارەو ئا کەسا کە جە بومەلەرزەکەنە گېانشا جە دەسدان زیاڎ جە ١٥٠ ھەزار کەسان.
جە بومەلەرزەکەو کورڎسانی و تورکېاینە بە دەیان ھەزارکەسۍ گېانشا جە دەسداو بە سەڎان کەسۍ زامڎارۍ بېۍ. جە ڕۊو ئەۋەڵو بومەلەرزەکەیۊ ۋاتە جە ٦ و شوباتېۊ ۋنەقۊمیۍ بومەلەرزەکەی ماچانۍ کە ئەرمەرزیێکۍ دۊڵەتو ترکېەی پەشتېۋانی و ھامکاریشا مەکەرا. چن کەسێۋە بە مەڵامەتو سەرڎایۊ ڕەقۍ بیێنێۋە و فەوتشا کەرڎەن. بەپاو واچەو ڕەسمی ۋەرپەرسا، جە ما بەینو ژمارەو بېنا وڕاکانەو ژمارەو گېان جەدەسدای و زامڎارانە بەشکڵۍ تەرسناک جېاوازی ھەن و یۊی مەگێرۊۋە. ئا یۊنەگێرتەیۊ ژمارەکا پرسیارەو ئانەی کە ئایا
"ئامارەو ئا کەسا کە فەوتشا کەرڎەن شاریۊۋە؟" مارۊنە ۋەرو باسی.
دەسەڵاڎدارۍ ئاکەپە- مەھەپەی ژمارەو ئا کەسا کە جە بومەلەرزەکەنە فەوتشا کەرڎەنو زامڎارۍ بیێنۍ مشارۊۋە
بەپاو سەرچەمێۋە کە نامۍ ۋێش ئاشکەرا نەکەرڎەن و زانېاریەکێش جە ۋەرپەرسۍ ئاکەپەیۊ ھۊرگێرتێنۍ، ژمارەو ئا کەسا کە جە بومەلەرزەکەنە فەوتشا کەرڎەن فرە چا ژمارە ڕەسمیەیە زیاتەرا کە جە لایەنو دەسەڵاتېۊ ئەرەایاۋیان. بەپاو زانېاریەکاو ئا سەرچەمەیە ژمارەو ئا کەسا کە فەوتشا کەرڎەن زیاڎ جە ١٥٠ ھەزار کەسان. باس چانەی کریۊ کە ئانە ئاماری ڕەسمین و ئەگەرش ھەن چانەی فرەتەریچ بۊ.
وەزیرو دلێنەو ترکېەی سڵێمان سۊیلۊ: دارو پەرڎوەکا بە مەرڎەکاوە ھورگێردۍ
ھەرپاسە زانېان کە وەزیرو دلێنەو ترکېەی سڵێمان سۊیلۊ بە تەلەفۊن قسێش چنی والی و قائېمقامو ئا شارو مەنتېقا کەرڎەن کە بومەلەرزە چنەشانە ڕوۋەشدان و فەرمانەش پنە کەرڎێنۍ کە دارو پەرڎو یانە وڕاکا خێرا لابەرا. دماو ئانەی والی و قائېمقامەکۍ واتەنشا کە ھەڵای چێرو دارو پەرڎوەکانە ئېنسانۍ ھەنۍ، بەبۍ ئانەی ئایشا بەربارمێنە چنی متاومۍ داروپەرڎوەکەی لابەرمۍ؟ ئانەیچ وچیا کە سۊیلۊ جە فەرمانەکێشەنە پاش گێرتەنەرە کە ئەشۊ بە خێرایی داروپەرڎوەکا بە گەڵابە جە مەنتېقەو بومەلەرزەکەینە دوروزاۋە. ئەرەیاۋیا، کە ھەرمان بەدەسا بە مەڵامەتو ئانەی کە ئەگەرش ھەن جەنازۍ و زامڎارۍ چێرو بېنا وڕاکانە با بە قورسی ھەرمانە کەرانۍ.
ھ.ش
