قسۍ سەروو ئانەی نییەنە کە ئې دروشمە سەرچەمەکەش کێن و کۊگەن کۍ ئارڎێنەنە، قسەکۍ سەروو تەرسێنە جە دروشمەکەی کە فرێوە زاڵەشا چنەش ترەکان .گەرەکشانە بە ھەزارا کێشە و مشکیلاوە لکییش بڎا. جە وەختێنە دروشمەکۍ ڕۊشنێ و ئاشکرێنۍ ژەنیش بەستێنۆ بە ژیوای و ئازاڎیوە . ئەگەر دروشمەکۍ ھینۍ دماو تیرۊرکەرڎەو "ژینێ-نە، وەلۍ مشۊ ئا ڕاسییە وچیۆ کە بە شکڵێوە هەقەتین ئی دروشمێ جە مڎرامانوو ژەناو کۊبانیوە سەرەش ھۊردا.

حەکایەتەو ژەناو کوردی حەکایەتەو بەشڎاریکەرڎەین جە تاریخەنە، ئې حەکایەتۍ ھیچ تەوژمێۋە بەری نەتاوانش جە بنەڕەتنە ڕێخەکێشش کەرۊ، جە جەنگوو کۊبانێنە جە ۋەرنیشتوو کورڎسانییەنە، جارێوە تەر تەپوتۊز سەروو ئی حەکایەتێوە لاشی. وەلۍ نەېارەکۍ ئې دروشمەیە تەرسەو ئانەیشا وەنە نیشتە، کە ئې ھاوارە ېاگێ بە ئاوەزوو پیاسالاری لەق کەرۊ، چون کەوتۍ بەربەرەکانیش وەلۍ جە ڕێوەتەرۊ گلێرگەو کوردەواری جە گیانەنە گلێرگێۋە چەنەویەرڎەن و ڕا بە ڕاجیایی و ڕەنگجیایی مڎۆ. ڕاسا چاگە و چێگە قۆرتێ و زەخمۍ ھەنۍ، وەلۍ تاریخ ڕاسیێوەتەر ماچۊ؛ چەنی ئانەیچ مەبۊ جە ھەمان وینگەوە تەماشەو وەرنیشتوو دنیۍ تەماشەو وەرکۊتوو پەیۋەنڎییەکا کەرمۍ . چون دیموکراسیی وەرنیشتی جیاوازا جە دیموکراسیی وەرکۊتی، چەمکەو فیمینیزمی بە گرڎوو نۆعەکاشۆ لیبراڵ، ڕادیکاڵ، سۊسیالیستانە و ...ھتد چن چەمکێوە وەرکۊتی بە نەریتوو وەرنیشتی مەوەرۊنە.

ژەنی ژیوای ئازاڎی لکیدریێ ئاخێزوو بەشڎاریی ڕەگەزە گرنگەکەین، کە بۍ ئاڎی سەرکۊتەی مسۊگەر مەبۊنە و نمێ دی. وەروو ئانەی

جیای سەنگەرگێرتەی جە یۆترینی و وەرانوەرەتیلێ و پژگیای، پەنەوازا کۊکارێ بیمێ و هەنگامەکاما بە ئاڕاستەو پێوەرەبییەی بنیەیمێ . لتبییەی گلێرگەی جە وەختوو پەیڎابییەیێ تازەینە، جگە چانەی خیانەتێوە خۆفناکا، حەرەکەتێ بێوچان و سەرەمڕوو نەیارایچا جە سەرھۊردای. ئەرەنەېاوای چی ڕاسییە مەنەېۊن جە ھەمان ھێزی و ویەردەی گەرەکنەبیەیینە،  کورڎسان جە گرڎ وەختێوە زیاتەر پەنەواز و ئیحتیاجش بە چەنەوەشبییەی و پێوەرەھورکەردەی ھەن، دەسبەردەی پۍ ھەر کارێوە کە شپرزی و شێوېای دروس کەرۊ، بەدیئاوەروو ئامانجوو ئانیشانە، کە سەڎان ساڵێن جە چەوسناېۊ و سووکایەتیکەردەی بە کوردینە سێرۍ نەبیێنۍ و تەژنێنێ بە ونەو کوردی و وەختی زیاتەرشا گەرەکا تا تەژناییشا ماڕا.

ژەنی ژیوای ئازاڎی، ھەر نەېارۍ بەریش نەتۊقنێنۍ، زاڵەو ئانیشایچش ترەکنان، کە دلێنەو وڵاتینە گەرەکشا نییا قەتارەکەما گنۊ ڕا، چا بارۊ پەنەوازما بە قسەو باسی تەری بۊ.

ھ.ئ