تۆڕەو مافەکا مرۆڤو کورڎەسانی وەڵاش کەرڎۆ، سەرەتاو حەفتەی ۋییەرڎەی زەینەب جەلالیانە ژەنە زیڼانیەی سیاسیەو کورڎی، داواکاری ئەنجامو دیڎاریش چنی بنەماڵەکەیش بەرزکەردەنۆ، بەڵام ۋەرپەرسا زیڼانو یەزدی ئاگاڎارەشا کەردێنۆ کە بە ئەمرەو ۋەرپەرسا ئیتلاعاتی قەڎەغەن چەمش بە بنەیانەکەیش گنۆ.

بنەیانەو زەینەب جەلالیانۍ کە جە ماکۆوە پەی چەمپنەکۊتەی چنی کناچەکێشا کۊتێبێنۍ ڕا، دماو ئاگاڎاربیەی جە قەرارو قەڎەغەکەردەی دیڎاری، نزیک بە ئەسفەهانی گێڵێبێنێوە.

هامکات دماو چن مانگۍ جە ئێشو پەراسواش، دماجار زەینەب جەلالیانە فاڕیاوە پەی خەسەخانەی بەڵام بە باڵبەسیای وشکنای و ئەشیعەش پەئ گیریا.

زەینەب جەلالیانە زیڼانەنە تووشو چن نەوەشیێوە تەری پېسە پۆسی، چەما، کۆئەندامو هەناسەدای و گورچیلا بیێنە و بەردەوام ڕاش ۋنە مگیریۆ کە چارەسەری پزیشکی هۆربگێرۆ.

جە مانگەکا ۋییەرڎەینە دووۍ جارۍ ۋەرپەرسا ئیتلاعاتی جە زیڼانو یەزدینە چەمشا پا زیڼانیە سیاسیۍ کۆتەبۍ، داواشا ۋنەکەردێبۍ کە دەقو "تۆبەنامە"ێوە ئیمزا بکەرۆ و پی جۆرە ڕا مڎا چارەسەری پزیشکیش پەی بکریۆ، یاخود تەنانەت بە شێوۍ مەرجدار ئازاڎە بکریۆ. جە ۋەرا ۋەرەنە زەینەب جەلالیانە ئا داوێشە ڕەڎەکەردێبێوە.

پېسە تۆڕەو مافەکا مرۆڤو کورڎەسانی وەڵاش کەردەنۆ جە تشرینو یووەمو ساڵەی ۋییەردێچەنە جارێوەتەر ۋەرپەرسا ئیتلاعاتی هەڕەشێشا چا زیڼانییە سیاسیۍ کەردەبۍ کە ئەگەر پەشیمانی بەرنەبڕۆ، جە خزمەتگوزاری پزیشکی و گرڎو مافەکا زیڼانیا بێبەشەمکریۆ.

زەینەب جەلالیانە ساڵەو ٢٠٠٧ سەرو ڕاو بەینو کامیاران-کرماشانینە باڵبەسە کریا و دماو ماوۍ فرەی جە ئەشکەنجەدای، سەرەتا بەتۆمەتەو ئەندامبیەی جە پەژاکی و هۆرگێرتەی چەکی دژوو دەسەڵاتی، سزاو جە قەنارەدایش سەرەرە سەپیا، بەڵام دماتەر سزاکێش پەی زیڼانی هەتاهەتایی فاڕیا.