هێزە ئەمنیەکێ تورکیای ۹٤ کەسێشان دەستگیرێ کەردێ
جە توڕکیا بە نزیک-بییەی جە ۲۰مین ساڵیادو گەلەکۆمەی میاندەوڵەتی ۱٥و شوباتی ڕەشبگیری فراوانتەر بییەن و جەی چوارچێۋەنە جە ئەدەنە، ئاگری، وان، ئیدر و ئامەد ۹٤ کەسێ دەستگیرێ کریێ.
جە توڕکیا ۋەر جە ۲۰مین ساڵیادو پیلانگێڵی و گەلەکۆمەی میاندەوڵەتی ۱٥و شوباتی، کە دژ بە ڕێبەر عەبدوڵا ئۆجالانی ئەنجام دریا، هێزە ئەمنیەکێ ڕژێمە دکتاتۆریەکەو تورکیای بەشێۋازی فراوان تەر جە جاران دەستشان دان هۆرکۋای سەرو یانا و ڕەشبگیرکەردەی هاموڵاتیان و چالاکۋانە مەدەنیەکان و قڕکەردەی سیاسیی ئەنجام مدانە. هێزە ئەمنیەکێ ڕژێمە داگیرکەرەکە تورکیای، سەرەڕاو بێڕێزی و سوکایەتی-کەردەی فەرەی بە هاموڵاتیانی و ئەزیەتدایشان، بەرێ و پەنجەرێ یانەکانشان ماڕێنێ و بە زۆر و بە شێۋازی فرە دڕندانە دەربازێ دلێ یانەکان بیێنێ و جەی چوارچێۋەنە جە ئەدەنە، ئاگری، وان، ئیدر و ئامەد ۹٤ کەسێ دەستگیرێ کریێنێ.
ئەدەنە
سەرسەبای ئارۆی، جە شارو ئەدەنەی دەیان یانێ هاموڵاتیان ڕووبەروو هۆرکۋای هێزە ئەمنییەکان بیێنێۋە و ۱٦ کەسێشان دەستگیرێ کەردێنێ.
ئاگری
سەرسەبای هیزی چوارشەممەی، جە شارو ئاگری، ناوچەکێ بایزید، فانۆس، دووتاخ، ئاڤکەڤر، خاموور، زێدکانێ، هێزەکێ پۆلیسی هۆرشانکۋان سەرو یانا ٥٥ کەسێشان دەستگیرێ کەردەنێ.
ئیدر
جە شارو ئیدری سەرسەبای چوارشەممەی، هێزە ئەمنیەکێ تورکیای جە هەڵمەتێ ڕەشبگیریەنە دمای هۆرکۋای سەر یانا هاموڵاتیان ۱۰ کەسێشان دەستگیرێ کەردێنێ.
وان
هەر سەبای چوارشەممەی، جە ناوچەو ئەردیش-و وانی، جە هۆرکۋای سەرو یانانە هێزەکێ تورکیای ۷ کەسێشان دەستگیرێ کەردێنێ.
ئامەد
سەرسەبای چوارشەممەی، جە ئامەد هێزە داگیرکەرەکێ تورکیای جە هەڵمەتێنە هۆرشانکۋان سەرو ژمارێۋ جە یانا هاموڵاتیانی و جە ئاکامشەنە ٦ کەسێشان دەستگیرێ کەردێنێ.
سەبای ۱٥ شوباتییەن ۲۰مین ساڵیادو پیلانگێڵی و گەلەکۆمەی میاندەوڵەتی ۱٥و شوباتی، کە جە ۱۹۹۹ دژ بە ڕێبەر عەبدوڵا ئۆجالانی ئەنجام دریا. چندین ڕۆچێ ۋەڵێ ساڵیادەکەی و تا ئیسە هێزە ئەمنیەکێ تورکیا جە کوردستان و تورکیا بە فراوانی دەستشان دان دەستگیرکەردەی سەدان هاموڵاتیێ، چالاکۋانێ مەدنیێ و سیاسیێ پا ئامانجە جە ۱٥و شوبات-یەنە چالاکیێ و وێنیشاندایێ دژ بە پیلانگڵی و گەلەکۆمەکەی ئەنجامێ نەدریانە.
