ڕۆو یەک شەممەی ویەردەی پرۆژەو یاونای گازی سروشتی جە دمای نزیک بە ٤٧ کیلۆمەترێ جە لولەگوزاری جە دلێ و بەرو شاری، یاوا شارو نۆدشە-ی سەر بە شارستانو پاوە-و هەرێمو هەورامانی و
ڕۆو دوە شەممەی بە فەرمی پڕۆژەو گاز یاوناکەی و لولەکێشی گازەکەی کریاوە و نودشەیەکێ و چەنڎین دەگایێ ناوچەکەی جە دمای ساڵانێوی فرەی جە چەمەڕایی بیێ بە خاوەن لولەکێشی گازی سروشتی.
نودشە و دەگایەکێ دەوروبەریش، ناوچێ کویسانیێنێ و پایز و زمسانشان فرە سەرد و سەختەن و هاموڵاتیێ ناوچەکەی پنەوازیێوی فرەش بە گازی سروشتی و بە لولەکێشی یاونایش بە یانا هاموڵاتیان بێنە. بەڵام پڕۆژەکە بەبەردەوامی دما وزیێنە و دەسەڵاتدارێ ئێرانی دەسی دەسی چنە کەرێنێ و بەفەرامۆشیشان ئەسپارابێ. ئانەیچە ناڕەزایەتی نودشەیەکانش ونەکەوتەبێوە و پەی تەمامکەردەی پرۆژەکەی چەندین داواکاریێشان یاوێنێ بێنێ لاو دەسەڵاتدارانو ئێرانی و دەرەنجام دواکاریەکەشان پەسەند و کەردەیی کریا.

بڕیابێ چەنی نودشەی، پڕۆژەو گازی سروشتی شارو نەوسوڎێ-چ دماییش بەیۆنە و بە فەرمی بکریۆنەوە. بەڵام دەسەڵاتدارێ و لایەنە پەوەندیدارەکێ ئێرانی ئاشکراشان کەردەن: بە فەرمی ئەوەکەردەی پڕۆژەکەی پەی کۆتایی ئی ساڵی دما کەفتەن.
نوسوڎیەکێ وازیارێنێ جە لایەنە پەیوەندیدارەکانو ئێرانی بە زوویی وەڵێ ئامای وەرزو سەردی و یەخبەنڎنانی، یاونانی گازی سروشتی بە شارەکەیشان جابەجا بکریۆنە و جە ئینەی زیاتەر دما نەوزیۆن و جیاوازی میانو شارێ و ناوچەکانە نەکریۆن.