شەڕڤانی هێزەکانی کۆماندۆی قەسەدە عەلی ئەحمەد، کە ١ـی تەممووز لە عەین عیسا لەسەر ئەرکەکەی شەهیدبوو، ئەمڕۆ بە ئامادەبوونی سەدان کەس بەخاک سپێردرا.

بەسەدان دانیشتووی کانتۆنی ڕەقە، ئەندامانی ڕێکخراوە مەدەنی و سەربازییەکان، شێخ و سەرۆک هۆز و ئەندامانی پارتە سیاسییەکان لە مەراسیمی بەخاکسپاردنەکەدا ئامادەبوون کە لە گۆڕستانی شەهیدانی شارۆچکەی حکومی بەڕێوەچوو.

مەراسیمەکە بە خولەکێک ڕێزگرتن لە شەهیدانی ئازادی دەستیپێکرد و دواتر نمایشی سەربازیی شەڕڤانانی هێزەکانی کۆماندۆ ئەنجام دار. پاشان هاوسەرۆکی دەستەی بنەماڵەی شەهیدان و بریندارانی شەڕی کانتۆنی ڕەقە ئیبراهیم ئەل حەمود قسەی کرد. ئەل حەمود لە قسەکانیدا لەبارەی مەزنیی بەهای شەهیدبوون وتی: "شەهیدبوون بەهایەکی زۆر مەزنە و وێنەی هەرە بڵندی بەرخۆدانی شکۆداری دژی نادادپەروەرییە."

ئەل حەمود ئاماژەی بەوە کرد، شەهیدان بە خوێنی پاکیان ناوی خۆیان لە مێژووی نەمراندا نوسییەوە و وتی: "شەهید نامرن، هیوای زوو چاکبوونەوە بۆ برینداران دەخوازم."

لە مەراسیمەکەدا ئەندامی کۆنگرەی ئیسلامی دیموکراتیکی کانتۆنی ڕەقە سوبحی محمد قسەیکرد و  وتی: "شەهیدان لەپێناو ژیانێکی بەشکۆ گیانی خۆیان فیداکردووە، بۆیە بۆ هەمیشە لەسەر ڕێگەیان دەبین و درێژە پێدەری ئامانجەکانیانین."

دوای قسەکان بەڵگەنامەی شەهید خوێندرایەوە و ڕادەستی بنەماڵەی هێژای شەهید کرا، لە کۆتاییدا تەرمی شەهید بە وتنەوەی درووشمی "شەهید نامرن" سپاردەی خاککرا.