لە شاری بەرلینی ئەڵمانیا بەبۆنەی ٢٥ هەمین ساڵیادی دامەزراندنی کۆنگرەی نەتەوەیی کوردستان (کەنەکە) پێشوازییەک بەڕێوەچوو. هاوسەرۆکی کەنەکە ئەحمەد کاراموس و نوێنەرانی پارتە سیاسییەکان لە ئەڵمانیا و نوێنەری ڕێکخراوە کوردییەکان بەشداربوون.

ئەحمەد کاراموس یادەکەی پیرۆز کرد و گوتی: "کەنەکە بە ئەرکی پێکهێنانی هاوپەیمانی و یەکێتی کوردان کە خەونی ئەحمەدی خانییە، دامەزرا. ئەحمەدی خانی پڕ بەدڵ دەیویست هاوپەیمانی کوردان دروست ببێت. کەنەکە ئەم خەون و هیوایەی کردە ئەرکی خۆی، لە ساڵی ١٩٩٢ دامەزرا".

"کوردەکان هەمیشە دژی داگیرکاری و نکۆڵی بەرخۆدان دەکەن"

کاراموس ڕایگەیاند پێداگری ڕێبەری گەلی کورد عەبدوڵا ئۆجالان لە دامەزراندن و ڕێکخراوبوونی کەنەکە قۆناغێکی مێژووییە بۆ کوردان، گوتی: " بە ناوی کەنەکە و گەلی کوردەوە سوپاسی بەڕێز عەبدوڵا ئۆجالان دەکەم. دامەزراندنی کەنەکە بە فیکر و هزر و هاندانی ئەو ڕوویدا. کوردستان لە نێوان چوار دەوڵەتی داگیرکەر دابەش کرابوو. دەسپێک و ژێرخانی ئەم پرۆسەی داگیرکارییە بە پەیمانی لۆزان دامەزرا کە لە ساڵی ١٩٢٤ واژۆ کرا. بەڵام گەلی کورد هەرگیز پەیمانی لۆزان و دەرەنجامەکانی قبوڵ نەکرد. گەلی کورد ١٠٠ ساڵە دژی ئەمە بووە و بە ئیرادەیەکی مەزنەوە ڕەتی کردەوە. بەرخۆدانی کرد و تێکۆشا. ١٠٠ ساڵە گەلی کورد دژی ئەمە شەڕ دەکا. گەلی کورد ١٠٠ ساڵە بۆ پاراستنی زمان و چاند و ناسنامە و ئازادی هەبوونی خۆی تێدەکۆشێت. ئەگەر پێویست بکات ١٠٠ ساڵی تریش بەرخۆدان دەکات".

بانگەواز بۆ پارت و ڕێکخراوە کوردییەکان

کاراموس بەڵێنی دا لە هەموو پارچەکانی کوردستان هاوپەیمانی بەگوێرەی بەرژەوەندی کوردان دروست بکرێت و بۆ یەکێتی تێبکۆشن، گوتی: "بانگەواز لەو پارت و ڕێکخراوە سیاسییانە دەکەین کە دەستیان بە خوێنی شەڕڤانانی کورد سوور نەبووە، لەسایەی هاوپەیمانێتییەک یەکبگرن. دەرگای هاوپەیمانییەکەمان بۆ هەموو لایەنانە کراوەتەوە کە هاوکاری دوژمنیان نەکردووە".

پاشان سینڤزیۆنێک دەربارەی دامەزراندن و خەباتی کەنەکە پیشاندرا. دواتر هاوسەرۆکی وەقفی ڕۆزا لۆکسەمبۆرگ پرۆفیسۆر. د. هاینز بێباوم قسەی کرد.

پاشان خواردن پێشکەشی ئامادەبووان کرا و یادەکە بە مۆسیقا کۆتایی هات.