وەک پشتیوانییەک لە چالاکیی مانگرتن لە خواردنی ژنە زیندانیی سیاسیی کورد وریشە مورادی، رێکخستنەکانی کەژار لە ئەوروپا چالاکیی مانگرتنیان بەشێوەی نۆرەیی راگەیاند. ئەمڕۆ ئەو چالاکیە لە ستۆکهۆلمی پایتەختی سوید لە سێیەم رۆژیدا بەڕێوەدەچێت.
چالاکیەکە ماوەی سێ رۆژە لەبەردەم پەرلەمانی سوید بەڕێوەدەچێت و بڕیارە ئەمڕۆ کۆتایی بێت.
ئامانج لە چالاکیەکە، ناڕەزایەتی دەربڕینە دژی سزای سێدارە و رۆژانی داهاتووش لە شارەکانی دیکەی وڵاتانی ئەوروپا بەردەوام دەبێت.
بەشداربووانی چالاکیەکە داوا دەکەن وریشە مورادی کۆتایی بە مانگرتنەکەی بهێنێت و جەختدەکەنەوە ، 'پەیامەکەی گەیشتۆتە هەموو لایەک'.
بڕیارە ئەمڕۆ لە کۆتایی چالاکییەکەدا، راگەیەندراوێک ئاڕاستەی پەرلەمانی سوید و رێکخراوە نێونەتەوەییەکان بکرێت بۆ فشار خستنە سەر دەوڵەتی ئێران تا کۆتایی بە سزای سێدارە بهێنێت.
جێگای ئاماژەی سبەینێ لە شاری کۆلنی ئەڵمانیا درێژە بە چالاکییەکە دەدرێت.
لە ١٠ی تشرینی یەکەم و هاوکات لە گەڵ رۆژی جیهانی بەرەنگاربوونەوەی سزای لەسێدارەدان، وەریشە مورادی لە زیندنای ئێڤین لە دژی سەپاندن و جێبەجێکردنی سزای لەسێدارەدان لە ئێران دەستی بە مانگرتن لە خواردنی ماوە نادیار کردووە و بەپێی راپۆرتێکی تۆڕی مافەکانی مرۆڤی کوردستان بە هۆی مانگرتنەوە زیاتر لە ٧ کیلۆ کێشی مورادی دابەزیوە و دۆخی تەندروستی باش نییە.
پێشتریش دەیان چالاکوانی کورد و ئێرانی لە نامەیەکی کراوەدا وێڕای دەربڕینی پشتیوانی لە مانگرتنەکەی وەریشە مورادی داوایان لێکردبوو کۆتایی بە مانگرتنەکەی بهێنێت و هەربۆ پاڵپشتی لەو زیندانییە سیاسیە و چالاکیەکەی، رۆژی شەممە بە شێوەی هێمایین مانیان لە خواردن گرتبوو.
