تەڤگەری ئازادیی لە ڕێگای کەمپەینێکەوە هاوکاری خەڵکی کەمدەرامەت دەکات
تەڤگەری ئازادیی کۆمەڵگەی کوردستان لە ڕێگای کەمپەینێکەوە هاوکاریی دەگەیەنێتە خەڵکی هەژار و کەمدەرامەت و تا ئێستاش نزیکەی ٥٠ ماڵ سوودمەندبوون لەو هاوکارییانە.
ماوەی چوار ڕۆژە تەڤگەری ئازادیی کۆمەڵگەی کوردستان لە شاری سلێمانی کەمپەینێکی دەستپێکردووە بۆ گەیاندنی کۆمەک و هاوکاریی بەو خەڵکانەی، کە بژێوییان لەسەر کاری ڕۆژانەیە و لە ئێستادا بەهۆی قەدەغەی هاتووچۆوە توانای دابینکردنی بژێوی ژیانیان نییە.
کەمپەینەکە خۆی دەبینێتەوە لە دابەشکردنی خواردن و خواردەمەنیی پێوستیی ڕۆژانە و تا ئێستاش نزیکەی ٥٠ ماڵ سوودمەندبوون لەو هاوکارییانە.
ئازاد عومەر، هاوسەرۆکی هەرێمی سلێمانی تەڤگەری ئازادیی کۆمەڵگەی کوردستان، لە لێدوانێکدا بە ئاژانسی ڕۆژنیوزی وت: لەم دۆخەدا بە ئەرکی خۆمان زانی هەستین بەم کەمپەینە، بۆ ئەو مەبەستە هاوکارییمان لە خەڵکی خێرخواز و مرۆڤدۆست کۆکردەوە و بە ئەمانەتەوە دەیگەیەنین بەو ماڵانەی کە پێویستییان پێیەتی.
وتیشی: دەیان کەس لەم چەند ڕۆژەدا پەیوەندییان پێوەکردووین و داوای هاوکارییان کردووە، هاوکارییەکانی ئێمەش شتێکی سەرەتایین بۆ پێداویستیی ڕۆژانە، بەڵام ئەو هاوکارییانەی کە تا ئێستا گەیشتوونەتە دەست ئێمە لە ئاست خواست و پێداویستییەکاندا نییە.
هاوسەرۆکی هەرێمی سلێمانی تەڤگەری ئازادیی جەختیشیکردەوە، کە تاوەکو خەڵکی خێرخواز هاوکارییان پێ بگەیەنن، ئەوانیش بەردەوام دەبن لە گەیاندنی هاوکاریی بە خەڵکی کەمدەرامەت.
ف.ق
