دەفەگە و مەکەگە و دیسک پێوەس بە گەشمەرڎەکەرڎەی ڕۆنامەنوویسا گوڵستان تارۍ و هێرۆ بەهادینی، ئامەدەنە ئەرەیاۋنێوە هامبەششا ۋەناوە و داواشا جە ڕێکوزیاکا چاپەمەنی مېیاننەتەوەیی کەرد، دژو هرووژمەکا تورکیای ۋەرا ۋەر بە چاپەمەنی ئازاڎی دەنگشا هۆربڕا.
جە هرووژمێوە فڕۆکۍ بێ فڕۆکەوانو دەوڵەتو تورکینە جە ناوچەو سەیسایەق و سەر بە پارێزگاو سلێمانی جە پانیشتوو کورڎەسانی، ڕۆنامەنوویسا گوڵستان تارا و هێرۆ بەهادینە گەشمەرڎۍ بیۍ، گەشمەرڎەکەرڎەو دووە ڕۆنامەنوویسەکەی شەرمەزارکریا.
جەمەو ژەنا میزۆپۆتامیای (مەکەگە) و جەمەو ڕۆنامەنوویسا دیجلە و فوراتی (دەفەگە) و دیسک باسن- ئیش ۋەردەم و بیناو دەفەگەینە جە ئامەد ئەرەیاۋنێوە هامبەششا ۋەناوە، پەرلەمانتارا جەیلان ئاکچا و مەرال دەنیشە بەشتاش و محەمەد ڕوشتو تریاکی و نوێنەرو ڕێکوزیا و ڕۆنامەنوویسا بەشدارۍ بێنۍ.
هەرچنە پۆلیس ۋەردەم و بیناکێشا گەمارۆدا و هەوڵشا دا ڕاگیری بکەرا، بەڵام چالاکا گۆششا پنە نەڎۍ و درووشمەو "چاپەمەنی ئازاڎ سەرکوت نمەکریۆ"شا بەرزکەردۆ.
ڕاوەبەرەو مەکەگەی ئایسەل ئیشکە هرووژم و سەرو چاپەمەنی ئازاڎیش شەرمەزار کەرد و واتش: "داوا جە ڕای گرڎیی مېیاننەتەوەیی مکەرمۍ دەمودەس ۋەرا ۋەر بە هرووژمە سیستماتیکەکا مرداوە".
ئیشک ئەرەیاۋناش مەرام جە هرووژمەکا سەرکوتکەردەی دەنگو گەلین و پەدەکە هامکارو هرووژمەکان. جەختش کەردۆ بە پاگیریۆ دژوو گرڎ هرووژمێوە سەرو چاپەمەنی ئازاڎی، ئەرەکۆشا.
هەرپاسە داواش جە ڕێکوزیاکا چاپەمەنی و پارێزنەرا مافوو مرۆڤی مېیاننەتەوەیی کەرد و واتش: "دژو هرووژمەکا تورکیای پەی سەرو چاپەمەنی ئازاڎی، دەنگتا هۆربڕدۍ".
ئەرەیاۋناکەی بە بەرزکەردەیۆ درووشمۍ دمایش پنە ئاما.
