هامسەرۆکو گرڎیی پارتو یەکسانی و دیموکراسی گەلا (دەم پارتی) تونجەر باقر خان دماو ئاشکراکەردەی کۆمیتەو ئامادەکاری نەورۆزی جە دەروازەو مێردینی جە ناوچەو سوری ئامەدینە جوابو ڕۆنامەواناش داوە.

باقر خان پەی پرسیارەو "ئایا سیاسەتمەدارا جبەرو وڵاتی گێڵاوە یا نا؟" پی جۆرە جوابش داوە: "گەرەکمانە پڕۆسەکەی سەروزمۍ و هەڤاڵاما جە ئۆروپاوە دیسان گێڵاوە. پڕۆسەکە هەڵای تازەن و سەخت ملۆڕاوە. باس جە مژارۍ ٢٠٠ ساڵەی مکەرمۍ. ئەر ئی مژارە چارەسەر بۆ ئا پرسیارۍ شمە مکەردێش چارەسەرۍ با."

سەبارەت بە پرسو ڕێککەوتەی بەینو فەرماندەو گرڎیی قەسەدەی مەزوڵم عەبدی و سەرۆکو حکومەتو کاتی سووریای ئەحمەد ئەل شەرعی، باقر خان واتش: "ئی ڕێکەوتەیە جە سووریانە گرنگا. وەڵۍ گرڎ چێوێنە ڕژێمێوە تاک پەرەس نمەمەنۆ. چا ڕێککۊتەینە بنیاڎنیای سووریایۍ دیموکراتیکی باس مکریۆ. ئی ڕێککۆتەیە بە ئەرێنی موینمۍ."

سەبارەت بە بانگەوازو "ئاشتیی و گلېرگەی دیموکراتیک"ی ڕابەر ئاپۆی، باقر خان واتش: "ئینە مژارێوە تەکنیکیا. ئێژا ئۆجالان پەیامو ۋێش ئەرەیاۋنا. پەیامێوە ڕۊشنا. واتش "با ئەوەکۊشای بەهێزتەر، دینامیکی تەر بلۊڕاوە، بەڵام ئەوەکۊشای سە زەمینێوە دیموکراتیکەنە ئەنجام بڎریۆ و جەنگ و چەک نەبۆ". ئینە فرە گرنگا و بە قیمەت بۍ. هیواڎارەنا سەرو ئی بانگەوازەیە گرڎ کەسۍ ئەرک و ۋەرپرسیاری ۋێش جابەجێ بکەرۆ. پېسە سیاسەتو دیموکراتیکی کۊشش مکەرمۍ کە ۋەرپرسیاری ۋێما جابەجێ بکەرمۍ. چی چوارچێوەنە سەر ۋنەو گرڎو لایەنە سیاسیەکاو گلېرگەو تورکیای مڎەیمۍ و ئینەی باس مکەرمۍ."

پېوەس بە پرسیارەو "سەردای سەرنیشت و ۋەرکۊتوو سووریای مکەردۍ یا نا" باقر خان واتش: "ئی ڕێککەوتەیە ئیسفاڎەش پەی گەلا ئاگەی و هەرێمەکەی بۆنە. ئی ڕێککەوتەیە جە هەمانکاتەنە بە پاو بانگەوازەکەو ئێژا ئۆجالانیا. هیواڎارەنا گرڎ یاگێنە سەرکۊتەو پرۆسەکەی بێنە ئاراوە. بە تایبەت جە تورکیا و سووریانە، با گرڎو ۋەرکۊتوو مېیامینی بۆ بە زەمینێوە دیموکراتیک. شاندەکەما ویرش چانەی کەردەنۆ سەردای سەرنیشت و ۋەرکۊتوو سووریای بکەرۆ. گرنگە گۊش دارمێنە پەیلوایەکا ئا لایەنا کە ڕێککەوتەیەکەشا ئیمزا کەرڎەن. پێشئامایۍ فرە گرنگۍ موینمۍ."

جە دما دماینە باقر خان ئاماژەش پانەی دا کە ئاشتی پەی خاسەو گرڎو هاموڵاتیان و کۊشش بکەردۍ پەیامو ئاشتیی جە گرڎو تورکیای و هەرێمەکەینە وەڵا بکەردێوە.