بانگەوازەکەو ڕابەر ئاپۆی پەی "ئاشتی و گلېرگەو دیموکراتیک"ی جە ٢٧ و شوباتی جە سەرانسەرو جەهانینە پاڵپەشتی و پێشوازیێوە گۊرەش شۊنەو ۋێشەرە ئارڎ. حکومەتو سویسرای ئەرەیاۋناش پێشوازی جە بانگەوازەکەی مکەرۆ، ئاماڎەن مېیانجی و چەمڎاری جە ما بەینو لایەنەکانە بکەرۆ.

حەفتەی ۋېیەردە پەرلەمانتار و ئەندامو کۆمیسیۆنو کاروبارو جبەری فابیان مۆلینا، پێشنیارێوەش ئاڕاسەو حکومەتو سویسرای کەرڎ بە نامونیشانو "سویسرا چنی پرۆسەو بەینو پەکەکەی و تورکیای هۊرسەنگنۆ؟"، حکومەتو سویسرایچ جوابش داوە.

ئاماڎێنمۍ دەورو ۋێما گێڵنمۍ

حکومەتو سویسرای ئەرەیاۋنۆش بانگەوازەکەو ڕابەر ئاپۆی پەی ئاشتی جە تورکیانە گرنگا و ماچۆ: "بە شاڎمانیۆ پێشوازی جە بانگەوازەکەو عەبدوڵا ئۆجالانی جە ٢٧ و شوباتو ٢٠٢٥ ینە مکەرمۍ، بانگەوازەکە دیدگێوە پەی مەیسەر کەردەی ئاشتی پێشکەش مکەرۆ. سەرو داواو لایەنەکا، حکومەتو سویسرای ئامادەن مېیانجی بکەرۆ و دڵسۆزی ۋێش نیشانە بڎۆ".

ۋەرپەرسی تورکیای یاڎ مارمێوە

جە جوابو پرسیارەو فابیان مۆلینا "پەی ئانەی جە تەمامو پرۆسەو ئاشتینە عەبدوڵا ئۆجالان جە هەلومەرجی گونجیا و مرۆڤانەنە جە زینانەنە بۆ، سویسرا چێش مکەرۆ؟"، حکومەتو سویسرای ماچۆ:

"پېوەس بە هەلومەرجو زینانیکەردەی عەبدوڵا ئۆجالانی، حکومەتو سویسرای پاڵپەشتی جە پێشنیارەکا کۆمیتەو ڕا گێرتەی جە ئەشکەنجەو ئۊروپای (سی پی تی) مکەرۆ. سویسرا بەهەماهەنگی چنی کۆنسەو ئۊروپای و ئەرەمەرزیاو ئاسایشو ئۆروپای، بەشێوێوە ڕێک و پێک ۋەرپرسیاریەکۍ تورکیای دەربارەو مافەکا مرۆڤی و ڕێزگێرتەی جە سەروەریی یاسای یاڎمارۊوە".