بەرنامەکە سەرو وردەکارییەکا ئەوەکۊشای و ژیۋای جە مەڕەکا جەنگینە گرڎ شەممێوە سەعات ٢٠:٠٠ جە ستێرک تی ڤیۆ  پەخش مکریۆ.

زانێوە پېوەس بە وەسفو وڵاتەکەیش واتەبێش؛ "جە زېڵې کەشەکانە تۆم شارتۆ". وڵاتەکەش و ئەشقو وڵاتەکەیش پیجۆرە پێناسە کەردەبې. کورد کەشیێنې، عاشقې کەشینې... بە ڕێبازې ئەویندارانە لوایمې کەشەکا و پەی ئا عەشقەی کە جە زېڵې کەشەکانە شاریابێوە گێڵایمې.

ئینە ئاماڎەکەردەی بەرنامێوە تایبەتین پەی ئەرەیاۋنای ئازادی جە کەشەکا کوردەسانینە. جە حەقەتینەنە هەوڵمادا بەرهەمێوە هامشێوەو بەڵگە فیلمې ئاماڎە بکەرمې. دیما کە جە کەناڵەکا پڕوپاگەندەو جەنگی تایبەتینە پەی ئەوەکۊشای گەریلاکا جە دژو مەڕەکا جەنگی چڼین هەواڵ و زانیاریې غەڵەتې هەنۍ. هەرپاسە ۋەرو ئانەی تا ئیساتې بەرنامەکې فرەتەر سەرو جەنگی ئاماڎە کریێنې، فرەو چێوی هەن کە گەلەکەما مەراقش مکەرا و زانیاری فرە کەمشا سەرا. وە جە ئەرەیاۋنای/ئینتەرنێتەنە زانیاری و دیمەنەکې سەبارەت بە مەڕەکا جەنگی تەنانەت سەڎەنە ١و حەقەتینەکا نیەنې. چی مەڕا جەنگینە، دۊڵەمەڼی هزری، زیرەکی ئینسانەکا، قوڵایی ئەنەیاوای جە شۆڕشی، ئیرادەو هێڵۊو ئاپۆیی، گەرمی هەمڕایی، مۆڕاڵو گەریلاکا، شێوازو ژیۋای و ئەوەکۊشای گەریلاکا... جەهانێوە ئەفسوناوی هەن. گەریلاکې گەرەکشا نەبې بڕې یاگې و کۊششا نیشانە بڎا، هەرپاسە ڕا نەڎریا جە نزیکۆ بڕې یاگې بوینمې. چونکی جە ئەوەکۊشای گەریلاینە، جە جەنگی تازەنە جەمې نهێنیې سەروازی هەنې و ئێمەیچ پاگیریما سەرو ئانەی نەکەرڎ کە بلمۍ گرڎ یاگې و دیمەنو گرڎ چێوې تۆمار بکەرمې.

https://anfturkce.com/uploads/tr/articles/2025/07/20250701-03-jpgdc986d-image.jpg

مەرحەلەو تۆمارکەردەی و ئاماڎەکەردەی ئی بەرنامەیە پەی ماوەو یەرې وەرزا بەردەوامبې. چی پڕۆسەنە شایەتې پێشئامایە تاریخیەکا پېسە کۆنگرەو ١٢و پەکەکەی بێنمې و تۆمارما کەرد. بێگومان ئینې مژارې ئی بەرنامەیە نیەنې، بەڵام ئی پێشئامایې مەڵامەتو درێژبیەیۆ ئی پرۆسەیە بێنې. جە تەمامو بەرنامەکەینە چڼین جارې جە هەڤاڵا گەریلای پاڵپەشتیما هۆرگېرت. بڕې وەختې ڕۊشنایما پەی گێرێنې، بڕې وەختې کامێراکاما هۊرگێرێنې و بڕۍ وەختێچ بەرێنێما پەی بڕې یاگا. بڕې وەختیچ وەڵۍ ئانەینە بلمې مەودایې فرە گنێنې وەڵێما، پیجۆرە تاواما بە سڵامەتی بەرنامەکەیما ئاماڎە بکەرمې... چی بەرنامەنە ڕەنجو سەڎان گەریلایا هەن، بەڵام داخەم نمەشۆ گرڎی نیشانە نمەڎەیمې و نامەکاشا یاڎ نمارمېوە. بڕې جە هەڤاڵا داواشا کەرڎ مېیاچەماشا نەوینیۆ و نامێشا نەبریۆ، ئێمەیچ ڕێزما جە قەرارەکەیشا گېرت. چێوە سوپاسو گرڎو ئا هەڤاڵا مکەرمې کە ڕەنجشا کێشتەن.

تا ئاڼنەی تاواما دیمەن، سروشتو ژیۋای گەریلاکاما بە کوڵی نیشانە دا. هەوڵمادا گرڎو گفتوگۆکا سەرو کۊششو گرڎو گەریلاکا، جوابەکاشا پەی پرسیارەکاما و دیمەنەکاشا تۆمار بکەرمې. فرەو وەختی وەڵې بەرنامەکەینە مایکەکاما بەبێ زانیاری هەڤاڵا وزێنمې ۋەردەمشا. یانەو گرڎی ئاوا بۆ داواکاو ئێمە قبوڵ کەرێنې و جوابو پرسیارەکاما دێنێوە... نەتاواما گرڎو دیمەنەکا تۆمار بکەرمې؛ بڕې دیمەنې جە لایەنو گەریلاکاوە پەیشا کیانێنمې کە دوورې بېنې جە ئېمۆ، جە بڕې دیمەنێنە هەڤاڵې گەشمەرڎې بێنې و بڕیچشا وردەکاری ژیۋا ۋێشا بې. هەرپاسە چڼین دیمەنێما جە ئەرەیاۋنای هەپەگەینە هۆرگێرتې و سوپاسو گرڎو ئا هەڤاڵا مکەرمې.

هیواڎارێنمې ئی بەرنامە مەڕەکا جەنگی و  بڕې مەراق، پەیلوای، فام و هەڵوێسو گەریلاکا وزۆ وەرو چەما... ئی پرسیارێما جە ۋێما کەردە؛ جە زېڵې کەشەکانە چێش هەن؟ چێش مێزمێوە؟ جە زېڵې کەشاکانە دیما؛ فیداکاری، هۆشیاری، ڕەنج، زانست، ئاردەینە، زەریفی، پەروەردە، حەقیقەت، ئەۋین، ڕۆحو ئازادی، سەرکۊتەی و هونەر هەن.