چالاکییەکۍ پەی ئازاڎیی جەستەیی ڕابەروو گەلوو کوردی عەبدوڵڵا ئۊجالانی پانیشتوو کورڎسانینە بەرڎەوامێنۍ و بە قسۍ ئەندامێوە کۊمیتەو ئازاڎیی ڕابەر ئۊجالانی سەرباروو ڕاگێرییەکا درێژە بە چالاکییەکاشا مڎا.
بیست و پەنجەمین ساڵوەگێڵوو پیلانگێڵنیی دژ بە ڕابەروو گەلوو کوردی ڕابەر عەبدوڵڵا ئۊجالانینە، هەڵمەتێوە پەی ئازاڎیی ئۊجەلانی دەسش پەنە کەرڎەن و تا ئیساتۍ پانێڵێوە و کۊبییەێوە و بەیاننامێوە لاو پارێزنەرا و مافپەروەراوە ونیێنیوە و پارێزنەرێوەیچ ماچۊ قەرارا چند چالاکیێوە تەرێچ کریا.
'چالاکییەکۍ سسێنۍ و زهنیەت و فکروو پانیشتی ئەرەگیر کریان'
پارێزنەرەی ڕاوێژکارە چرۊ شوانییە ماچۊ" ئێساڵ جە ١٠٠ ناوەندە جیهانییانە چالاکییەکۍ پەی ئازاڎیی ڕابەر ئۊجالانی ملۊ ڕاوە و تا ئیساتێچ درێژەش هەن، وەلۍ پانیشتوو کورڎسانینە کە بەحیساب ئازاڎا و حکومڕانیێوە کوردییش هەن، وەلۍ بەداخۊ پانیشتنە باشوور چالاکییەکۍ سست ملا ڕاوە و ڕاگێری هەن".
شوانییە ئاماژەش پانەیچە کەرڎەن "بەداخۊ پانیشتنە زهنیەت و فکروو خەڵکی ئەرەگیر کریان، ئەرەگیرۍ بەتەمامەتی جە ڕاو جەنگی تایبەتیوە ئەقڵوو فرەو خەڵکی ئەرەگیر کریان و فرەو چێوەکا بە دیدگای حزبی یان ئاینییوە وینیا، وەختێوەنە ئێمە باسوو حزبی مەکەرمێ، بەڵکوم پەرسەکۍ پەرسێوە نەتەوەییەنە، ئێمە باس جە ئازاڎیی ڕابەرێوە کەرمێ، کە ژیوای وێش پەی گەلەکەیش کەرڎەن قوربانی و پەی گەلەکەیش ئینا زینداننە".
' چالاکییەکۍ بەرڎەوامۍ با'
ئەندامێوە کۊمیتەو ئازاڎیی ڕابەر ئۊجالانی سەبارەت بە هەرمانە و چالاکییەکاو دماتەریشا واتش" هەرمانۍ و چالاکییەکێما بەرڎەوامۍ با، حەرچند ڕاگێری هەن، وەلۍ ئێمە بەرڎەوامۍ بیمێ، پەی ئینەیچە قەرارا پاسەن ڕاپیماێوە جەماوەری کەرمێ، ئەگەر مۊڵەتما بدا و ڕاما وەنە نەگێرا".
ئەندامەکۍ کۊمیتەو ئازاڎی ڕابەر ئۊجالانی واتیچش" حەر جە چوارچوەو چالاکییەکانە قەرارا پێکئاما ئاینییەکاو پانیشتوو کورڎسانی کۊنگرێوە ڕۊنامەوانیینە بەیاننامێوە هامبەش پەی ئازاڎیی ئۊجالانی بواناوە".
'خەباتوو پارتوو کرێکاراو کورڎسانی خەباتێوە ڕەوان و گێرتەی ئۊجالانی و مەنەیوەش زینداننە نایاسایین'
دکتۊر هیوا عەلی مامۊستاو زانکۊی کۊلێجوو یاساو زانکۊو سلێمانیینە ماچۊ"خەباتوو پارتوو کرێکاراو کورڎسانی پەکەکەی خەباتێوە ڕەوان و بە هیچ پیمەرێوە مەلا دلۍ تیرۊریوە، چونکوم خەباتەکەشا پەی ئازاڎیی نیشتیمانەکەیشانە و سەروو خاکوو وێشاوە نیشتێنۍ و زوڵمشا وەنەو کەسی نەکەرڎەن.
دکتۊر هیوا واتیچش"بە پاو پیمەروو یاسا میاندەوڵەتییەکا جە چوارچوەو مافوو ئینسانینە، عەبدوڵڵا ئۊجالان مشۊم ئازاڎ کریۊ.
مامۊستاکەو زانکۊی واتیچش "ئانە کە ئارۊ وەراوەروو گەلاو وەرنیشتوو کورڎسانیوە کریۊ ملۊ خانەو تیرۊریوە، چونکوم دریۊ وەنەو ئەرەمەرزیا مەدەنییەکا و نانەواخانکا و وێستگەو کارەبۍ خاپوور کریۊ ژەنی و زارۊڵۍ بێتاوانۍ گەشمەرڎۍ کریا.
