فەرماندەیی قەرارگەو مېیانو یەژا ستاری ئەرەیاوناش؛ ساڵڕۆو ئەرەمەزنایرەو پەکەکەی جەژنێوە نەتەوەییەنە و دووەمین نەورۆزو گەلوو کوردین و ئەرەیاوناش کە پەکەکە جە مېیانو فاشیزمو پیاسالارینە تۆپێوە ئایرین و ڕۆشنایی هیواین.
فەرماندەیی قەرارگەو مېیانو یەژا ستاری بۆنەو ٤٦ـەمین ساڵوەگەڕو ئەرەمەزنایرەو پەکەکەی ئەرەیاونێوەش وەڵاکەردۆ.
ئەرەیاوناکەی پی جۆرەنە:
"٤٦ـەمین ساڵوەگەڕو ئەرەمەرزنایرەو پارتەکەیما پەکەکە، بەتایبەت جە ئەرەمەزنەرو ئی داستانە بێ دماییە ڕابەر ئاپۆی و جە گردو گەشمەرڏا شۆڕشی، چا وێڕاگرا کە شۆنەو ڕێبازو مەزڵومی و ساراکا کەوتێنێ جە گردو گەلی ئازادیوازی و کۆششکاری موبارەک مکەرمێنە.
چی ٤٦ ساڵەنە قەرارشدا، ئیرادە، ئازایەتی، دڵسۆزی و ئا باوەڕەیی کە ڕابەر ئاپۆ پەی ئازادی گەلو کوردی پنەش نیشانە دێنمێ، پاسەش کەردەن کە کوردێوە ئازاد، ژەنێوە ئازادە و گلێرگێوە ئازادش خوڵقنان. پارتیما پەکەکە بە ڕابەرایەتی ڕابەر ئاپۆی ماوەو ٤٦ ساڵان ئەرک و وەرپرسیاری شۆڕشو گەورەو مرۆڤایەتیش ئینا ئەستۆنە. ماوەو ٤٦ ساڵان پەکەکە جە گرد بوارێنە پەی پێگە و کەرامەتو وڵاتی ئەرەکۆشۆ و ۋنی مڎۆنە. جەماوەو ٤٦ ساڵا ویەردەینە بەدەیان هەزار فیدایێ گیانو وێشا پێشکەش کەردەن. جە یوەمین گەشمەرڏەو ئینترناسیۆناڵی حەقی کارەری تا دماین گەشمەرڏەو ئینترناسیۆناڵی عەزیز موسڵی، شۆڕشگێڵنێ حەقەتینەو نەتەوەکانێ، جە گردو نەتەوەکانە مرۆڤی ئازاد و ئاشتیواز ڕێبازو ئەرەکۆشای پەکەکەیشا هۆرچنی و بەشێوێ سنوورنەشناسانە بەشداریشا چی شۆڕشە گەورەو مرۆڤایەتینە کەرد.
هەر جە ساراکاوە تا بەروار، بێریتانە و نورحەقەکا، جە لەیلا سۆرخوێنۍ تا مێدیا عەگیدۍ، ئاخین گاباریی و هەژار زۆزانەکا، بەهەزاران ژەنێ کوردی، بە ئایدۆلۆژیاو ڕزگاری ژەنێ، جەسەیەو ویرۆکەکا ڕابەر ئاپۆی و پەکەکەی، دەرفەتو وەڵێوستەی و هەناسەشا هۆرگێرت، یۆ بە یۆ داستانشا نویستۆ و جە ڕزگارکەردەو ڕۆحو ژەنا هەنگامێ گەورێشا نیێنێ. جە گرڎ پرۆسێنە گەشمەرڏی سیمبول و سەرمەشقا مڏرامانی بەسەدان نمونە بەرکەوتێ و ئێرو ئی جەنگەیشا بە ئەرەکۆشاو وێشا بەرز کەردۆ. جە فەرماندە عەگید تا جە خواوەند زیلانێ تا ڕەشید سەردار و عادل بیلیکیان، جە نودا و ڤیانەکاوە، جە دەلال ئامەدۍ و عەگید جڤیانێوە تا مڏرامان کەرا مەڕەکا جەنگی، جومالی چۆروم و چاڤرێکا، جە بۆتانەکاوە، هەژار تا باگەر و ئاڤزەمەکا و هەتا گەشمەرڏا مڏرامانو ٢٠٢٤ کە جە کەشەکا سەرنیشتو کوردەسانیوە داستانشا نویستۆ و هەرپاسە فیداییا زیلانێ و ڕۆژگەر هێلین و ئاسیا عەلی بە دەیان هەزار گەشمەرڏی نەمرۍ کە چێنە دەرفەت نییا نامێ گردیشا بۍ، بنیاڎنەرو شۆڕشی گەورەو جەهانی، بنیاڎنەرو شۆڕشو ژەنا ئازادی، گلێرگێوە ئازادی و بنیاڎنەرۍ و حەقەتینۍ پەکەکەینۍ. کەواتە پەکەکە پەی وێش پارتو گەشمەرڏان و سوپاو گەشمەرڏانە. پۆکەی پەکەکە ماوێوە فرەن سەرکەوتەو ڕێبازو وێش مسۆگەر کەردەن و بە گرڎ جۆرێ محاڵا شکس بارۆ.
ئەرەکۆشای ژەنێ ئازادێ کە بە بەشداری گەشمەرڏە سارا (ساکینە جانسزۍ) کە بە گلێرۆبییەی ئەرەمەزنارەو پارتەکەیما پەکەکە دەسش پنەکەردەن، ئارۆ بەرەو قولەپۆپە ملۆ و مېیاوۆ بە زێڵۍ ئاسیا عەلیەکا. جە چارەکە سەدەو ژەنا و 'ڕۆو ٢٥و نۆوەمبەری ڕۆو ئەرەکۆشای و یۆگێرتەی جە دژو تنوتیژی دژبە ژەنا'، جە بەرزتەرین ئاستو هامکاری و ویرۆکەکا ڕابەر ئاپۆی و پراکتیکەکانە جە کەسایەتی گەشمەرڏانە وێش بەروستەن. دروشمۊو 'ژەنی، ژیوای، ئازادی' کە ئارۆ جە سەرانسەرو جەهانینە بییەن بە ئیلهامبەخشو ئەرەکۆشای ژەنا، هرز و ویرۆکێ ڕابەر ئاپۆی نیشانەش مڎا؛ مۆرەو ڕەنج، مانیایی و ۋنەو گەشمەرڏانە. پۆکەی بەشداری گەشمەرڏە سارێ جە ئەرەمەرزنارەو پەکەکەی و بەردەوام بییەیش جە ئەرەکۆشای ئازادینە، هەم ڕەمزۆو ئەرەکۆشای ژەنا کوردینە و هەم ئەنجامو ئا کۆششەینە. ئا کلتوورە مڏرامانییە ژەنۍ سەرهۊردێرۍ کە جە زېڵۍ ساراکاوە یاوا بە دڵو ئاسیا عەلیەکا، جە ٤٦ـەمین ساڵوەگەڕو پەکەکەینە بیی بە تۆپێ ئایرینە و جە مېیانو فاشیزمی، مېیانو قەراردای چەمکو ستەمینە تەقاوە و پێسە بوومەلەرزێوە هێڵۊو ستەمیش شڵەقنا.
پارتیما پەکەکە نزیکەو نیم سەدەین بێ مدرای ئینا ئەرەکۆشاینە و ڕوانە ئەنجامەکا جەنگەکەی بە گەلو کوردەسانی ئەرەیاونۆ. بەبەردەوامی ڕاسی جەنگی و ئەرەکۆشای وێش بە ڕۆشنتەرین شێوە وستەن وەردەمو گەلەکەی و ڕاو گردی پێسەو کلتوورێ نەفاڕیای بەردەواما. جە سەرەتاو سەرهۆرداو پەکەکەیۆ تا ئارۆ چنی واقیعو گەلو کوردی لوان وەڵێ، پێسەو ڕۆحێوە و جەسێ، مڏرامانو پەکەکەی پەشتی بە ڕاسی یۆگێرتەو وێش چنی گەلی بینۆنە. پۆکەی پەکەکە جەبەرو گەلەکەیش پەشتی بە حیچ هێزێوە تەری مەبەسۆ. پۆکەی جە ماوەو ٤٦ ساڵا ئەرەکۆشای یۆ جە دروشمە نامیەکاش "پەکەکە گەلا، گەل ئیناچێ!" بەرز کەرۆوە.
سەرەڕاو ئا گرد سیاسەتە گڵیاوا پیاسالاری، گەلەکەما و پارتیما پەکەکە، قەد یۆشا بەتەنیا جیاناستەن و قەد جە یۆی جیێ نمەباوە. یۆبیەو ڕابەر ئاپۆی، گەل و پارتیما پەکەکە، جە مېڎانەکا نەورۆزینە پەی گردو جەهانی بەرزکریانۆ و جە دماجاریچەنە جە ڕاپیمای تاریخی سردەو کۆلنینە دیسان وێش نیشانەداوە. پۆکەی ساڵڕۆو ئەرەمەزنارەو پارتیما جەژنێوە نەتەوەییەنە و نەورۆزی دووەما ئا حەماسەت و جۆش و خرۆشەی کە جەژنەو نەورۆزی بە سەڎان ساڵێن جە زېڵۍ گەلەکەیمانە وەشش مکەرۆ، دماو سەڎان ساڵا تەری ئەرەمەزنارەو پەکەکەی پێسەو نەورۆزی دووەم بەردەوام موبارەک کریۆ. پۆکەی بە ئاماو ٤٧ـەمین ساڵڕۆو ئەرەمەزنارەو پارتیما پەکەکە، بە جۆش و خرۆشو نەورۆزی دووەمی، ئەرەمەرزنای پەکەکەی جە ڕابەر ئاپۆی موبارەک مکەرمۍ و وەشەویسی و پېوەس بییەی وێما بەربرمێ. ئەرەکۆشای پارتیما پەکەکەی، دوژمنی ئەرەگیر و چەوەسنەری، کە جە دڕندەینە حیچ سنوور و ئەخلاقێ نمەشناسۆ، یاونانش بە ئاژێوە تیکشییەی و دماین. پۆکەی هەتا درێژە بە جینۆسایدی و ئینکارییەکاش بڎۆنە، ئاڼنە جە شکسی و ئاخریش نزیک بۆوە. پۆکەی پرسو پەکەکەی گەرەنتی سەرکەوتەین. ئێمە گرد کاتۍ بە سۆز، ئیراڎە و بڕوای بەرزۆ بە ئەرک و وەرپرسیاری وێما پەی سەرکەوتەی ئەرەکۆشمێ. پەی ئی ئەرکەی کە بە ۋنەو گەشمەرڏاما بنیاڎ نریان، بە ئیراڎێوە بەرزۆ ماچمێ ٤٧ـەمین ساڵەو ئەرەمەزنایرەو پەکەکەی بۆ بە ساڵەو ئازادی و سەرکەوتەی پەی گەلەکەیما".
