دماو ئانەی جە ماۋەکاو ۋەڵېنیەنە چنڎین کەرەتۍ چالاکېۍ حکومیۍ جە شارو کەرکوکی لوۋۍ ڕاۋە و پارێزگارو کەرکوکی بە ۋەکالەت تەنېا زۋانی عەرەبی و ئېنگلېزیش بەکار ئاورڎەن ئېنەیچ نېگەرانی کورڎو شارەکەی و پارتە کورڎسانیەکا شارەکەیش ۋنەکۊتۊ، جە ۋەختێنە کە فرەیی ئەرەنېشتاو شارەکەی کورڎێنۍ و کورڎیچ زۋانێۋی فەرمی عێراقین، دماو ناڕەزایی ئەرەنېشتاو کورڎو شارەکەی فەرمانگەو ھەرمانو کارو ئەنجومەنو ۋەزیرانی و لېجنەکۍ نۋیسېێۋەشا ئاڕاسەو پارێزگارو بە ۋەکالەتو شارو کەرکوکی کەرڎەن و جە خاڵەو پەنجەمیەنە جەختکەرۊۋە، جە نۋیسیا فەرمېەکانە ھەرڎوۋە زۋانی عەرەبی و کورڎی بەکار بریۊنە.

دماو ئی قەراریە و قبوڵنەکەرڎەو بېەو کورڎی و زۋانەکەیش جە تەرەفو دۊڵەتو فاشېستوو ترکیەیۊ جە شارەکەو ۋێشنە، ھێزی شەۋۍ ۋەزارەتو بەرو ترکېەی دژو نۋیسېایۍ ئەمېندارێتی ئەنجومەنو ۋەزیرانو عێراقی سەبارەڎ بەبەکارئاۋرڎەو زۋانی عەرەبی و کورڎی، جە نۋیسېا فەرمیەکانە، ئاما دەنگو بە پاشێلکەرڎەو مافە بنەڕەتېەکاو ترکمانېش ۋەصف کەرڎ.

نۋیسیاکە، حکومەتوو ترکیەیش توڕەکەرڎەن و بەپاو نۋیسېێۋە کە ڕۊنامەو"دەیلی سەباحی" ۋەڵاو کەرڎەنۊ، ۋەزارەتوو بەرو ئا ۋڵاتېە پەیلوۋایش چانەن ئا ھەنگامۍ مافش پاشێل کەرا و زەرەر ئۊو ھەوڵەکا مڎۊنە، کە جە پاو پێۋەرە ژیۋای و کلتوری نریێنۍ، داوایچش جە دەسەڵاڎ داراو عێراقی کەرڎ، بلاۋە قەرارەکەیشارە، دۊڵەتوو عێراقېچ حەر زوو لوۋا چێرو فشارەکاو دۊڵەتوو ئەرەگېرو ترکیەی.

یاگۍ ۋێشەنە کە ۋاچمۍ جە دەسوری عێراقیەنە زۋانی ترکمانی پێسە زۋانێۋی فەرمی دۊڵەتو عێراقی دڎانش نەنریان پۊرە، جە ۋەختێنە زۋانی دوۋەم زۋانی فەرمېن جە تەمامو عێراقیەنە.

ھ.ش