داڎگاو دەستوری تورکیای فەرمانەو بلۊککەرڎەو ھەژمارو خەزێنەو ھەدەپەیش جە دۊسیەو وستەیرەو ئا پارتەینە ھورشاناۋە.

جە سەرەتاو مانگەو کانونو دوۋەمو ئێساڵی داڎگا قەرارشدا ھەژمارەو بانکی ھەدەپەی کە چا ڕێۋە حکومەت بەپاو قەبارەو دەنگەکاش زەڕو ئا پارتەیە دابېن کەرۍ مرڎناش.

جە ۋەران ۋەرو ئا قەرارەو داڎگاینە کە جە چوۋارچێۋەو دۊسیەو وستەیرەو ھەدەپەی بەرشکەرڎەبۍ، ھەدەپە کەمپەینو گەنجېنەو ئێمە گەلەکەمانە-ش ئەرەیاۋنا و دەسش بە کۊکەرڎەیۊ ھامکاری کەرڎ.

ئارۊیچ مېدیێکۍ تورکېای ئاشکراشا کەرڎ داڎگاو دەستوری جە چوۋارچێۋەو قەرارو ۋنەکۊڵیاکاشنە ئا قەرارشا ھورشاناۋە کە سەرەتاو مانگەو یەکو ئێساڵی بەرش کەرڎەبۍ.

دۊسیەو وستەیرەو ھەدەپەی جە ٢١ و حوزەیرانو ٢٠٢١ یۊ دەسش پنە کەرڎەنو تا ئېسەیچ ۋەردەواما، قەرارا جە ماۋەو دماتەریەنە کە کەرۊنە واڎەو ۋەڵۍ ھورچنیاکاو تورکېای قەرار جە بارەو وستەیرەی یان ڕەڎ کەرڎەیۊ داواکێۋە بڎۊ.

بەکر شاھېن، سەرۊکو داواکارو گرڎی داڎگاو باڵاو تورکېای دماو تۊمارکەرڎەو سکاڵاو وستەیرەو ھەدەپەی جە ساڵەو ٢٠٢١ی ئەرەیاۋناش:'' تەمامو قەرارو دۊسیەو ۋاچەکا ۋەرپەرسا ھەدەپەیشا پێسە بەڵگەی وستەن دلۍ دۊسیەکەی کە زیاڎ جە ٨٠٠ لاپەڕان و چنەشەنە داوا کریان قەڎەغەو ھەرمانەی سیاسیۍ وزیۊنە سەرو ٤٥١ کەساو ڕاو جای پەنەوازیچ ۋەران ۋەرو ھەژمارە بانقیەکا ھەدەپەینە گېریۊنە ۋەر''.

بەپاو بڕگەکاو بوجەی ئەشۊ جە ئێساڵەنە ١٧٩ ملۋێن لېرۍ تورکی و بە گرڎیچ تا ١٠ و کانونو دوۋەمو ۋیەرڎەی کە قەرارو بلۊککەرڎەکەیش چنە بەرشیەبۍ، ٥٣٩ ملۋێن لېرۍ ھامکاری دارایی ۋەڵتەری ڕادەسو ھەدەپەی کریۊنە.

ھ.ش