سلێمان ئەحمەد، ڕۊنامەنویس و هەواڵسازوو بەشوو عەرەبیی ئاژانسوو ڕۊژنیوزی، مانگەو ئەیلوولیوە، پەی سەرڎای خێزانەکەیش لوابۍ وەرنیشتوو ئاوای کورڎستانی، دماو ئەوەگێڵایش پەی پانیشتوو کورڎستانی،  دەروازەی ڕسمیی فیشخاپوورینە، هێزەکاو پەدەکەی گێرتەبۍ. ئا ڕۊنامەنویسە بەبۍ هیچ هۊکارێوە یاسایی و هیچ ڕۊشنکەرڎەیۊیۍ، ماوەو شش ڕوان بێسەروشۊنا و پەیوەندییش چەنی پڕچیان.  

وەڵتەر ئاژانسوو ڕۊژنیوزی، ئا مامەڵەو پەدەکەیش وەراوەروو ڕۊنامەنویساوە ئیدانە کەرڎەبۍ و داواش کەرڎێبۍ دەمودەس چارەنویسوو سلێمان ئەحمەدی، ڕۊنامەنویس و هەواڵسازوو بەشوو عەرەبیی ئاژانسەکەی ئاشکرا کریۊ و ئازاد کریۊ، جەختیچش کەرڎەبێوە، سڵامەتیی گیانوو ئا ڕۊنامەنویسەیە ئینا دەسوو پەدەکەینە.

بارەو بێسەروشۊنکەرڎەی ئا ڕۊنامەنویسەیوە د. ئەرادە جبوری، وەرپرس جە سەندیكاو ڕۊنامەنویساو عێراقینە ئەرەیاونابێش، ئڕفانای ڕۊنامەنویس سلێمان ئەحمەدی، كە هەواڵسازوو بەشوو عەرەبیین ئاژانسوو ڕۊژنیوزینە ئیدانە کەرمۍ، داوایچ جە لایەنە پەیوەندیدارەكا کەرمۍ، کە چارەنویسش ئاشكرا كەرا.

واتەبێچش، هەوڵەكۍ پەی بێدەنگكەرڎەی و ڕاوەنیای ڕۊنامەنویسا هەولێرنە و دەروازە سنوورییەكانە چێروو دەسەڵاتوو پەدەكەینە زیادشا کەرڎەن، ئینەیچە ئاماژێوەن کە ئڕفانای سلێمان ئەحمەدی سیستماتیك و نایاسایین.

ھاموەخت سەنتەروو میترۊی، پەی داکۊکی جە مافوو ڕۊنامەنویسا بارەو گێرتەی ڕۊنامەنویس، سلێمان ئەحمەدیوە ئەرەیاوناێوەش وەڵا کەرڎۊ و داواش وەنەو حكومەتوو هەرێموو كورڎستانی کەرڎە، چارەنویسوو ئا ڕۊنامەنویسەیە ئاشكرا کەرۊ.

ئەرەیاونایەکەو سەنتەروو میترۊی داواش کەرڎێبۍ، "ڕاوشۊنی پێویس یریۊرە وەر، تا ڕۊنامەنویس سلێمان ئەحمەد، بە سڵامەتی گێڵۊوە".

بەشێوە تەروو ئەرەیاوناکەینە ئامابۍ، سەنتەروو میترۊی راوێژكاری یاسایی وێش ئەرەئسپاران بە لوایشۊنیرەو كەیسوو (سلێمان ئەحمەد)ی، هەواڵسازوو بەشوو عەرەبیی ئاژانسوو ڕۊژنیوزی، چەنی حەر وەڵێکەوتەیێوە كەیسەكەیشنە ڕای گرڎینی هاگادار کەرمێوە.

ئڕفانای و بێسەروشۊنکەرڎەی ڕۊنامەنویس سلێمان ئەحمەدی ئینا وەختێوەنە کە ماوەو چند ساڵێوەن پەدەکە فشارەکێش پەی سەروو ڕۊنامەنویسا و دەنگە ئازادەکا هەولێر و دهۊکنە هەسۍ کەرڎێنیوە و چندین ڕۊنامەنویسۍ و چالاکێش تا ئیساتۍ  وستێنۍ زینداندانە و بەشێوەشا دماو ئازادبییەیشا ناچارۍ بیێنۍ یاگۍ وێشا جیا بازا.