ڕێکوزېاو مافەکاو مرۊڤی جە ئێران ئەرەېاۋناش : جە ماۋەو ٢٦ ڕوا سەرەتاو ئێساڵېەنە ، لانېکەم ٥٥ کەسۍ جە لاېەن و دەسەڵات و داڎو ئێرانېۊ جە دار درېێنۍ ، ئاماژەش پانەی کەرڎ ، ناسنامەو ١٠٧ کەساشا پۍ ېەکلاېی بېەنۊ کە بە مەڵامەت و بەشداری کەرڎەېشا جە ۋێنېشانداکانە ، سزاو جە دارداېشا سەرەرە سەپېان .

ھێزی ڕێکوزېاو مافەکا مرۊڤ و ئێرانی ، جە تازەتەرېن ئامارشەنە ۋەڵاش کەرڎۊ ، بە ېاگۍ ېاۋناو سزاو جە دارداو ئا ھاموڵاتېا کە سېاسیۍ نېەنۍ ، جە لاېەن و مەکېنەو جە دارداو کۊمارو ئېسلامی ئێرانېۋە ئېنا زېاڎبېەېنە ، جە ماۋەو ٢٦ ڕوا سەرەتاو ئێساڵېەنە لانېکەم ٥٥ کەسۍ جە داردرېێنۍ ، کە چا ژمارەېە ٣٧ کەسێشا ، بە تۊمەتەو پەېۋەس بېەی بە ماڎەی ھۊشبەرېۊ ئا سزێشا سەرەرە جیبەجۍ کرېان .

ڕێکوزېاکە جەختش چانەی کەرڎەنۊ ، ئا ٥٥ کەسە ھامشێۋەو ئا ۋێنېشاندەرا جە ماۋەو لوای ڕاۋەو نا ڕەزاېېەکا ئی دماېیەېنە ، سزاو جە دار داېشا سەرەرە سەپېان ، بەبۍ ئانەی داڎگایۍ داڎپەرۋەرانە بکرېا ، جە داڎگاکاو شۊڕش و کۊمارو ئېسلامیەنە ، سزاو جە دارداېشا

سەرەرە سەپېان .

ڕێکوزېاکە ،ئامانج و سەرەکی کۊمارو ئېسلامی جە بە ېاگۍ ېاۋناو سزاو جە دارداو ئا ھاموڵاتېانە ، پۍ ۋەڵا کەرڎەېۊ تەرسۍ و تۊقناو گلێرگەېن ، سەرنجەو خەڵک و ئێرانی و گلێرگەو جەھانېش گێڵنانۊ و تەئکېدش کەرڎۊ ، ھەر سزێۋە جە داردای کە چێرو دەسەڵات و ئێرانېۋە جێبەجێ کرېۊ ، جە دارداېۍ سېاسین .

لا ۋێچشۊ مەحموود ئەمېری موقەدەم ، ڕاۋەبەرو ڕێکوزېاو مافەکا مرۊڤ و ئێرانی ئەرەېاۋناش ؛ جە نەبېەو جۋاب داېۊ مەدېاکانە ، ھامۋڵاتېو  گلێرگەی نێم دەوڵەتی دژو جە دارداو ئا گېرېاېانۍ کە سېاسېۍ نېەنۍ ، ئاست و ھەستېاری ۋەران ۋەرو بە ېاگۍ ېاوناو ئا سزا نا ئینسانېانە کەم بۊۋە ، ئاېچ ئېنا ئېسفاڎەو دەسەڵاتېنەو کار ئاسانی پۍ جە دارداو ۋێنېشاندەرا کەرۊ ، پەنەوازا ھامۋڵاتېێ و گلێرگەو نێم دۊڵەتی ۋەران ۋەرو گرڎ جۊرێۋە سەپناو سزاو جە دارداېنمۍ و ھەڵوێسما بۊ .

ھام ۋەخت بە پاو ئامارەو ڕێکوزېاکەی ، تا ئېسە ناسنامەو ١٠٧ کەساشا پۍ ېەکلاېی بېەنۊ ، کە بە مەڵامەت و بەشڎاری کەرڎەېشا جە ۋێنېشانداکانە سزاو جە دارداېشا سەرەرە سەپېان .

جە دلۍ ڕاسەو مانگەو ئەېلولو ساڵەو ٢٠٢٢ دماو شەھېڎبېەو " ژېنا ئەمېنی " جە لاېەن و پۊلېس و ئەخلاقی تارانی-ۋە ، ۋێنېشانداو ناڕەزاېیەکا جە ئێران و ۋەرکۊتو کورڎسانی دەسش پنە کەرڎەن و تا ئېسەېچ بە شێۋەو شکڵی جېاجېا  ئا ناڕەزاېۍ کە بە سەرھۊرداو " ژەنۍ ، ژېای ئازاڎی " ئەشناسېان ۋەردەواما و بە پاو ئامارو ڕێکوزېاو مافەکا مرۊڤ و ئێرانی چا ماوەنە لانېکەم ٤٨٨ کەسۍ جە ئاکامو تنوتېژی ھێزە سەرکوتکەرەکاو سەر بە دەسەڵاتېۋە گېانشا بەخشان ،کە ٦٤ کەسێشا زارۊڵێنۍ ، سزاو جە دارداو چۋار کەساشا بە ېاگۍ ېاۋنان .

ھ.ئ