بانگەوازو 'ئاشتی و گلېرگەی دیموکراتیک'ی ڕابەر ئاپۆی نەک تەنیا جە تورکیا و کوردەسانو جە ۋەرکۊتوو مېیامینی و مېڎانی مېیاننەتەوەیینە دەنگش داوە و پاڵپەشتیی و پێشوازیێوە دەسە جەمعیش وێشۆ وینا، وە چنی ۋێش مژارو هۊرسەنگنای و گفتوگۆکەردەیش ئارڎ ئاراوە. چا چوارچێوەیەنە پەرلەمانتارو سویسرای فیدراڵ و ئەندامو کۆمیسیۆنو پەیوەندییەکا جبەرو سویسرای فابیان مۆلینا بانگەوازە تاریخیەکەو ڕابەر ئاپۆی و ڕووەدایەکۍ دماتەریشا جە ڕاو ئاژانسو هەواڵو فورات (ANF)یۆ هۊرسەنگنۍ.
'مشۊم دەمودەس ئېژا ئۆجالان ئازاڎ بکریۆ'
پەرلەمانتار فابیان مۆلینا ئاماژەش پانەیە دا دلۍ ئا هەلومەرجە سەختەینە کە ڕابەر ئاپۆ چنەشەنە بانگەوازێوە تاریخیش کەرد و واتش: "ئېژا ئۆجالان ماوێوە فرەن ئینا دلۍ ئاژێوەنە کە بە پەپاو مافەکا مرۆڤی نییا و پاشێلکاریی مافو مرۆڤین. ئی ئاژەیچە جەلایەنو ئەرەمەرزیا مېیاننەتەوەییەکاوە ئامان ئاراوە. ئۆجالان جە پرسو چارەسەری کوردینە جە تورکیا دەورێوە گرنگ گێڵنۆ. پی مەڵامەتۊ گەرەکما واچو مشۆ دەمودەس ئېژا ئۆجالان ئازاڎ بکریۆ."
'مشۊم دەرفەتە تاریخیەکە بە جدی بوینیۆ'
فابیان مۆلینا جە بەردەوامی قسەکاشەنە ئاماژەش پانەیچ دا ڕابەر ئاپۆ ڕابەرو گەلو کوردین و واتش: "ئېژا ئۆجالان پەی چارەسەری پرسە کراوەکا (پرسیوکورد)ی، پەی دیموکراتیکبیەو دۊڵەتی و گلېرگەی جە تورکیانە پێشنیارو گفتوگۊی و ئەرەنیشتەیش چنی دۊڵەتو تورکیای کەرد. بانگەوازەکەو ئۆجالانی هەم پەی هەرێمەکەی، هەم پەی گلېرگەو تورکیای دەرفەتێوەن ئاشتی و دیموکراسی مارۊنە ئاراوە."
واتیچیش: "پرسو کوردی تا ئیساتۍ چارەسەر نەکریان کە مەڵامەتوو ئێشی سەختی و چڼین قوربانییان. داواو ئاشتی ئېژا ئۆجالانی و گەلو کوردی هەمیشە بە فشارەکاو دۊڵەتو تورکی، پاشێلکەردەی دیموکراسی جە هەرێمەکاو کوردانە ڕووبەڕوو بیەنۆ. ئی ئاژەو ئیساتێچە ئانەش نیشانەدا کە پرسو سیاسەتی بە ڕێبازو فشاری و زۆرداری چارەسەر نمەکریۆ. هەرپۊکەی بە پەیلواو من چارەسەری هەمیشەیی پرسو کوردی ئینا مەسڵەحەتو دۆڵەتو تورکینە."
'ئاشتی هەمیشەیی مشۊم سەرو بنەماو دادپەروەری و دیموکراسی بنیاڎ بنریۆ'
جە دمادمایی قسەکاشەنە فابیان مۆلینا ئاماژەش پانەیچ دا وەڵۍ بانگەوازەکەو ڕابەر ئاپۆینە ئەرکو گلېرگەی مەدەنی جە تورکیا و گلېرگەی مېیاننەتەوەیی ئانەنە کە حکومەتو تورکیای هانی بڎۆ کە پرسەکا بە شێوێوە دادپەروەرانە، ئاشتییانە چارەسەر بکەرۆ و واتش: "ئاشتیێوە هەمیشەیی مشۊم سەرو بنەماو ڕێزگېرتەی جە دادپەرەوەری، دیموکراسی و چارەسەری بنیاڎ بنریۆ. ئېژا ئۆجالان ئانەش نیشانەدا پەی ئاشتی و دیموکراتیکبیەی جە تورکیانە گفتوگۊی دڵسۆزانەش کەرڎەنۆ، پۊکەی مشۊم دەمودەس ئېژا ئۆجالان ئازاڎ بکریۆ.
بەڵام سەرکۊتەی ئی پڕۆسەیە بە گرنگی ئیرادەو گلېرگەو تورکیایۆ بینیان کە دلۍ یۊبیەینە چڼە جە ۋەرا ۋەرو ئا هێزانە مردا کە دژو چارەسەرینۍ. ئەر ئی یۊبیەیە بێنە دی، ڕاگێرتەی جە گفتوگۊی پەی ئاشتی و دیموکراسی سەخت بۆ."
فابیان مۆلینا باسش چانەیچ کەرڎ بانگەوازەکەو ڕابەر ئاپۆی نەک تەنیا پەی تورکیای بەڵکم سەرو گلېرگەی مېیاننەتەوەیچ ۋەرپرسیاری منیۆرە. نەک تەنیا سویسرا بەڵکم گرڎو گلېرگەی مېیاننەتەوەیچ ۋەرپرسیاری ئانەیش سەرا کە داوا جە تورکیای بکەرۆ ۋەرپرسیاری ۋێش جە چوارچێوەو یاسا مېیاننەتەوەییەکانە جابەجێ بکەرۆ.
فابیان مۆلینا ئانەش ئەرەیاۋنا قەرارو یۊبیەو ئۊروپای پەی ئاستەیۆ پەکەکەی جە لیستو 'تیرۆر'ینە بێ مانان و خزمەت پا قەراریە نمەکەرۆ.