فەرمانڎەیی قەرارگەو ناوەنڎیی پارېزنای گەلی (نەپەگە) جە پەیامێوەنە ئەرەیاۋناش، "سەرەتا بە رێز و وەشەویسی و پنەزانایۊ، جە کەسایەتی فەرمانڎۍ گۊرېمانە هەڤاڵ بێرێتانە (گوڵناز کاراتاش) ېنەکە خەتەو مدرامانیش دیاریکەردە، حەرپاسە دما گەشمەرڎا زاپیما هەڤاڵا ژیندار رومەت مەیاسەرۍ و زاگرۆس بەستاینە، یاڎوو گرڎوو گەشمەرڎاما کەرمېوە. ئەرەیاۋنانیچش، " بۆنەو ٣٠ەمین ساڵەو ئەرەمەرزناو سوپاو ئازاڎیی ژەناما (یەژاستار)یۊ جە کەسایەتی هەڤاڵا ژەنېنە، مبارەکبایی جە گرڎوو هەڤاڵا کەرمۍ و هیواو سەرکەوتەیش جە ٣١ەمین ساڵەو کۊشیاینە پۍ موازمۍ".

ئەرەیاۋناکەو فەرمانڎەیی قەرارگەو نەپەگەی پی جۆرەنە:

"١٦و تشرینی یۋەمی جە مېڎانوو مدرامانوو کۆکەڕێ بە رێبازوو جەنگی تیمی پسپۆڕی و تاکتیکی چالاکی گەریلایی هەماهەنگ شمە چالاکی سەرکەوتانەتا ئەنجامدا. سەرکۊتەیۍ گۊرەن کە شمە جە یەرۍ قۆڵېوە بە بەقوەتی جە هێزەکا دوژمنیتا دا. ١٥ ئەرەگیرېتا سزادۍ، ٤ خێمۍ و سەنگەرێوەتا دلېنەبەرڎۍ بە بێ زەرەر، کیشیایدۍ. جە مېڎانېنە کە دوژمن گرڎ ڕووۍ بێ مردای جە ئاسمان و زەمینۊ بۆردومانش کەرۊ و تەکنەلۆجیاو جەنگوو ۋېش چنەشەنە بەکارمارۊ، دایوەنېوە کاریگەری پا جۊرە بەرش وزۊ، کە دوژمن مەتاوۊ، پلانەکا ئەرەگیری ۋېش بیاونۊ بە سەرکەوتەی. سوپاو تورکی ئەرەگیری تا پاگیری کەرۊ سەروو هجومەکاش، بانۍ بە ئامانجوو گەریلای و گورزەش وەرگنۊ.

١٨و تشرینی یۋەمی هامڕېما ژیندارە و زاگرۆس دماو ئانەی چنی دوژمنی تووشوو جەنگی بیۍ، دووۍ ڕووۍ جە ۋەران ۋەروو دوژمنی و تەکنەلۆجیاو دوژمنینە جەنگېوە گرنگی ئیراڎەیشا کەرڎ و بە ئازایەتیۍ گۊرۊ لوۋۍ سەروو دوژمنی، گورزەشا شانا. هەڵوێست و هامڕایاما ژیندارۍ و زاگرۆسیچ فرە گرنگا.

ئا چالاکی و ئیراڎەیەی نیشانەدریان، جوابۍ گرنگا جە ۋەران ۋەروو هجومە ئەرەگیریەکانە کە یەرۍ ساڵېن سەروو هەرێموو زاپی سەرەمڕە بەردەوامېنۍ. جە هەمان وەختەنە مدرامانوو هامڕایا کە ساڵ و نیمېوەن جە مەڕەکا جەنگوو گەشمەرڎە دۆغانی جە مېڎانوو مدرامانوو سیدای نیشانە دریان، فرە گرنگ و تاریخیا. ساڵ و نیمېوەن سوپاو تورکی ئەرەگیری بە فرۆکەی جەنگی، هەلیکۆپتەر، تانک، گرڎ جۆرە چەکێوە قورس، تەقەمەنی قەڎەغە، چەکی کیمیاۋیی، بۆمبی ئەتۆمی تاکتیکی و حەفارە هجوم کەرۊ سەروو ئا سەنگەرەیما، بەڵام نەتاوانش بیاوۊ ئەنجام و مدرامانی ماناڎار هەڵای بە بڕوا و ئیراڎەی گۊرۊ بەردەواما. بێگومان گرنگتەرین مەڵامەت کە دوژمنی بێ ئەنجام کەرۊ؛ پەیوەنڎییەکۍ گەریلای، ئاستی هەنوکەیی رێبازوو جەنگی تازەی و جابەجۍ کەرڎەی ئانەی قەناعەتۍ گۊرەن. پی بۆنۊ سڵام جە هامڕایاما کەرمۍ کە جە مەڕەکا جەنگوو گەشمەرڎە دۆغانینە ۋېراگری کەرا.

هامڕایا قارەمانی؛                                                       

ئێمە مبارەکبایی جە گرڎوو جەنگەوانی و فەرمانڎەکاما کەرمۍ کە بە بڕوا، ئیراڎە، ئازایەتی، ژیری، رەنج و حۊڵدای بێ وچان، پلانەکۍ دوژمنیشا پوچۍ کەرڎېوە و چالاکی سەرکۊتانەشا بەئەنجام یاۋنا. ئێمە جارێوەتەر بە هەستی شۆڕشگێڵنیوە سڵام جە هەڤاڵا جەنگەوانی و فەرمانڎەکا جە هەرێمەکەینە کەرمۍ، وەشەویسی و رێزو ۋېماشا پێشکەش کەرمۍ. ئێمە قەناعەتما پاسەن کە مدرامانتا بە گیانی فیدایی ئاپۆیی سەرکۊتەی گەورەتەر و ئەنجامی بەقوەتتەر خولقنۊ".