دیوانو هامسەرۆکایەتی کۆنگرەو گەلی بۆنەو ٤٦ ـەمین ساڵوەگەڕو ئەرەمەرزنای پەکەکەیۆ ئەرەیاۋنێوەش وەڵاکەرڎۆ. جە ئەرەیاۋناکەینە ئامان، "٤٦ەمین ساڵوەگەڕو ئەرەمەرزناو پەکەکەی وەڵۍ گرڎ چێوێنە جە ڕابەر ئاپۆی، گرڎو ئەنداماو پەکەکەی و پاژکی جە کەشەکانە، زینانەکانە، چوار پارچەو کوردەسانی و جبەرو وڵاتی، بنەیانەو گەشمەرڎا و ۋەرکۆتوو مېیامینی مبارەک مکەرمۍ."

ئەرەیاۋناکەی پی جۆرەنە:

"گەشمەرڎێما کە خاوەنی سەرەکی گرڎو ئا دەسکەوتانۍ کە بە قوربانیدایۍ گەورە و قارەمانیەتیێوە بێ وێنۆ بەدەس ئامان، بە ڕێز و حورمەتۆ یاڎشا مارمێوە، پەی بەدیئامای ئامانجەکاشا قەولما واوەی مکەرمێوە، پەکەکە جە ئەڎابیەی ئازادی کوردەسانین". .وەڵۍ پەکەکەینە گرڎو سەرهۊردایەکا شکسشا ئارڎەبۍ، گەلوو کوردی هیواش جە دەسدابۍ و جە حەقەتینەنە گەلوو کوردی دلێنەشیەبۍ، بەپاو دژمنی 'کوردەسانی خیاڵی جە قەبرەنە ئەسپەرڎە کریابۍ. بە ئەرەکۆشای گۆرەو ئازادی پەکەکەی ڕا جە کۆمکوژی کوردی کریا و پیلانەو دژمنی هۆرشێویاوە.

پەکەکە جە ئەڎابیەو بیەی کوردی ئازادین

پەکەکە بەرهەمو ڕابەر ئاپۆین، جە ئەڎابیەیۆ گەلێوەن کە بیەیش چنە سنیابێوە، داستانو زیڼەبیەیۆ ژیۋای ئازادین. پۊکەی پەکەکە جە ئەڎابیەو بیەی کوردی ئازادین، پەکەکە تاریخو کوردەسانیش سەر جە نۆ زیڼە کەردۆ. بە مڎرامانۍ کە سەرو بنەماو هێزو ۋێش، بڕوا و هیواش پەی گەلی گێڵناوە. شۆڕش بە سەرمەشقایەتی گەریلاکاو هەپەگەی و یەژا ستاری گلێرگێوە دیموکراتیش سەرو بنەماو ئازادی ژەنۍ بنیاڎنیا.

ڕابەر ئاپۆ ئەرەکۆشای ئازادیش کەرڎ بە ئەرەکۆشایۍ مېیاننەتەوەیی

ئا هێزە باڵادەسۍ کە وەڵێکۆتەکۍ ئەرەکۆشای ئازادی کوردەسانیا بە سەرمەشقایەتی پەکەکەی جە هەرێمەکەنە خوڵقنا، بە هەڕەشۍ پیلانگێڵنی مېیاننەتەوەیی دژو ڕابەر ئاپۆی گەرەکشا بۍ ڕا چی پرۆسەیە بگێرا. هێزە هەژموونوازە مېیاننەتەوەییەکۍ پاسە مقارنەشا کەردەبۍ کە جە ڕاو دیل کەردەی جەسەیی ڕابەر ئاپۆیۆ جە زینانو ئیمرالینە متاوا ئەنجامێوە بەدەس بارا بەڵام هێزە هەژموونوازەکۍ چی بوارەنە فرە پنەشا سەیر بۍ. ڕابەر ئاپۆ پەی ژیۋای ئازادی مېیاننەتەوەیی بە پارادایمی نەتەوەیی دیمۆکراتیکی جە دژو پیلانگێڵنی مېیاننەتەوەیی هێزەکاو مۆدێرنیتەی سەرمایەداری کە درێژەشا بە پلانەو سەڎ ساڵەو کۆمکوژی کوردی دێنۍ، ئەرەکۆشایش کەرد و پلانەکاو سیستەمو دەسەڵاتداری شکسش ئارڎ. ڕابەر ئاپۆ کە جە ئیمرالینە بە نەبیەی تەماشە کریۍ، جە ڕاو مانیفێستی ئازادییوە کە جە گرڎو جەهانینە وەڵابیۆ و هیواش بە مرۆڤایەتی بەخشا و ئەرەکۆشای ئازادی گەلوو کوردی کە ڕووبەڕوو کۆمکوژی بیۆ جە سەرانسەرو جەهانینە وەڵا کەردۆ.

سیستەمو دۆڵەتو تورکی یاوان بە ئاستو وڕای

پارادایمو گلېرگەی دیموکراتیکی و ئێکۆلۆژی سەرو بنەماو ئازادی ژەنۍ جە لایەنو گرڎو ناوەندەکا ئازادیوازا جەهانیوە بەتایبەتی ژەنا و جوانا بە دروشمۆو ژەنی، ژیۋای، ئازادی پەسەڼ کریا. هامکات چنی یاڎو ٤٦ساڵۆو ئەرەمەرزنای پەکەکەی، هەڵمەتۊو ئازادی پەی عەبدوڵا ئۆجالانی چارەسەری سیاسی پەی پرسو کوردی جە لایەنو دۆسا ڕابەر ئاپۆی جە سەرانسەرو جەهانینە دەسشپنەکەرڎ، لووا دووەم ساڵۆو ۋێشۆ. ئی هەڵمەتۍ ئازادی جەسەیی ڕابەر ئاپۆی بەرهەم مارۆ، سەدێوە جە نکۆڵی و کۆمکوژی سیستمو دۆڵەتو تورکیش یاونان بە لێوارو وڕای و دلێنەشیەی جە گرڎ لێوە. سیستەمو دۆڵەتو فاشیستی، قڕکەری و ئەرەگیری ئیتر نمەتاوۆ سەرو بنەماو دژایەتی مېیاندەوڵەتی، هەرێمی و سیاسەتو بەرژەوەندی شەخسی ۋێش پارێزنۆ.

پێشئامایەکۍ ۋەرکۆتوو مېیامینی حکومەتو ئاکەپە-مەهەپەیشا تووشو تۆقنای و شپەرزەیی کەردەن

دوکتورینی جەنگو تەکنەلۆجیای کە جە دەیەی ۋېیەردەنە جە لایەنو ڕژێمو دۆڵەتی فاشیستیوە پەی دلێنەبەردەی ئەرەکۆشای ئازادی جابەجێ کریا، جە لایەنو گەریلایۆ بە دوکتورینی جەنگی تازەی هۆرشێویاوە. هەر ۋەرو ئی مەڵامەتیە ​​حکومەت جە سیاسەتەکاو جەنگینە تووشو ئاستەنگیێوە گۆرەی بیەنۆ. دەسەڵاتداری فاشیست ئینا قەیرانو ئابووری و وڕایەنە. فاشیزمو ئاکەپە-مەهەپەی گەرەکشا بە سیاسەتو جەنگی تایبەتی دەسەڵاتو ۋێش پارێزنۆ. قەیرانە گۆرەکۍ دلێینەو تورکیای، کاولکاریە قورسەکۍ جەنگو جەهانی یەرەمی جە ۋەرکۆتوو مېیامینینە و ئا پێشئامایۍ کە بیۍ بە مەڵامەتوو کۆمکوژی، حکومەتو ئاکەپە-مەهەپەیشا تووشو تۆقنای و شپەرزەیی کەرڎەن. پا جۆرەی پلانەو شکسی جە لایەنو گەریلای و گەلەکەیماوە پووچکریاوە، گەرەکشانە بە پلانێوە تازۍ کە سەرو بنەماو فێڵۍ و دروا ئەرەمەرزیان، پرۆسەکە سەرو بنەماو هۆرشێونایۆ ئۆپۆزسیۆنەکا کۆنترۆڵ بکەرا.

نمەتاوا ڕا جە دلێنەشیەو ۋێشا بگێرا

پلانەکۍ پلانێوە قووڵەو حکومەتینە. ئینە پلانێوە جەنگینە کە بە هامبەشی چنی هودا پاری، پەدەکەی و ئەنەکەسەی کە بە کوردۍ براو ۋێشا دلێشانە بەرا، گەرەکشانە جە گرڎ بوارێنە دژ بە ئەرەکۆشای ئازادی جابەجێش بکەرا. ئاڎۍ گەرەکشانە بە نیایرەو قەیومە تازەکا و هرووژمی جۆراوجۆر مېڎانی سیاسی وزارە. ئاماڎەکاری پەی هرووژمکەردەی سەرو ۋەرنیشتی مکەرا. مەبەس چی پلانێشا دلێنەبەردەی یان ڕاگێرتەین جە کوردا ئازادی و زەمینە سازکەردەین پەی جاشە کوردا و هامبەشەکاشا. ئینە پلانەو ئاشتی حکومەتو باغچەلیینە. پېسە چنی تا ئیساتۍ گرڎو پلانەکاش شکسشا ئاورڎەن، ئی پلانە تازێچشا شکس مارۆنە. بەڵام ئینە دما نمایش و چەواشەکەردەیشا بۆنە. فاشیزمو ئاکەپە-مەهەپەی و سیاسەتو هامکاری چنی هامپەیمانەکاشا هەرچێوۍ بۆ، نمەتاوا ۋێشا جە دلێنەشیەی ڕزگار بکەرا.

٤٧ ـەمین ساڵۆو ئەرەکۆشای دەرفەتا پەی فاڕیایۍ گۆرەی

جە ڕوو ئەرەکۊشاو ئێمۆ، ٤٧ـەمین ساڵۊو ئەرەکۊشای پەکەکەی جە گرڎ ڕووێوە دەرفەتێوە گۆرەش پەی فاڕیای کەردەنۆ. چی پرۆسەنە کە ئینایمێش چنە، چنی پەرەپنەدای کاریگەرییەکاش هەڵمەتۆو ئازادی کە جە لایەنو هەمڕاکاماوە دەسشپنەکەردەن، بە گرڎوو هەرەکەتیماوە جەخت سەرو ئازادی جەسەیی ڕابەر ئاپۆی مکەرمێوە. ئازادیی جەسەیی ڕابەر ئاپۆی بە ماناو دمایی ئارڎەی بە سیاسەتو کۆمکوژی کوردی و سەرەتاو پڕۆسەو چارەسەری دیموکراتیکیا. پا بۆنۆ بە بنیاڎنیای گلێرگێوە سەرو بنەماو ڕەهەندەکا نەتەوەی دیموکراتیکی و ژیۋایۆ پارادایمو ئازادی جە گرڎو بوارەکانە سەرنج وزمۍ سەرو پەرەپنەدای پرۆسەو ئازادی جەسەیی ڕابەر ئاپۆی. سەرو ئا بنەمایۍ، جارێوەتەر ٤٦ساڵەو ئەرەمەرزناو پەکەکەی، بەتایبەتی جە ڕابەر ئاپۆی و هەڤاڵە قارەمانەکاما جە کەشی و زینانەکانە، گەلوو کوردەسانی، ۋەرکۆتوو مېیامینی و دۆسا مېیاننەتەوەیما پیرۆز مکەرمۍ و جە ٤٧ـەمین ساڵۆو ئەرەکۆشاینە سەرکۊتەیشا پەی موازمۍ."