پارێزنەر و ئەنداماا ڕێکوزیاو مافوو ئینسانی عەفرین- سوریانە، ئیبراهیم شەیخۊ دەسنیشانش کەرڎ، کە وەڵۍ دەسپەنەکەرڎەی چنیەی زەیتونەکا، عەفریننە دزیەی زەیتوونی و تاڵانکەرڎەی سروشتی ئینا بەرزتەرین ئاستەنە.
کانتۊنوو عەفرینی کە بە زەیتوون نامیەن، دماو ئانەیە مەنتێقەکە دەوڵەتوو ئەرگیروو تورکی گێرت، سەدان هەزار دارۍ زەیتوونی بڕیێ. پارێزنەر و ئەنداموو ڕێکوزیاو مافوو ئینسانی عەفرین-سوریانە، ئیبراهیم شێخۊ، سەبارەت بە تاڵانکارییەکا عەفریننە پەی ئاژانسوو ANFی قسێش کەرڎێ.
شێخۊ ئاماژەش پانەیە کەرڎ، کە ئیساتۍ وەختوو چنیەی زەیتوونین و واتش، " جە سەرەتاە ١٥و تیشرینوو یوەمیوە ئەرەنیشتاو عەفرینی دەست کەرا بە چنیەی زەیتوونی". وەلۍ جە ئەوەڵوو مانگەو ئەیلوولیوە عەرەبە ئامێکۍ و بەکرێگیرێکۍ سەر بە ئەرەگیرکاریی تورکی عەفریننە دەسشا کەرڎەن بە دزیەی زەیتوونی. بە سەدان کەسۍ جە عەرەبە ئامایەکا ڕوانە ملا دلۍ باخوو زەیتوونەکا و دەس کەرا بە دزی و تاڵانی. لێوە تەرۊ بۊنەو قەرارەکاو ئەنجوومەنوو دلێوە، کە چاگە نریێنێرە، باخەوانۍ زەیتوونەکا ڕاشا پەنە نەدریا وەڵۍ ١٥و تیشرینوو یوەمیوە یا ١وو ئی مانگێوە دەس بە چنیەی زەیتوونەکاشا کەرا.
ئیبراهیم شێخۊ ئاخرۊ واتش: مەنتێقەو سیۍ، کە ئینا چێروو دەسەڵاتوو چەتەکاو ئەمشاتینە باجێوە فرە جە خەڵکوو ناوچەکەی ورگیرییۊ. جگە جە باج و سەرانەی، پەی هەر دارێوە زەیتوونی ٣ دۊلارۍ جە خەڵکوو مەنتێقەکەی ورگێرا.
