٣٢ەمین فیستیڤاڵو کولتوری مېیاننەتەوەیی کە گۆرەتەرین مەراسیمو کولتوری کوردان جە ئۆروپا، ئێساڵ بە دروشمەو "گۆشەگیری و ئەرەگیری ماڕمێنە، رابەر ئاپۆی ئازاڎ مکەرمۍ" جە پارکو ڕیبستۆکی فرانکفۆرتی دەسش پنە کەرڎ.
هەزاران کوردۍ ئەرەنیشتۍ ئۆروپای ٣٢ەمین فیستیڤاڵو کولتوری مېیاننەتەوەیی کە گۆرەتەرین مەراسیمو کولتوری کوردان جە ئۆروپا، ئێساڵ بە دروشمەو "گۆشەگیری و ئەرەگیری ماڕمێنە، رابەر ئاپۆی ئازاڎ مکەرمۍ" جە شارو فرانکفۆرتو ئەڵمانیاینە کوۍ بیێوە.
ساڵانە فێستیڤاڵەکە پەی پارێزنای بەها تاریخی و کلتوورییەکا گەلوو کوردی ئەنجام مڎریۆ، دژو فشاری و سیاسەتەکا تاونایۆ دۊڵەتو تورکی سەرو کلتوورو کوردی، بیەن بە سیمبولو مڎرامانی.
هەزاران کەسۍ سەرسەعبو ئارۆی جە وڵاتا ئۆروپایۆ ۋێشا یاونا مېڎانەکە، کورڎەسانیا بە جلوبەرگی نەتەوەیی و هۊرگێرتەی ئاڵاکا یەپەگە/یەپەژەی و یەبەشەی و پەکەکەیۆ جۆشو خرۆشۍ گۊرەشا نیشانەدا.
داواو "ئازادی پەی ڕابەرو گەلوو کوردی عەبدوڵا ئۆجالانی" و درووشمەکا "بژیۋۆ سەرۆک ئاپۆ" و "بێ سەرۆکی ژیۋای نمەبۆ" و "ژەنی، ژیۋای، ئازادی" بەرزۍ کریێوە.
خێرائامایۍ گەرم جە مێزەکا کریا
جە فیستیڤاڵەکەنە ناڕەزایی نیشانەدریا دژو فشارەکا دۆڵەتو تورکی پەی سەر و کلتووریی کوردی و گەلوو کوردی و سیاسەتو قەیومی و قڕکەردەی. هەرپاسە مێزە پەی ئشناسای کلتووری کوردی نریارە و خێرامایۍ گەرم جە مێزەکا کریا.
دۆساو گەلوو کوردی و ڕێکوزیا کلتوورییەکۍ بە ڕەنگەو ۋێشاوە بەشدارۍ فیستیڤاڵەکەی بێنۍ.
مۆسیقای کوردی و هۆرپڕای
چا مێزانە کە جە لایەنو تەڤ-چاندیۆ نریێرە، مۆسیقای کوردی پێشکەشکریا، گرڎ بە هۊرپڕای جۆشێوە گۆرەشا بە فیستیڤاڵەکەی بەخشا.
هەرپاسە نوویسەرا کوردی جە نمایشگاو کتێبینە چنی ۋەنەرا کوۍ بیێوە، چاپخانێوە کوردی مێزێوەش نیارە و کتێبەکێش وستۍ ۋەرو دیدەو ۋەنارا.
خێمۍ "زاوڵەکاما" پەی زاوڵا کریاوە
هەرپاسە خێمۍ و مێزەو "زاوڵەکاما" کریاوە، زاوڵۍ خێرامایۍ گەرمشا جە خێمەکە کەرڎ، چنەشەنە گەمە و چالاکی زاوڵا نیشانە دریا.
مێزەو کۆبانێ
هەرپاسە مێزێوەتەر نریارە، چنەشەنە وێنەو سەڵاحەدین دەمیرتاشی و زیڼانیا تەرو دۆزو کۆبانێ کە جە لایەنو دۆڵەتو تورکیوە گیریێنۍ، هۊرواسیا. مێزەکۍ یۆگێرتەی گەلوو کوردیش چنی سیاسەتمەدارا نیشانەدا.
بەرنامەو فیستیڤاڵەکەی بە سروودەو "ئەی ڕەقیب"ی و دەیەقێوە ڕێزگرتەی جە گەشمەرڎا دەسش پنە کەرڎ.
دماتەر هامسەرۆکا کەجەدەکە-ئە زوبەیدە زومروتە و ئەنگین سەڤەر لوۍ سەرو ستەیجی و سڵامشا ۋنەو گەلی کەرڎ.
زوبەیدە زومروتە سەرنجش وست سەرو هەڵمەتەو ئازادی پەی ڕابەرو گەلوو کوردی عەبدوڵا ئۆجالانی، واتش: "گەلوو کوردی جە گرڎ مېڎانێنە دژو سیاسەتو قڕکەردەی مڎرامان مکەرۆ و ئی مڎرامان و ئەرەکۊشایە، هەڵمەتەو ئازاڎی ڕابەر ئاپۆی میاونۆ بە سەرکۆتەی".
زوبەیدە زومروتە داواو بەشداریکەردەیش جە ڕاپیما و گلێرۆبیەی ١٦ و تشرینو دووەمینە کە شارو کۆڵنینە جە ئەڵمانیا پەی قۆناغەو دووەمو هەڵمەتەو "ئازاڎیی پەی عەبدوڵا ئۆجالانی و چارەسەری سیاسی پەی پەرسو کوردی" ئەنجام مڎریۆ.
ئەنگین سەڤەر ئاماژەش پانەیە کەرڎ کە پیلانگێڵنیی مېیاننەتەوەیی دژو ڕابەرو گەلوو کوردی عەبدوڵا ئۆجالانی جە ڕاو گۆشەگیری و قڕکەردەیۆ بەردەواما، واتش: "دۆڵەتو ئەرەگیرو تورکی بە خیانەتو پەدەکەی و هامکاری داعشی گەرەکشا قڕکەرڎەی جە هەرێمەکاو پارێزنای مەدیاینە ئەنجام بڎۆ. بەڵام ڕۆڵەکاو کوردی جە زاپ و مەتینا و ئاڤاشینەنە مڎرامان مکەرا. ئەرەگیرەکۍ سەرۍ نمەگنا. پەی ئازاڎی ڕابەر ئاپۆی جە گرڎ شۆنۍ ئۆروپای و وڵاتینە ئەرەکۊشای مکریۆ. پی ئەرەکۊشایە ئێمە بەرەو ئیمراڵی ماڕمۍ و ڕابەر ئاپۆی ئازاڎ مکەرمۍ".
بەنامۍ تەژەکە-ئە یۆ ئایدن کاپلان بە زۋانی ئەڵمانی قسێش کەرڎۍ.
فیستیڤاڵەکە بە گۆرانیۍ بەردەوامیش هەن...
