ئەنڎامو دەسەی وېڕاوەبەری کەجەکەی سەبری ئۆک بەشڎاریش جە بەرنامەو تایبەتی ستێرک تی ڤینە کەرڎ و پەرسە گەرمەکۍ ڕۊیش هورسەنگنۍ.

ئۆک ئەرەیاۋناش، هۊرچنیەی تورکیانە رەوایەتیش نەبیەن، جە ڕاو تواناکا و فشارەکا دەوڵەتیوە هۊرچنیېۋە تاک لایەن ئەنجام دریان و ئەرەیاۋناش کە جە هۊرچنیەکانە سەڎان هەزار سوریۍ دەنگشا دا و سەڎان هەزار دەنگۍ هەدەپەیچشا سۊچنۍ و ۋاتش، " جە پەرسو جۊو وەڵۍ هۊرچنیەکانە ۋینیا کە مەهەپە سەڎەنە ٧ و هەدەپە سەڎەنە ١١-١٢و دەنگەکا بەدەس مارا، بەڵام هەدەپە پۍ سەڎەنە ٨ ی و مەهەپە بە فێڵۍ و ساختەکاری یاۋا سەڎەنە ١٠. ئاکەپە و ئەردۆغان ئەرەیاۋناشا کە سەرۍ کۊتېنۍ، بەڵام ئانە راس نییا. بەڵام بە پاو ئەنجامەکاشا ئاکەپە هەمڎیسان بیۊ بە دەسەڵاڎدار.

ئۆک دەورو گەلوو کورڎی و هێزە دیموکراتیکەکاش دژبە گرڎو هجومەکا بەرز نرخنا و ۋاتش، " گەلوو کورڎی چنی هێزەکا دیموکراسی پېۋەرە جمېوە. چۊکشا نەڎارە، جە ئەشکەنجەدای نەسڵەمېوە، کوشتەو بڕیەی ساردۍ نەکەرڎېوە و ئیراڎەو ۋېشا نیشانەدا. جە گرڎ یاگېوەنە بەتایبەتی جە هۊرچنیەو سەرۆککۆمارینە شکسشا بە ئەردۆغانی ئارڎ".

چەمپنەکۊتەکەو سەبری ئۆکی جە ستێرک تی ڤینە پی جۊرەنە:

زیاڎ جە دوۋۍ ساڵان حیچ زانیاریېوە جە بارەو رابەرو گەلوو کورڎی عەبدوڵا ئۆجالانی وەردەس نییا. نۋیسینگەو یاسایی سەڎەی داواش جە سی پی تی کەرڎ کە پۍ دمایی ئارڎەی پی پاشێلکارییە یاساییا ئەرکو ۋېش جابەجۍ کەرۊ. شمە ئی ڕەفتارە نایاسایی و گۆشەگیریەو سەرو عەبدوڵا ئۆجالانی چنی هورسەنگندۍ؟

ئاژەو رابەر ئاپۆی وەردەوام ئینا رۊژەڤ و بەرنامەو پارتەکەیما و گەلەکەیمانە. ئا هێزۍ جە پیلانگېڵیی میان نەتەوەییدا بەشڎاربېنۍ پەیوەنڎییشا بە ئاژەو رابەر ئاپۆی و سیستمو ئیمراڵییوە هەن. مزانمۍ کە ئیمراڵینە حیچ چېۋۍ بە بۍ پلان، بە بۍ ئامانج و جە ۋېشۊ ئەنجام مەڎریۊ. ئامانجو ئاڎیشا ئانەن کە ڕۊ دماو ڕۊی سیستمو ئیمراڵی تنتەر کەراوە. گەمە بە دەرونو گەلوو کورڎی و دۊسەکاش کەرا. گەرەکشانە وابەستەیی بەینو رابەر ئاپۆی و گەلوو کورڎی پڕچنانە. بە زیاتەر کەرڎەو فشارەکاشا سەرو رابەر ئاپۆی حۊل مڎا بیاۋا بە ئامانجەکاشا. ئانەی ئیمراڵینە ڕوۋە مڎۊ، نە جە روو مرۆڤایەتییوە، نە جە روو سیاسیوە و نە جە روو یاساییوە رەوایەتیش نییا. مزانمۍ ئیمراڵینە ئاژېوە ئاسایی بیەیش نیا. پېسە گەلی و پارتیما مافو ئانەیما هەن کە گومانەما چا ئاژەیە بۊ. مزانمۍ کە ئیمڕاڵینە چېش ڕووە مڎۊ، بەڵام مزانمۍ کە مافو ئانەیشا بە رابەر ئاپۆی نەڎان کە جە هەلومەرجۍ مرۆڤایەتینە بژیۋۊ. ئا ئاژە هەم توڕەیی و هەم گومانەکاما زیاتەر کەرۊ.

رابەر ئاپۆ ئەرەگیرا بە عالی مشناسۊ. دوژمن مزانۊ کە قسېوە ڕابەرئاپۆی متاۋۊ چ فاڕیاییۍ وەشکەرۊ. رابەر ئاپۆ ٥٠ ساڵۍ ۋېش بە کۊشیای بەخشان و کەس مەتاۊ پېسە ئینسانېۋە ئاسایی مامەڵەش چنی کەرۊ. دەوڵەتو تورکی پۍ ئانەی حەقە جە رابەرایەتی کەراوە چېشا دەسەنەبۍ مکەراش. جە روو یاساییوە حیچ پاساوۍ پۍ ئا کردەوە نایاساییا نییا. من چنڎین ساڵۍ زینڎانەنە مەنانیۊ، گېرتەکۍ مافو ئانەیشا هەن نامە بنۋیسا، گېرتەکۍ مافشا هەن کە پارێزنەر و خانەواڎەکاشا ۋینا. جە رووە یاساییەکۊ ئا مافە هەن، بەڵام دەوڵەتو تورکی ئا مافیە پاشێل کەرۊ. ڕا مەڎا کە رابەر ئاپۆ چنی پارێزنەرەکاش و خانەواڎەکەیش دیڎار ئەنجام بڎۊ، پېخامش مەیاۋۊ، ئایا ئاڎ چېشش کەرڎەن ' سزاش مڎا؟'. مەڵامەتو ئانەیچ دیارا. وەرو ئانەی ئیمڕاڵینە مدرامان هەن. رابەر ئاپۆ دژوو ئا زوڵمو ستەمەی ۋنەش کریۊ مدرامان کەرۊ. دەوڵەت هەم پۍ ئانەی حەقەش ۋنەکەرۊوە و هەمیچ پۍ ئانەی درێژە بە ستەمەکەیش بڎۊ گۆشەگیریش دژوارتەر کەرڎەن.

وەرو ئانەی مشۊ هەم گەلوو کورڎی، هەم دۊسەکېش، هەم هێزە شۆڕشگېڵەکۍ، سۆسیالیستەکۍ و هەمیچ پارتەکەما ٢٤ سەعاتۍ وەردەوام  شۊنیرەلوای پۍ ئاژەو رابەر ئاپۆی کەرمۍ، پېسە چنی ئەرەگیرەکۍ گۆشەگیری دژوار ڕاوەبەرمکەرا، مشۊ سەری گرڎ چېۋېوە مژاری سەرەکی ئێمە ئازاڎیی جەستەیی رابەر ئاپۆی بۊ. مشۊ ئێمە ئازایانە و بە وەرپرسیاریێوە باڵاوە کۊسیای دژوو ئانەی بە ئەرکو ۋېما بزانمۍ. جە روۋە یاساییەکەیچۊ مشۊ هەم سەرو ئاستو تورکیای و هەم سەرو ئاستی میان نەتەوەیینە مشۊ سەرەمڕەو بۍ مرڎای خەبات کریۊ. گرڎما قەرزارۍ رابەر ئاپۆینمۍ. مشۊ گرڎما ئەرکەکاما بە یاگۍ بیاۋنمۍ و کۊشیای بەگوڕتەر کەرمۍ. جە ئاژېوەنە کە دوژمن مەتاۋۊ ۋېش گېرۊ. تەنیا پی جۊرە متاومۍ داواکاری رابەر ئاپۊی جابەجۍ کەرمۍ. بە قسەکەرڎەی مژارەکە چارەسەر مەبۊ. مشۊ چالاکی رێکوستەی بەقوەت بێنە ئاراوە. کۊشیایما جە ئیسە بەدماوە بەشېۋېوە بەقوەت وەردەوام بۊ.

تورکیا و سەرنیشتەنە مەرحەلەو هۊرچنیەی لوۋا ڕاوە. ئەنجامەکۍ هۊرچنیەی دماو فێڵ و ساختەکارییەکا ئاکەپەی مشۊ چنی هۊرسەنگنایشا پۍ کریۊ؟ ماناو پەیامەکا هۊرچنیە چېشا؟

گرڎ کەسۍ زانۍ کە ئی هۊرچنیەیە هۊرچنیېوە ئاسایی نییا. ئەگەر چی هۊرچنیەنە دەسەڵاتی فاشیستی ئاکەپە-مەهەپە دلېنە شیۍ، جە ئەقڵیەتو دەوڵەتو تورکی ئەرەگیرینە مەڕیایۍ ڕوۋەدۍ. ۋېش جە ۋېشەنە دەسەڵاتیچ پا ئاژەیە زانۍ، وەرو ئانەی گرڎو هێز و تواناو دەوڵەتیشا وست خزمەتو ۋېشا. هۊرچنیەیۍ تاریخی بۍ. بەڵام مشۊ قەبوڵ کریۊ؛ رابەر ئاپۆ ماچۊ، ئاکەپە دەوڵەتا. ئەردۆغانیچ پېسە ئاتاتورکی دوۋەمی پێناسە کەرۊ. ئاتاتورک جە ئەرەمەرزناو دەوڵەتو تورکیاینە دەورش گێڵنا و ئەردۆغانیچ جە سەڎ ساڵی دووەمەنە دەورېوە هامشێوە گېڵنۊ.  جە هەمان وەختەنە دەورو ئەردۆغانی هامشێوەو دەورو هیتلەرین جە جەنگی دوۋەمی جەهانینە. هۊرچنیەی جە ڕاو حکومەتیۊ پا ئەقڵیەتە ئەنجامدریا.

سولەیمان سۆیلو جەبارەو هوداپاریوە دەسەواژەو 'ئەقڵو دەوڵەت'یش بەکارئارڎ. رەوایەتیش پنەدا، بەڵام مزانیۊ کە گەرەکش بۍ واچۊ چېش. جە حیچ ۋڵاتێوە جەهانینە نمونەی چانە بیەیش نییا کە فەرمانڎېوە سوپۍ جە هۊرچنیەینە دەور گېڵنۊ. جە رژێمە کۆلۆنیالیستیەکایچەنە چېۋۍ چا جۊرە بیەیش نییا، بەڵام فەرمانڎەو سوپۍ هەرمانەش پۍ ئاکەپە-مەهەپەی کەرڎ. بەتایبەتی کورڎسانەنە ئانەشا کەرڎ. ئی هۊرچنیە جە بەینو دەوڵەتی و ئەویشا تەرینەبۍ. دەوڵەتیچ ئانەی زانۍ. پېسە واتم ئەگەر ئاکەپە-مەهەپە دۊرنېشا سەڎ ساڵی دوۋەمەنە ئەقڵیەتو ئاڎیشا دلېنەشۍ. پۍ ئانەی ڕاگری چانەی کەرا، گرڎ چېۋېشا کەرڎ. گرڎ نەژاڎپەرسیېشا بەکار ئاورڎ. کورڎو رابەر ئاپۆ و پەکەکەشا کەرڎۍ بە مژاری ئەساسی. پڕوپاگەنڎۍ پا جۆرەشا کەرڎۍ پېسە ئانەی کە هۊرچنیەی جە بەینو دەوڵەتی و گەلوو کورڎینە، یاخوڎ جە بەینو دەوڵەتی و پەکەکەینە کریۊ.

جەبارەو ئەنجامەکاوە متاوو ئینیشا واچو؛ وەڵۍ گرڎ چېۋېنە ئا هۊرچنیەیە رەوایەتیش نەبۍ، پۍ چی؟ وەرو ئانەی جە ڕاو توانا و فشارەکا دەوڵەتیۊ هۊرچنیېوە تاک لایەن بۍ. ئا هۊرچنیە جە یاسا و دیموکراسییوە فر دور بۍ. وەرو ئانەی رەوایەتیش نییا. دوۋەم، وەڵۍ گرڎ چېۋېنە ئاکەپە و ئەردۆغان دۊڕناشا. بەتایبەتی جە هۊرچنیەو سەرۆکایەتی کۆمارینە. پۍ نمونەی سەڎان هەزار پەنابەرۍ سوریۍ دەنگشادا. بەداخەوە مافو دەنگدایشا نەبۍ. سەڎان هەزار دەنگۍ هەدەپەیشا سۊچنۍ و ئا دەنگۍ قەبوڵ نەکریۍ. فرە سەیرا، جە پەرسو جوەکا وەڵۍ هۊرچنیەینە ئانە بەدی کریۍ کە مەهەپە سەڎەنە ٧ و هەدەپە سەڎەنە ١١-١٢و دەنگەکا مسۊگەر کەرا. بەڵام مەهەپەشا کەرڎ بە سەڎەنە ١٠ و هەدەپەیچشا کەرڎ بە سەڎەنە ٨. جە گرڎ یاگېنە بەتایبەتی جە کورڎسانەنە دەنگەکۍ هەدەپەی پۍ مەهەپەی هەژمار کەرڎۍ. ئاکەپە و ئەردۆغان پی جۆرە ئەرەیاۋناشا کە ئاڎۍ سەرکۊتېنۍ، بەڵام ڕاسینە پا جۆرە نییا. بە پاو ئەنجامەکا ئاڎیشا ئاکەپە هەمڎیسان بیۊ بە دەسەڵاڎدار. چېگەنە دەورو گەلوو کورڎی، دەورو دیموکراسیوازەکا و سۊسیالیستەکایچ فرە گرنگا. سەرەڕاو گرڎو هجوم و فشارەکا دەوڵەتیچ فرە گرنگ بۍ مدرامان و هەڵوێسو گەلوو کورڎی چنی هێزەکا دیموکراسی پېۋەرە جمېوە. چۊکشا نەڎارەو نەسڵەمېوە جە ئەشکەنجە و کوشتەی و ئیراڎەو ۋېشا نیشانەدا. جە گرڎ یاگېوەنە بەتایبەتی کورڎسانەنە جە هۊرچنیەی سەرۆکایەتی کۆمارینە شکسشا بە ئەردۆغانی ئارڎ.

پېسە مزاندۍ هەدەپە جە ڕاو پارتو چەپی سەوزیۊ لوۋا دلۍ هۊرچنیەکاوە. دماو هۊرچنیەکا جە مەرحەلەی ئاینڎەنە هەدەپە ئانەش پێ رای گرڎی ئاشکرا کەرڎ و کە چ شێواز و رێبازێوە گېرۊنەوەر. هەدەپە جە لایېوە هەڵمەتەو تازەبیەیشۊ دەسپنەکەرڎەن و جە لایۍ تەرۊ هجومەکۍ سەرو هەدەپەیچ حەتا مۍ دژوارتەرۍ با. شمە نەخشەراو هەدەپەی و ئا هجوما چنی هورسەنگندۍ.

هەدەپە-پارتو چەپی سەوزی چی هۊرچنیەینە خەباتشا کەرڎ و ئەنجامێوەشا بەدەسئارڎ. بەتایبەتی ئاکەپە-مەهەپە، ئانۍ کە دژوو دیموکراتی بیەو تورکیای و دژوو ئیراڎەو گەلوو کورڎینۍ گەرەکشانە ورە وەزنارە. بەڵام پی جۆرە نییا. دەیان سەرۊک شارەوانیۍ هەدەپەی، سەڎان ڕاوەبەر و هەزاران ئەنڎامېشا ئینۍ زینڎانەنە. حەر پارتۍ تەر یاگۍ هەدەپەینە بیۍ، جە مەرحەلېوە پېسە ئی هۊرچنیەینە کەمتەرین دەنگیچ بەدەس نارۍ. بەڵام کولتورێوە هەدەپەی هەن، دەیان ساڵېن قوربانی مڎۊ، رەنج کېشۊ، نەریتێوە پی جۆرەنە. گەلوو کورڎی گەلێوە رێکوزیا و زانان. حەرپۊکەی سەرەڕاو گرڎو هجومەکایچ، پارتو چەپی سەوزی ئەنجامی عالش بەدەسئارڎ. هەڵبەت تاوۍ و پێۋیس بۍ فرە عالتەریچ بۊ. ڕا نەڎا کە هێزە ئەرەگیرەکۍ جە ئاژەو ئی دماییەینە ورە و دڵوەشیش پنەبڕیۊ پۍ ئانەی زیاتەر گەمە بە دەرونو گەلو کورڎی و سیاسەتی دیموکراتیکی نەکەرا. مشۊ وەر پانەی گیریۊ.

 

بێگومان گرڎ پارتێوە دماو هۊرچنیەی وېش هورسەنگنۊ، ئاکەپە جە ئیسەنە دڵ وەشېنۍ، ئیی پارتی و جەهەپە دلۍ ۋېشانە مشتومڕشانە، جە ئیسەنە گفتوگۊکەرڎەی دلۍ هەدەپەیچەنە ئاسایین. سەڎان شەکوۍ سەرو هەدەپەی ئاماڎېکریېنۍ، فشارۍ پی چەشنەیشە سەرا، جە وەران وەرەنە، کۊشیای ملۊ ڕاوە. مەبۊ کەس ئی ئەنجاما بە شکس بزانۊ، مەبۊ گنانە چېرو کاریگەری گەلی و هێزە جیاوازەکا. ڕۆژەڤەکا بەجۆرۍ دەسنیشان کەرا غەڵەت و ڕاسییەکا ۋینا، ئەگەر ئینەی ۋیەرنا، عالتەر ئاماڎۍ با پۍ ئاینڎەی، ئا پەیامایچە کە کیانا هەر پی ئاراستەرە ملا. ئێمە ئی هەڵۋێسەیشا ئەرێنی ۋینمۍ. پەرسو ڕەخنەی و ۋۍ ڕەخنەکەرڎەی و گفتوگۊ گرنگا، ۋۍ ڕېکوستەیۊ و ڕاسکەرڎەیۊ کەمتەرخەمییەکا گرنگا، هەدەپە و پارتو چەپی سەوزی چی مەرحەلەنە مژیۋا، مشۊ چانەی یاۋانە، حەر دەنگێوە هەدەپە و پارتو چەپی سەوزی بەدەسش مارا گرنگا و شکۆدارا، ئی قیمەتە بە ونی و ڕەنج بەدەس ئامان، فرەو کەسی چی بارۊ قسۍ مکەرا، بڕۍ ماچا مەڵامەتەکەش ئانەن کورڎسانەنە قەتیس بیەن، بڕۍ تەر ماچا پۍ چی زیاتەر ڕوۋەش کەرڎەن تورکیای، حەردوۋۍ هەرغەڵەتېنۍ.

ڕوانگەو تورکیای دیموکراتیکی ڕوانگېوە ڕاسا، گەرەکشابۍ چی ڕېوە ئی هەرمانۍ کەرا، هەنگامۍ عالۍ نریۍ. بیەو کەموکوڕی و لاوازی ئاساین، مەبۊ ئینە فرە گۊرە کریۊ، با کەموکوڕییەکا ۋینا، بە تاقېوە تازۊ جوابو مەرحەلەی ئاینڎەی بڎاوە. گرڎ ڕەخنە و وۍ ڕەخنەکەرڎەی و گفتوگۊیۍ مشۊ خزمەت پی ڕاسیە کەرۊ، بڕۍ کەسۍ حیچ وەرپرسیاریۍ جە بەرو ئینەیۊ مەۋینا، هورگېرتەو وەرپرسیاری ئانەن کە؛ ڕۆژەڤو ڕاسی ۋېت هۊرچنە، گفتوگۊی جدی کەرە، هێز بەخشدۍ بە یۊترینی، یۊترینی ناڕەحەت مەکەرڎۍ، خەباتی هەڤاڵێتیتا کەرڎۍ، حیچ جەدەس نەشیەن، ئینە سیاسەت و هۊرچنیەین. ڕاسا ئەنجامی عال بەدەس نامان، بەڵام ئەنجامێوە بەدەسئامان، بڕۍ جە مەڵامەتەکا ئی قۊرتا ئینا بەرو دەسەڵاتیمانە، بڕۍ تەرشا پەیوەسڎېنۍ بە هەدەپەیۊ و پێۋیسشا بە گفتوگۆین. جە گرڎی گرنگتەر یاۋاین بە دەرئەنجامێوە، چنی دەسنیشانکەرڎەی نەخشېوە ڕاسی. ئەرەگیرەکۍ دەسوەردای چی ڕەوشەیە مکەرا و بێمتمانەیی خوڵقنا، ئینە تەرسۍ گۊرېنە، مەڵامەتۍ نیا پۍ ڕوۋەدای ئینەی. ئەنجامێوە عال بەدەس ئامان، کەس تەسلیم نەبیەن، گرڎ مدرامانشا کەرد. پی بۊنۊ، مبارەک بایی جە گرڎی کەرو، هیواو سەرکۊتەیشا پۍ وازو. بەڵام سەرو ئی بنەڕەتەیە مشۊ گفتوگۆی ڕاسەقینە کریۊ، ڕۆژەڤی ڕاس بنریۊرە، هێز بەخشا بە یۊترینی، پینەی یاۋا بە عالتەرین ئەنجام.

یەرۍ هامپەیمانیۍ چی هۊرچنیەینە بەرکۊتۍ، دەوڵەتو تورکی چنی ئی هامپەیمانییا پاش وست سەڎەی دووەمۊ، تورکیا ڕوۋەش ئینا چکۊ و چ ئاینڎېوە چەمەڕاشا؟

ئاشکران دەوڵەو فاشیستی جە سەڎەی دوۋەمەنە گەرەکشا سەرو هەمان ڕیتمی و زیهنیەتی وەڵینی جە دەسەڵاتەنە وەردەوام بۊ. بڕۍ هامپەیمانیۍ بېنۍ، بەڵام تەنیا بەنامۍ بېنۍ، هامپەیمانیی میللەتی بەڕاسی ورشنیاوە، هامپەیمانیۍ سەرو بەها و پرەنسیپی نەمرڎۊ پېسە هامپەیمانیی میللەتی ورشېویۊوە و ئەنجامش مەبۊ. ئی هامپەیمانییە زوۋان و ستراتیجەکەش فاڕا دژ بە ڕابەر ئۆجالانی و تەڤگەرەکەیما و گەلوو کورڎی، بەتایبەت جە هۊرچنیەکا ٢٨ و ئایارینە، مەبۊ ئینسان بەشێۋۍ پراگماتی و تەسکۋینای و دوور جە پرەنسیپی مامەڵە کەرۊ، ئینە نیا ئیسفاڎەو گلېرگەی تورکینە. گرنگترینشا هامپەیمانیی کۆماری ئاکەپەیا، تەماشەو ئەنڎامەکا ئی هامپەیمانییە، حەریۊشا خۊتان ئەرک و دەورېوەن، هامپەیمانییەکە سەرو درێژەدای بە ئەرەگیری مرڎان، سەرو دژایەتیکەرڎەی ئیراڎەو گەلوو کورڎی، هامپەیمانییەکە بەتایبەت سەرو دژایەتی گەلوو کورڎی و پەکەکەی ئەرەمەرزیان، وەرو ئی مەڵامەتیە، دەور دریا بە هوداپاری، دەورو شوناسێوە ئیسلامی_کورڎی، بەڵام جە جەوهەرەنە هامکارو ئاکەپەی فاشیستیا. گەرەکشابۍ ڕا پۍ هوداپاری وەش کەرا، وەڵتەر دەورشا بەخشا بە حزبوڵای، ئیسە ئی دەورە سیاسییە دریان بە هوداپاری. مەجالشا وەردەمو هەدەپەینە وستەرە و هوداپارشا پېسە ئەڵتەرناتیڤی وەڵۍ وست تا کاریگەری کەرا سەرو گلېرگەی کورڎی. بەڵام حۊلەکەشا نەزۊکاو سەرمەگېرۊ و شکس مارۊ، گەلوو کورڎی مزانۊ کۍ خەبات و کۊشیای مکەرۊ پەی بیەی و ئازاڎیی کورڎی، کۍ هەڵای ڕوانە مدرامان مکەرۊ و قوربانی مڎۊ. بێگومان دەوڵەت پی ڕېچە حیچش دەسمەگنۊ. پەدەکە چېگەنە دەورش بۍ. مبارەک بایشا جە ئەردۆگانی کەرڎ، ئی هامپەیمانییە دژوو گەلوو کورڎی پێکئاما، گەلەکەما ئینەی مزانۊ. مشۊ پی جۊرە جواب بڎۊوە و ڕەفتار کەرۊ. جە تاریخی سیاسی دەوڵەتو تورکیاینە، نەریت و کەلتوورو ئۆپۆزیسیۆنی ڕادیکاڵی مە ۋینیۊ جە مېڎانەکەنە دژوو ئەرەگیری و حکومەتی، پەی ورئېزنایۊ گلېرگەی و کۊشیای دیموکراسی پېسە ۋڵاتا تەرینە هەن، نە جەهەپە و نە غەیرو جەهەپەی. سەڎان مەڵامەتۍ هەنۍ پۍ ئاخېزو گلېرگەی، بەڵام بەپێچەوانۊ، دژ بە گلېرگەی مرڎاوە، بیېنۍ بە وەربەس وەردەمو ئۆپۆزیسیۆنی ڕادیکاڵینە، جە ڕاسیینە، خزمەڎ بە دەوڵەتی مکەرا، مەعەل ئەسەف، ئینە ڕاسی سیاسەتو تورکیاین.

درێژەش هەن...

هـ.ش