بەپاو سەرچەمەکا ئاژانسو ڕۆژنیوزی، ڕۆو ٢٠و نۆۋەمبەری، دماو ئانەی گەریلاکۍ ئازادیی چالاکیشا دژ بە سوپاو ئەرەگیرو تورکی ئەنجامدا و ئا دۆڵەتە ئەرەگیرە بۆردوومانو ناوچەکەیش کەرد، چا کاتەنە ئا جوانۍ دەگاو گوهەرزی بە مۆبایلەکاشا دیمەنو بۆمبواران و هرووژمەکەو دۆڵەتو تورکیشا تۆمار کەرڎ.

بە مەڵامەتو ئانەی ئا جوانۍ جە بنکە و بارەگاکا ئەرەگیراوە وینیێنۍ، دەموودەس ئەمرەشا بە چەکڎارا پەدەکەی کەرڎەن کە ئا جوانا باڵبەسۍ بکەرا، دماو ئانەیچ چەکڎارا پەدەکەی هۆرشا کوان سەرو دەگاو گوهەرزی و هەریۆ جە (ئاوار محەمەد تاهیر، ڕێدوور تۆفیق، ئامەد تۆفیق)شا بڕفانێنۍ و ماوەو یەرۍ ڕوا جە ئاسایشو ناوچەو دێرەلووکینە گێرتەخانەنە بیێنۍ و مۆبایلەکێشا چنە هۆرگیریێنۍ.

وەڵتەریچ هەریۆ جە (مەناف نەزمی، خالد نەجیب، ئەحمەد ئیبراهیم، تالب مووسا، هەوار مووسا، ئیبراهیم جبرائیل، بەدەل نوری) بە هەمان مەبەس پەی ماوەو شاش مانگ زینانیی کریێبێنۍ و بەشێوەیچشا ئەشکەنجەی تن دریێبێنۍ.

جە چن ڕۊی ۋېیەردەنە ڕۆژنیوز بە بەڵگە وەڵاش کەردۆ، کە سوپاو ئەرەگیرو تورکی سەرحاڵو وەشکەردەی بارەگای تازەی سەروازییا پەشتەو دەگاو گوهەرزیوە و چەکڎارا پەدەکەیچ ئەرکو چەمڎاریکەردەی حەفارە و کەرەسەکاشا پنە ئەسپاریان، ٢٤ سەعاتێچ چەمڎاری هاموڵاتییا سنوورەکەی مکریۆ.