کۊشیاو ئێشکگېری ئازاڎیی پۍ "عەبدوڵا ئۊجالانی" ماۋەو ٥٥٩ حەفتان جە مەیڎانو ۋەردەمو ئەرەمەرزیەکاو ئۊروپاینە ملۊ ڕاۋە. کۊشیاو ئی حەفتەیە، جە تەرەفو گروپێۋە، کە جە شارو بازلېۊ ئامێنۍ ملۊڕاۋە.

بە دەس ۋەڵۍ وستەی ئازاڎیی پۍ عەبدوڵا ئۊجالانی کۊشیای ئێشکگېری ئازاڎیی جە ٢٥ حوزەیرانو ٢٠١٢ یۊ پۍ بەدیئاورڎەو ئازاڎیی جەستەیی ڕابەر ئاپۊی جە شارو ستراسبۊرگو ۋڵاتو فەرەنسایەنە ملۊ ڕاۋە.

حەر حەفتێۋە گروپۍ جە کورڎەکا ئۊروپای و دۊسەکاشا کۊشیای ئێشکگېری ئازاڎیی ڕاۋەبەر مکەرا و ئی حەفتە گروپێۋە جە شارو بازلو سویسرایۊ لۋێنۍ پۍ ستراسبۊرگی چالاکیەکەشا (کۊشیاکەشا) جە گروپەکەو ۋەڵۍ ۋێشا ھۊرگێرت و دەسشا بە چالاکیەکەی کەرڎ.

بەشڎارا گروپەکەو بازلی چی کەسایەتېا پێکئامێنۍ "دەلېل ئەک، فەرھاڎ ئۊنجول، ئەرداڵ دیلەک، ئارام ئامەڎ''.

دەلېل ئەک بەنامۍ گروپەکەیۊ ئەرەیاۋناش؛ ئێمە بەنامۍ گلێرگەو دیموکراتېکو کورڎی جە بازل کۊشېای ئێشکگېری ئازاڎیی پۍ ئازاڎیی ڕابەر ئاپۊی جە گروپەکەو ۋەڵۍ ۋێما ھۊرگێرتەن و ۋاتش؛ سەرەۋەشی جە خانەواڎەو کەسوکارو ئا کەسا مکەرمۍ، کە جە بومەلەرزەکەنە گېانشا جە دەسدان و ۋاتش:" ئی بومەلەرزە بەرش وست، کە ئەشۊ ئێمەی کورڎ بە گرڎو ھێزو توانایماۋە ۋێماۋە بە ڕێکوستەی کەرمۍ، دامو دەزگاو ئەرەمەرزیۍ ۋێما ۋەشکەرمۍ و خۊتان کەرڎەی جە یۊترینی بکەرمۍ. ئێمە چەمەڕوانی دۊڵەتی کەرمۍ مرمێنەو چێرو دارو پەردوەکانە مەنمۍ جیا، چێرو سەردای و ئاوراینە مرمۍ".

دەلېل ئەک ئەرەیاۋناش، ئاڎۍ ۋەرو ئازاڎکەرڎەو ڕابەر ئاپۊی چالاکی ئێشکگېری ئازاڎیی ڕاۋەبەر کەرا ۋاتش:" ئازاڎیی ڕابەرایەتی، ئازاڎیی گەلو کورڎی و مرۊڤایەتی و گرڎو سروشتیا".

دەلېل ئەک ۋاتش؛ گەرەکمانە بە کۊشیای ئێشکگېری ئازاڎیی بە ڕێکوزیاکاو ئەرەمەرزیاکا نېشانە بڎەیمۍ، کە پارێزنای جە یاساو مافەکا داڎپەروەری و دیموکراسی کەرمێنەو ۋاتش:" ئی کۊشیایە پۍ ئازاڎیی ڕابەرایەتېن، ھەم ئێشکگېری داڎپەروەرین،ھەم پۍ مرۊڤایەتېن، ھەم ۋیژدانا، ھەم ئەخلاقا. ئێمە سەرگنمۍ. ئێمە ١١ ساڵۍ سەرەمڕە بەبۍ مرڎای ۋەردەوامۍ بێنمۍ جە کۊشیای ئێشکگېری و حەتا ڕابەرایەتېما ئازاڎ نەبۊنە، ئێمە ۋەردەوامۍ بیمۍ جە کۊشیاکاما''.

ھ.ش