گەریلاکاو یەژاستاری ئارین جودیە، ئارژین دەستان باکوورە و زین بارانە یاڎوو  فەرمانڎۍ سەرمەشقەو پەکەکەی گۆلناز کارتاش (بێریتان)ېشا کەرڎۊ کە ٣١ ساڵۍ چېوەڵتەر گەشمەرڎۍ بیە. گەریلاکۍ یەژاستاری دەسنیشانشا کەرڎ کە دماو هەنگامە تاریخیەکۍ بێریتانۍ دژوو خیانەتی، سوپاو ژەنا ئەرەمەرزیارە.

یووە چا گەریلایا کە مەڕەکا مدرامانینە جەنگ کەرۊ واتش: هەڤاڵ بێریتانە خەتەو خیانەتیش قبوول نەکەرڎ و دژ بە ئەرەگیری هەلوێستێوە کەرامەتدارانەش نیشانەدا. هەڤاڵ بێریتانە جە دژوو نۆکەرا کورڎی تا دما گولۍ جەنگش کەرڎ و پۍ ئانەی نەگنۊ دەس و نۆکەرا و ئەرەگیرا، وېش سەروو کەشېوو فڕەڎارە واری. ئی چالاکییە کاریگەریېوە گۊرەش وەش کەرڎ و بی بە بناغەو ئەرەمەرزناو سوپاو ژەنا. ئێمە ئیسە جە مەڕەکا جەنگینە سەروو خەتەو هەڤاڵ بێریتانۍ کۊشیەیمۍ. هەڤاڵ بێریتانە بیە بە هامڕۍ گەشمەرڎېما کە ڕاو ئازاڎیش بە ئێمە نیشانەدا. ئێمە تا ئاخر سەروو خەتەو فەرمانڎەکاما بێریتانۍ، دەلال ئامەڎۍ، لەیلا سۆڕخوینۍ و ئاخین گابارۍ بەردەوامۍ بیمۍ جە کۊشش کەرڎەی.

گەریلۍ یەژاستارێ ئارین دەستان باکوورە بە یاڎ کەرڎەیۊ گەشمەرڎە بێریتانۍ دەسش کەرڎ بە قسەکاش و واتش: سوپاو ئێمە کە ئارۊ پۍ گرڎوو ژەنا جەهانی بیەن بە هیوا، دیاری هەڤاڵ بێریتانېن پۍ ئێمە. ئیسە فرېوە جە هەڤالا ژەنۍ جە مەڕەکا جەنگینە، جە سەنگەرەکا جەنگینە سەروو خەتەو هەڤاڵ بێریتانۍ هەنگامە منیا و مدرامان کەرا. ئارۊ گرڎشا پېسە بێریتانېنۍ. گەشمەرڎە بێریتانە جە ۋەران ۋەروو خیانەتینە ۋېش سەروو کەشیۊ وستەرە واری، ئارۊ بە هەزاران ژەنی دژوو خیانەتی کۊشیای کەرا.

گەریلۍ یەژاستاری زین بارانە کە دژوو دوژمنی ئینا سەنگەرەکا مدرامانینە، سەبارەڎ بە گەریلۍ سەرمەشقەو پەکەکەی گەشمەرڎە بێریتانۍ پی جۊرە قسېش کەرڎۍ و واتش: پا ئیراڎەیەی کە هەڤاڵ بێریتانۍ خوڵقناش ئارۊ ئێمە دژ بە دوژمنی جەنگ و مدرامان کەرمۍ. ئەگەر ئارۊ دوژمن مەتاوۊ سەرکەوتەبۊ جە هجومەکاشنە ۋەران ۋەر بە ئێمە، ئانە جە سایەو میڕاتی مدرامانېن کە جە هەڤاڵ بێریتانېوە پېما مەنەنۊ. ئارۊیچ دوژمن داواو ئانەیما ۋنەکەرۊ کە تەسلیمۍ بیمۍ، بەلام حەرپېسە چنی هەڤال بێریتانة بە ماڕای تفەنگەکەیش جواب و دوژمنیش داوە، ئێمەیچ بە هەمان شێوە جوابشا مڎەیمېوە. ئێمە حیچ وەختۍ خیانەت قبووڵ مەکەرمۍ. با دوژمن عال بزانۊ کە ئێمەیچ تا دما نەفەس پېسە هەڤاڵ بێریتانۍ مدرامان کەرمۍ و گیان و وېما فیداو خاکوو مبارەک و کوردسانی کەرمۍ.