گوڵستان کلیچ کۆچیگیتە جە پرێس کۆنفڕانسێوەنە جە پەرلەمانەنە هۆرسەنگنایش پەی چن پەرسێوە گەرموو تورکیای و هرووژمەکا سەرو کرێکارا، فراوانبیەی هەژاری، گەندەڵی جە سەیەو سیاسەتە جەنگەرانەکا ئاکەپە-مەهەپەینە کەرڎ و ئاماژەیچش بە فشارەکا سەرو زیڼانیا سیاسی کەرڎ. هەرپاسە دەربارەو هەوڵەکا ئاکەپە-مەهەپەی پەی هەموارکەردەیۆ دەستوری هەمیشەیی واتش، ئا هەنگامێچە درێژکراوۍ دەستورەکەو کودەتاو ١٢و ئەیلولینە و ئاکەپە-مەهەپە چکۆنە یاسا و دەستور دەردەشا بووەرۆ و مەسڵەحەتشانە بۆ هەرمانەش پنەمکەرا و چکۆیچەنە دژشا بۆ و دەردەشا نەوەرۆ هەرمانەش پنەمەکەراو یاسای پەشتگۆش وزا.

سەردارەو فراکسیۆنو دەم پارتی بەشێوە تەرو قسەکاش پەی گۆشەگیری ئیمراڵی تەرخان کەردۍ و یاڎش ئارڎۆ کە کۆمیتەو وەزیرا ئەنجومەنو ئۆروپای جە بارەو قەرارو پاشێلکاری مافەکاو رابەرو گەلوو کورڎی عەبدوڵا ئۆجالانیۆ کە جە لایەنو دادگاو مافەکا مرۆڤو ئۆروپایۆ بەرشیەبۍ کۆ بۆوە و واتش، "وەزارەتو دادی فرەو وەختی پلانەو چالاکیش ئامادە کەردە، گەڵاڵە و پاکێجی یاسایی و دادوەریش ئارڎ و ئەرەیاۋناش کە 'هیچ سازشێوە ۋەرا ۋەر بە بیەو ئەشکەنجەی نمەکەرا. بەڵام ١٠ ساڵۍ سەرو قەرارو دادگاو مافەکا مرۆڤو ئۆروپایرە ۋییەرڎ و هیچ هەنگامێوەشا نەنیا.  پا گیریشا سەرو یاساو ۋێشا واتە یاساو مەردەی و جە قەنارەدای کەرڎۆ، یاخود جە ئەساسەنە تورکیا ١٠ ساڵێن سەرەمڕە جە قەنارەدای بەکارمارۆ. مشۆم بە دڵنیاییوە ماددەو جە قەنارەدای یاخود ماددەو ٢٥ی جە یاساو سزادای فاڕیۆنە. چا مەجالەنە پێشنیازێوەما ئاراسەو پەرلەمانی کەردەبۍ. ئیساتۍ ژمارێوە فرە زیڼانیۍ هەنۍ کە زیاتەر جە ٢٥ ساڵان ئینۍ زیڼانەنە. یۆ چانیشایچ ئێژا ئۆجالانا و بە فاڕای ئا یاسۍ و هەموارکەردەیۆیش مشۆم جە چوارچێوەو یاساو هیواینە پرۆسەو ئازاڎکەرڎەی مەرجداری دەسپنە بکەرۆ.

پارێزنەرا نامەشا پەی وەزارەتو دادی کیاست. چا نامەنە جارێوەتەر واتشا مشۆم بەڕێز ئۆجالان بتاوۆ مافو دیڎاری بەکاربارۆ. زیاڎ جە هەزار و ٥٠٠ پارێزنەرا و رێکوزیایا بواری یاسایی داواشا کەرڎە کە ئیمراڵینە چەمشا بە ئێژا ئۆجالانی گنۆ و ئانەشا بە وەزارەتو دادی ئەرەیاۋنا. شمە چنەیچ چەمێتا قوچندۍ و گۆشێتا گێردۍ، گرڎو دنیێنە باس جە گۆشەگیری ئیمراڵی مکریۆ. گرڎ کەسۍ مزانۆ کە دژو گۆشەگیری ئیمراڵی جە سەرانسەرو جەهانینە ۋێنیشاندایۍ فرۍ و چالاکیۍ ئەنجام مڎریا. چا نامەیچەنە پارێزنەرا و رێکوزیاکا بوارو یاسای ماچا: 'گۆشەگیری ئیمرالی جە تەمامو دنیێنە شێوازێوە گۆشەگیری تایبەتو جیاکارانەن' یاخود ماچا جە دنیانە هامشێوەش نیا.

گۆشەگیری جە پەرسو چارەسەرکەرڎەی کێشەو کورڎینە جە ڕاو دیموکراتیکی و ئاشتیانەیۆ مژارێوە گرنگا. گۆشەگیری، پەرسو کوردی قورستەر مکەرۆ. دەرفەتو چارەسەری جە بەین مبەرۆ. جیای گۆشەگیری، مشۆم ئەقڵ و هزرو چارەسەری وەڵۍ وزیۆ. وڵات و گەلەکێما ئیسفاڎە چانەی مکەرا. پرسیارە جە دەسەڵاتی مکەرمۍ؛ ئایا مەبەستتا جە درێژەدای بە گۆشەگیری و چارەسەرنەکەردەی چێشا؟ مەگەر تا ئیساتۍ بە گۆشەگیری چێشتا دەسوستەن تا چێگە بەدماوە چێوۍ جیاواز بەدەسباردۍ؟ چا غەڵەتەیە پەشیمانۍ بیدۍ، دەموودەس گۆشەگیری هۆرگێردۍ و بەرەو گفتوگۆی بکەردێوە. ڕاو بەرشیەی جە غەڵەتەکا هەنە؛ ئاڎیچ هۆرگێرتەی گۆشەگیرییا.

مەگەر کاتو ئانەی نامان کە شمە جە دژو حکومەتو ئاکەپەی کە پێوەس بە زیڼانی هەتاهەتایی کە هیچ فاڕیایێش جە یاساکانە نەکەرڎەن، ڕاوجا بگیریۆنە ۋەر؟ بەدەیان ساڵێن قەرارو دادگاو مافەکا مرۆڤو ئەوروپای پاشێل مکەرۆ. مەگەر جە ۋەرا ۋەرو ئانەینە هەنگامەی جدیە هۆرمەگێردۍ؟ مەگەر شمە تاکەی چەمێتا سەرو ئا ئاژەیرە قوجندۍ و تاکەی درێژە پا پیلانگێڵنیە مڎەیدۍ؟ مشۆم ئیتر شمە ڕا نەڎەیدۍ کە مەسڵەحەتی سیاسی دۆڵەتا گنۆ وەڵۍ داواو چارەسەری ئاشتیانەو گەلوو کورڎی و گەلا تورکیای".