هامسەرۊکی گرڎینوو پارتوو یەکسانی و دیموکراسیی گەلا (هەدەپ)ی تونجەر باقرخان و تولای هاتیمئۊگیولاری بە بۊنەو نۊیەم ساڵیاڎوو ١وو تشرینوو دووەم/ نۊڤەمبریوە، ڕۊو جیهانیی کۊبانۍ بە زوانەکاو کوردی، تورکی و عەرەبی ئەرەیاوناێوەشا وەڵا کەرڎۊ.

ئەرەیاونایەکەی پێسنەن:

"مەبارەک بۊ ڕۊو جیهانیی کۊبانۍ، هێماوکۊشیای و ڕۊشنایی!

جە نۊیەم ساڵیاڎنە مەبارەکبایی جە سەرکەوتەی ئینسانیەتی سەروو تارمایی داعشیرە کەرمۍ.

تورکیانە دەسەڵات گەرەکشا جە ڕاو  داڎگاکاو چێروو دەسیشۊ سەرکەوتەی کۊبانۍ، کە کۊشیای و ڕۊشنایی  هامبەشوو ئینسانیەتین دلێنە بەرۊ. ئێمە جارێوە تەر وەعدوو گوڕدای بە کۊشیای پا هامڕایاما مدەیمۍ، کە جە دۊسیەو کۊبانێنە داڎگایی کریا.

مزانمۍ کە ئا هجوومۍ ئارۊ کریا سەروو سەرنیشت و وەرکەوتوو سوریای درێژەو هجوومەکاو داعشینۍ. دەسەڵات گەرەکشا ئامانجوو داعشی بیاونۊ یاگۍ. وەرنیشتنە ژیواێوە هامبەش و دیموکراتیک هەن ئارانە و ئێمە پەشتیوانیی وێما پەی گەلاو وەرنیشتی بەر وزمۍ.  

بە مدرامانوو کۊبانۍ و پەشتیوانیی ئینترناسیۊناڵیستەکاو  گەلاو جیهانی ئارۊما و دماڕۊما ڕۊشن بۊوە. ١وو تشرینوو دووەم/ نۊڤەمبروو ڕۊو جیهانی کۊبانۍ جە تەماموو گەلە چەوسیاواو جیهانی بەتایبەتی گەلوو کوردی مەبارەک بۊ. . #WorldKobaneDay".