هامسەرۊکاو پارتوو یەکسانی و دیموکراسیی گەلا (هەدەپ)ە، تولای هاتیمئۊگیولاری و تونجەر باقرخان بە بۊنەو سەدەم ساڵەو ئەرەمەرزنای کۊماروو تورکیایوە ئەرەیاوناێشا وەڵا کەرڎۊ.

هامسەرۊکاو هەدەپەی واتشا: "وەڵۍ ئانەیەن سەد ساڵۍ تەریچ دەسنە بشۊ و بە فیرۊ بلۊ، پەی ژیوای پێوەرەیی و یەکسانیی گەلا، ئایینەکا، بندەسا و ژیواێوە دیموکراتیکی با پێوەرە کۊمارێوی دیموکراتیک مەرزنمێرە".

هامسەرۊکەکۍ ئانەیچشا واتەن، "دیموکراتیککەرڎەی کۊماری هەرمانۍ تارێخییەمانە، کۊمار سەدێوەش ویەرنا" و پێسە بەرڎەوامۍ بیێ: " چەنی دەسپەنەکەرڎەی دووەم سەد ساڵینە، سەرجەنۊ ئەرەمەرزنایوەی کۊماری دیموکراتیکی پێسە ئەرکێوە تارێخی سەروو شانەیمانە. سەرەکیتەرین کەموکوڵی سەدساڵی یوەمی ئانە بۍ کە جە دیموکراتیکبییەی بێبەش بۍ. کولتوور، ئاین و شناسنامە جیاجیێکۍ سەروو بنەماو هاموەڵاتبییەی یەکسانی بە شێوێوە ئازاد و ڕێزوەنەگیریا فرسەتوو ژیوایشا پەنە نەدریا، ئەقڵیەتی تاکڕەنگ باڵادەس بۍ،  وەروو ئانەیچە پەرسەو کوردی بە شێوێوە دیموکراتیک و ئاشتییانە چارەسەرە نەکریا.

چەنی دەسپەنەکەرڎەی دووەم سەد ساڵەو ئەرەمەرزنای کۊماری دیموکراتیکی کرێڵوو بونیادنیای نەتەوەی دیموکراتیکی و هاموەڵاتیبییەی ئازادین. بەتایبەتی پەرسەو کوردی، گەل و ئایینەکۍ جە ڕاو کۊماری دیموکراتیکیوە چارەسەرۍ کریا. کۊمارێوە کە تورکیانە بە دیموکراسی تاجدار بکریۊ و بنەخشییۊ، فرسەتوو ژیوای ئاشتییانەی بە کورد، تورک، عەرەب، ئەرمەن، یەهودی، فارس، سوریانی و گردوو گەلای تەروو وەرکەوتوو دلێڕاسەی بەخشۊ، پیسە بۊ بە یارڎەیدەروو کێشە تارێخییەکا مەنتێقەکەنە. بەیدۍ جە سەد ساڵی یوەمیوە وانە ورگێرمۍ. وەڵۍ ئانەینە سەدێوە تەریچ  دەسنە بەرپشۊ و بەفیڕۊ بلۊ، پەی ژیواێوە پێوەرەیی و یەکسانیی گەلا، ئایینەکا، چەوسیاوە و بندەسا و ژیواێوە دیموکراتیکی، با پێوە کۊماری دیمکراتیکی مەرزنمێرە".