ئەنڎامەو کۆمیتەو ناوەنڎیی پەکەکەی هێلین ئومیدە ئەرەیاۋناش، کە مشۊم گرڎوو ژەنە گەنجاما ۋێشا بە لایەقوو هەسارە بیەی بزانا؛ مشۊم ئینسان نەتەرس و ئازا بۆ؛ "شۊنما پۍ ئانەیچ کەشەکێنۍ، بە هەسارەبیەی جە ڕاو بەشداری جە یەژاستارینە دەسەبەر بۆ".
ئەنڎامەو کۆمیتەو ناوەنڎیی پەکەکەی هێلین ئومیدە ئەرەیاۋناش، کە ژەنە گەنجەکۍ کوردی بە شێوەو قڕکەردەی جەسڎەیی و بە چنڎین جۆر کۆیلۍ کریا و بە قڕکەردەیرە ویەرا و چا ڕێوە گەرەکشانە چۆک بە گلێرگەو کوردی بڎارە و پی جۆرە بەردەوامە بۍ: "مشۊم گرڎ ژەنێوە گەنجە مردای سەروو ئیراڎەی کەرۆ. ئیراڎەیچ پەیوەس پانەی بۆ بە هێز. هێزبیەی پەیوەسا بە رێکوزیابیەیۆ. رێکوزیابیەی و پارتیببیەی (بە حزب بیەی) پەیوەسا پانەیۆ کە با بە ساحیب و بناغێوە هێقمی. داوا داوا جە گرڎوو ژەنا گەنجی کەرمۍ کە با بە فەلسەفەو رابەر ئاپۆیۆ بژیوا و کۊشیانە".
هێلین ئومیدە رووەش کەردە ژەنە گەنجاو کوردی و واتش، "چی ساڵاو دماییەینە کۊکوشی سەروو ژەنا زیاڎشا کەردەن. بەتایبەتیچ سەروو ژەنە گەنجاوە ڕووەش جە بەرزبیەیۆ کەردەن. جە بەرگی جیاجیانە ئانە کریۆ. پۍ رای گرڎی پێسە قۊمیای و ۋۍ کوشتەی و هتد وەڵا کریاوە. مشۊم چانەی بیاوانە. هەڵبەت جوانە ژەنۍ کوردی بە تایبەت جە ژیۋایشانە تەنیا رووبەڕوو قۊرتەی پا جۆریە مەباوە. ئاڎۍ رووبەڕوو قۊرتەی جددیەو بیەینۍ. مشۊم چا ڕوۆ درکش پنە کریۆ و چنەش بیاوانە. بەڵام ئاخۆ پۍ چی بەتایبەتی جوانە ژەنۍ کوردی رووبەڕوو ئا هجوما کریاوە؟
دەسەڵاڎ رەگەزپەرسی و نەژاڎپەرسیش هەن
سەەتا گەرەکما ئانەی واچوو؛ دەسەڵات و رەگەزپەرسی پێسەنۍ یۊی. سەروو هەمان حەقەتینوو ۋێشا مژیوا. رەگەزپەرسی جە حەر یاگێنە هێز بۆ ئینا قولە پۊپەنە. ۋێش جە ۋێشەنە رەگەزپەرسی جەوهەروو ئایدۆلۆجیاو دەسەڵاڎدارین. جە بنەڕەتەنە نەژاڎپەرسی، خوڎابیەی، هەستوو باڵادەسی و جە وۍ بایی بیەی هەن. چی مەعنێنە ئینە حەقەتینێوەن کە تەمامکەروو یۊترینینۍ. جە کەسایەتی فاشیزموو ئاکەپە-مەهەپەینە هێزێوە هەن رەنگە جە حیچ جوگرافیێوە تەرەنە بیەیش نەبۆ. دەسەڵاتوو پیای گرڎ کایێوەش ئەرەگیرکەردەن. نەک هەر جە وەننگەن و سەروو هەرمانێوە، جە یانەو جە دراماکایچەنە پا جۆرەنە. واتە چا تەلەفون و ئایفۆناوە کە گێراشا دەسۆ وینیۆ. ئانێچ دەسەڵاڎدارێنۍ. بە راسی یاوان قولەپۊپە. متاوو سەروو نەژاڎپەرسی و فاشیزمیچ هەمان ئا چێوا واچوو. نەژاڎپەرسی ئایدۆلۆجیاو دەسەڵاڎدارییا. کەواتە جەوهەروو نەژاڎ پەرسی چێشا؟ پێسە چنی ئایدۆلۆجیاو پیاسالاری باڵادەسی ۋێش سەروو ژەنارە پێسە دماکۊتەی، بێهێزی و لاوازی پێناسە کەرۆ، جە حەقەتینیچەنە نەژاڎپەرستیچ بە هەمان جۊر بنیاڎ نریان. نەژاڎپەرسی ڕاو تاقیکەردەیۆ رەگەزپەرسییا سەروو نەتەوەکارە.
پۍ پەشتڕاسکەردەیۆ گرڎوو ڕاکا تاقی کەرۊوە
پۍ نمونەی نەتەوە دەوڵەتوو تورکی بەتەمامی دەوڵەتێوە پیا سالارا. ئێمە کاروەدای ئانەی جە مامەڵەکەردەینە جە دژوو جوانە ژەناو کوردی وینمۍ. ئایا ئانە چنی بۆ؟ بە تەعبیرێوە تەر، گەرەکشا ژەنی بەسۆوە ۋێشۆ، گەرەکشا چێروو دەسەڵاتوو ۋێشەنە بازۊشۆ. جە هەستەکاشۆ تا ئەندێشەکاش گرڎوو رێبازەکاش تاقیکەردێوە تا بیاوۆ پانەی. پۍ وێنەی دیاردێوە بە نامۍ بایۆدەسەڵاڎداریوە بە گرڎیی سەروو ژەنا کوردیۆ ئەنجام مڎریۆ. پی جۆرەیچە گەرەکشانە نەوەو گلێرگەو کوردی دلێنە بەرا. دەسەڵاڎداری کە حۊڵ مڎۆ جە ڕێوە چەپەڵۆ بەسۊشاوە ۋێشۆ، پۍ ئانەیچە جوانە ژەناو کوردی پێسە ئامرازێوە وینۊ و رووبەڕوو گێچەڵۍ و دەسدرێژیشا کەرۊوە. ئانەی تەنیا بە مانا رەقەکەیش مەواچوو. پۍ نمونەی ئانەی وینمێش ئینۍ وەروو چەماوە. ئانۍ کە مەوینیا تنتەرۍ و بە ئێشتەرێنۍ. ۋەروو ئانەی راسەوخۆ گولانەکەردەیۆیۍ ئینا ئارانە. ئێمە ماچمۍ ژەنێوە گەنجەی کوردە ۋەروو ئانەی کوردەنە رووبەڕوو دەسدرێژی و گێچەڵۍ بۊوە. چێگەنە سەرواز، پۆلیس، کارمەنڎ ۋێشا چنی یاگە گیر کەرا. پی جۆرە حۊڵ مڎا جوانە ژەنا کۆنتڕۆڵ کەرا. جە بەروو ئانەیچۆ جە کوردسانەنە هەستوو جوانە ژەنا کوردی پاوان کریۆ. پی جۆرە گەرەکشانە کە جوانە ژەنۍ کوردی وابەسۍ ئاڎیشا با.
بڕێشا بە جەسڎەیی و بڕێچشا جە روو رۆحیۆ کوشیا
سەروو گرڎوو جوانە ژەنا کوردی بە گرڎ جۆرێوە حۊڵوو وستەی دلۍ داموو سیاسەتوو کۊکوشی ڕاوەبەرکەرا. بڕۍ بە جەسڎەی، بڕێچ بە رۆح کوشیا. بڕێچ ئینۍ چێروو دلێنەبەردەو ئشناسنامەینە. پی مەعنۍ کۊکوشیێوە فرە ۋەرفراوان هەن. ئامانجشا چێشا؟ هەڵبەتە قڕکەردەو کوردی، قڕکەردەو گەلوو کوردیا. پێسە نمونەی متاومۍ باس جە چێوۍ پی جۊرەیە کەرمۍ: بەڵۍ، بە هەمان شێوە گەنجاو کوردی ئینۍ چێروو هجومینە. نەک هەر جوانە ژەنۍ کوردی، ئێمە عال مزانمۍ کە؛ ژەنی بە مەعناو گلێرگەینە. جوانە ژەنۍ بە مەعناو ئاینڎەو کوردسانینۍ، بە تایبەتی وەختۍ مژارەکە بۆ بە جوگرافیاو کوردسانی، دوژمن فرە عال ئینەی مزانۆ. مشۊم جوانە ژەنۍ کوردیچ ئانەی عال بزانا. ئەگەر کوردایەتی بە ئارۆ یاوان، ئانە جە سایەو ژەناوە بیەن. بەتایبەتی ئا ژەنە کوردۍ کە زۋان و کولتوروو کوردیشا بە ئارۆی یاونان، ئیسە حۊڵ مڎا جوانە ژەنا کوردی دلێنەبەرا. پۍ ئانەیچ جە قڕکەردەی جەسڎەییوە گێرە تا وەننگەکاو تورکیای، جە گۊرە شارەکا کوردسانینە ژەنا بەرەو مۆدرنیتەی تورکی هانی مڎریا و ماچا شمە کوردێندۍ، شمە دما کۊتێندۍ، ئەگەر شمە کوردۍ بیدۍ مەتاودۍ حیچ چێوۍ بە دەسباردۍ. ماچا ئەگەر کورد بی تۆ وەشەسیا نیەنی، کولتوری کوردی کولتورێوە دما کۊتەن، جە کوردایەتی دوورش وزاوە و جە ڕاو ئا دووروستەیۊیۆ حۊڵ مڎا ژەنبیەیۍ شێویای پا جۆریە وەشکەرا.
مشۊم عال سیستموو جەنگی تایبەتی بشناسیۆ
جە ئاکامەنە متاوو ئانەی واچوو؛ جوانە ژەنا کوردی بە تایبەتی رووبەڕوو قڕکەردەی جەسڎەیی و بە شێوۍ جیاجیایچ کۆیلۍ کریا و قڕکەردەیشا سەرەرە جابەجێ کریۆ و چا ڕێوە گەرەکشانە چۆک بە گلێرگەو کوردسانی بڎارە و گلێرگە ۋێش بڎۆ دەسۆ. جە حەقەتەنە کوردسانەنە ئاستێوە بەرزی بە سیاسیبیەی هەن. باوەڕ مەکەروو جوانە ژەنا کوردی ناوریۍ و ناهوشیارۍ با، ۋەروو ئانەی دەیان ساڵێن راسی ژەنەی ئازاڎۍ ئینا ئارانە. کۊشیای ژەنۍ ئازاڎیی هەن. سوپاو ژەنا هەنە. فرەو ئا ژەنە گەنجا کە ئیسە تەماشەو ئێمە کەرا، واتە تەماشەو من کەرا، دلۍ ئا کولتورەینە گەورۍ بیۍ. واڵەکێشا پاڵوو ئاڎیشانە ئاما جبەرۆ و بیە بە گەریلا. بە ڕازەکاو گەشمەرڎە سارێوە گۊرۍ بیۍ. چی روۆ بە راسی ئاستی سیاسیبیەی و هوشیاربیەی هەن، بەڵام قۊرتەکۍ چێوە سەرهورمڎا؛ لاوازبیەی ئاستوو هوشیاری هەن.
سەبارەڎ بە ڕاسی دوژمنی ناڕۊشنی هەن. مەبەسم ئانەن دوژمنوو گرڎوو جوانە ژەنا کێن؟ دوژمن چێشا؟ میاچەما دوژمنی جە کوردسانەنە چنینا؟ سەرەتا داواتا ۋنەکەروو ئی دەمامکا بشناسدۍ. هوشیاری گرڎ چێوێن. مرۆڤەکۍ پا جۊرە متاوا بژیوا کە ویرش چنەکەراوە. پا جۊرە مامەڵە کەرا کە زانیارییشا هەن. چی ڕوۆ پێویسا سیستموو جەنگی تایبەتی بە عالی بشناسیۆ. ئەجۊمەنە لاوازیێوە چی بوارەنە هەن. من تەنیا باسوو جوانە ژەنا کوردی مەکەروو، ئەگەر بە گرڎیی جوانە ژەنۍ چی حەقەتینا بیاوانە؛ سیاسەتوو قڕکەردەی سەرشاوە مەلۊڕاوە، ئاژەو ژیۋایشا مەگنۆ چێروو تەرسێوە. مزانا جەنگ کەرا، بەڵام سیستمێوە فریودەر چی بوارەنە ئەرەمەرزیان.
هوشیاری وەسۍ نییا، ڕێکوستەی ئەنەیاوایش پێویسا
داوا جە گرڎوو جوانە ژەنا کەروو وەرمەنە هۊربێزا. مشۊم وریۍ با، چونکی جە وڵاتوو ئێمەنە، چی جوگرافیانە جەنگ هەن، ژیۋایۍ چی جەنگەنە بنیاڎ منیەو، چی جەنگەنە مژیوو، با کەسێوە منش وەش بسیۆ یان تەنانەڎ عاشقش بوو'. داخەم مەشۆ ئێمە جە جوگرافیێوە چانەنە مژیومۍ. چەوەسیایۆ و کۊکوشی واقیعی حکومەتی و دەوڵەتی ئنڎە دڕندانەن کە گرڎ کەسۍ و گرڎ چێوۍ بە ئامانج گێرۆ، بەتایبەتی جوانە ژەنا. کەواتە هوشیاریێوە جددی پێویسا. بێگومان تەنیا هوشیاری وەسۍ نییا. پێویسا بەشدارۍ هەرمانەو ڕێکوستەی با هەتا هۆشیاریشا بەقوەتتەر کەراوە. جوانە ژەنا کوردی قەد مەبۆ بە تەنیا حیچ هەرمانێوە کەرا، پێویسا هەمیشە بە ڕێکوستەیی هەرمانە کەرا. باوەڕیشا بە ۋێشا و جنسوو ۋێشا بۆ. ئا کەسەی کە عالتەر جە ژەنۍ میاوۆنە، جنسوو ۋێشا. هەر پۊکەی مشۆم گرنگی بە هەڤاڵا نزیکیما بڎەیمۍ، پێوەرە خەبات کەرمۍ، پێوەرە هەرمانە کەرمۍ، پێوەرە جە هەماهەنگینە بیمۍ. ئینە مشۊم هەنگامەی دووەمە بۆ. واتە پرۆسێوە بۆ کە هەم پەرە بە هوشیاری مشڎۆ، هەم متاوۆ جە نزیکۆ جنسوو ۋێت بشناسیۆ، حەرپاسە پەرە بە باوڕ و جنسوو ۋێت بڎەی. من باوەڕم بە چێوۍ چانەی هەن.
مشۊم خاوەنداری جە ڕازەو ۋێش کەرۊ و زیاتەر ڕادیکاڵ بۆ
پێویسا گرڎوو جوانە ژەنا ئانەی بزانا؛ چا زنجیرە فیلمە تەلەفزیۆنییانە، جیهانێوە بە ژەنا نیشانە دریۆ کە پیلانە دژوو یۊترینی مجارە، یۊترینی بێ هیوا کەرا، بەردەوام دوژمنایەتی یۊترینی کەرا. سەرەکیتەرین چێو ئانەن کە یۊگێرتەیی جە دنیاو ژەنێنە زاڵا. پۍ نموونەی بە ئاسانی متاوو ئانەی واچوو؛ جە ڕاسینە هەر ژەنێوە بە پاو تەجرووبەو ۋێش زیاتەر هەستیارەنە ۋەران ۋەر بە هەر ژەنێوە بە ویژدانتەرۍ. مشۊم باوڕ پی ڕاسیە کریۆ. ئی ڕازە وەشکریۍ، ئا ناڕاسیۍ کە چا زنجیرە فیلمانە کە پێما وزا ڕووە، پۍ ئانەینە جە یۊیما دوور وزاوە نویسیێنۍ. ئینۍ ئا چیرۆکێنۍ کە گەرەکشانە پا جۊرە ئێمە ملکەچوو سیستمی و دەوڵەتوو پیا سالاری بیمۍ. پۊکەی پێویسا گرڎ ژەنێوە گەنجە خاوەنداری جە ڕازەی حەقەتینەو ۋێش کەرۆ.
بێگومان پێسە خەتەو یەرەمۍ پێویسا ڕادیکاڵتەرۍ با. پێویسا بەشدارۍ چالاکییەکا با. جە شۊنمێوەنە کە جوانە ژەنا چالاکی ئەنجام مڎا، پەی گلێرگەی چالاکیی ئەنجام مڎا. جوانە ژەنۍ مشۊم بزانا کە ساحیب و ئی قوەتینۍ. حەقەتینێوە هەن کە جوانە ژەنۍ فرە زیاتەر جە کوڕە گەنجا سەفەربەرۍ با. پێویسا ئانە بزانیۆ کە سەروو بنەماو وڵاتپارێزنی، سەروو بنەماو ڕزگاری وڵاتێوە ئازاڎیی متاوا کۊکوشی و هجومەکا سەروو جوانە ژەنا دمایی پنە بارا. سەروو ئی بنەمایۍ متاوو واچوو؛ بەڕاسی گرڎوو جوانە ژەنا مشۊم با بە هەسارۍ. پێویسا ئینەی بە لایەقوو ۋێشا بزانا؛ ئازۍ و چەمنەتەرسۍ با. ئا شۊنێچە ئینا کەشەکانە. پا مەعنۍ متاوو بواچوو هەنگامەی بنەڕەتیە پۍ مردنای ئی کۊکوشیا دژوو جوانە ژەنا کوردی، ئینا سەنگەرەکاو کەشینە.
بە هەسارەبیەی تەنیا بە بەشداریکەردەی جە ڕیزەکاو یەژا ستارینە پێکمۍ
پۍ نموونەی ئێمە ئینایمۍ ساڵیاڎوو پیلانگێڵنی میاندەوڵەتینە. جە وەختوو پیلانگێڵنینە ڕابەر ئاپۆ پۍ جوانە ژەنا و گرڎوو ژەنا واتش: "ئەگەر هەر کەسێ دەس جە کەشەکا وەردۆ، ژەنەو کوردی مەبۆ قەد دەس جە کەشەکا وەردۆ' چونکی بوارەکاو ژیۋای و ئازاڎیی ئێمە جە کەشەکاو ئازاڎینە بەدی مۍ. ئا مەنتیقەی کە سیستم و هەژموونوو پیاسالاری دەسش پنەش مەیاوۆ کەشە ئازاڎەکێنۍ. پۊکەی دژوو کۊکوشیا، دژوو ئا کۊکوشیانە کە سەروو جەسڎەیشۆ ئەنجام مڎریا. متاوو واچوو جوانە ژەنا بە بەشداریشا جە کەشەکانە جوابوو کۊکوشی دەسەڵاتی و هجومەکا سەروو کولتووروو ژەنا کوردی بڎاوە. هێزوو پارێزنای سەرەکیمان یەژا ستارا. بە بەشداریکەردەی ڕیزەکا یەژا ستارینە با بە هەسارۍ. فەلسەفەو ڕابەر ئاپۆی فەلسەفەو ئازاڎییا. حیچ ئینسانۍ، حیچ دیاردێوە کە ئازاڎ نەبۆ، مەتاوۆ بەردەوام بۆ جە بیەی و بەقوەت بۆ. ئازاڎیی پەیوەسا بە یاوای بە ئاستێوە ئەخلاقی و سیاسیوە. پی مەعنۍ ڕابەر ئاپۆ ئەخلاقوو ئازاڎییش سەروو بنەماو پەرەپنەدای ئەخلاقوو ژەنۍ حەقەتینۍ ئەرەمەرزنان. پۍ نموونەی نە چەمکوو شەرەفی کە سەروو بنەماو پرەنسیپی باڵادەسی پیای سەرمارە سەپیان و نە چەمکوو ناڕاسی ئازاڎیی مۆدێرنیتەی سەرمایەداری کە مەتاوا ژەنی جە حەقیقەتوو ئازاڎیی دوورە وزۆوە. هەردوویشا کولتوورێوەشا هەن کە پیۍ سەرشارە زاڵێنۍ. بانگەوازوو ڕابەر ئاپۆی پۍ گرڎوو ژەنا و بەتایبەت جوانە ژەنا ئانەن کە ساحیبۍ ۋێشا با. کەرامەتوو بنەڕەتی ژەنۍ بە ۋێشۆ بەراورد کریۆ. جە پیمەرەکا پاژکی و پەکەکەینە ئەنایاوایۍ دروس جە کەرامەتی بیەیش هەن. پا مەعنۍ کە ئی فەلسەفە سەروو بنەماو ئەخلاقوو ئازاڎیی نریانەرە.
بە فەلسەفەو سەرمەشقی رابەر ئاپۆی بژیودۍ و خەبات کەردۍ
بێگومان سیاسی بیەی بە مەعناو بیەو ئیراڎەیا. واتە متاوی ۋێت قەرار بڎەی. ویر کەریوە، دڵنیانا گرڎوو جوانە ژەنا جە قۆناغێوە ژیۋایشانە ئینەشا تەجرووبە کەردەن. برا ٥ ساڵانەکەش متاوۆ قەرار سەروو گرڎوو ژەنە گەنجەکا بڎۆ. گرنگ نییە تەمەنش چنڎا، مەتاوۆ ۋێش قەرار بڎۆ. دەسەڵاتوو سیاسی ژەنێش چنە هورگیریانۆ. یا تاتەش، یا هامژینەکەش، یا جە سیستموو وەشەسیاینە وەشەسیا ساختەکەش بەنامۍ ئاڎێوە قەرار مڎۆ. پۊکەی ژەنی مەتاوا جە واقیعێوە پا جۊرەنە بژیوا. مەتاوا ساحیبۍ ۋێشا با. چی سیستمە سەرمایەدارییەنە، سیستموو شارستانی پیا سالاری زاڵا، سیستمێوە کە بە گرڎوو دەسەڵاتیشۆ بێ ئەخلاقی سەروو ژەنارە سەپنۆ. ناخش جە نەبیەو ئیراڎەیا. پۊکەی پێویسا گرڎ ژەنێوە گەنجە سەرنجش سەروو ئیراڎەو بەقوەتوو ۋێش بۆ. حەرپاسە هێزوو ئیراڎەی بریتییا جە بەقوەت بیەی. هێزوو ڕێکوستەی. ڕێکوستەی و بە پارتی بیەی، گرڎوو ئینیشا پەیوەسێنۍ بە بیەو سەرچەمێوە حێقمی و بە قوەتیۆ. پۊکەی داوا جە گرڎوو جوانە ژەنا کەرمۍ بە پاو فەلسەفەو ڕابەر ئاپۆی بژیوا و دەس بە کۊشیای کەرا."
