هێزە ئەمنییەکاو شاروو هەولێری شەوەو ٢٤و ئاداروو٢٠٢٠ ورشا کوا سەروو یانەو ڕۊنامەنویس و چالاکی مەدەنی هێمن مامەندی، بەبۍ قەرار و بەڵگەو دادگای ئڕفاناشا، سەرباروو گردوو فشار و ناڕەزایەتىیەکا، تا ڕۊو ٧ نیسانوو ٢٠٢٠ زینداننە گیریا، هێمن مامەند یۊن جە ڕۊنامەنویسە دیارەکاو شاروو هەولێری و کورڎسانی، ساڵای وەڵتەرێچ چند جارێوە هێزە ئەمنییەکا  گێرتەبۍ، یا فشارش وزیابۍ سەر. دەسەڵاتوو پەدەکەی: جە پارێزگاروو هەولێریوە پەی پۊلیسوو هەولێری و پەی سەرۊکایەتیى حکومەتوو هەرێمی کەوتۍ دژایەتیکەرڎەی ئا ڕۊنامەنویسەیە، چونکوم بەروو حیزبی و دەسەڵاتوو ئا مەنتێقەیۊ هەرمانە کەرێ.

سەبارەت بە دۊخوو ئازاڎی ڕابەروستەی و دۊخوو ڕۊنامەنویسا و چالاکا مەنتێقەکاو چێروو دەسەڵاتوو پەدەکەینە، هەرپاسە ئا ئەشکەنجە و ئازاری و ستەمەیوە دەسەڵاتوو پەدەکەی وەراوەرش کەرڎەن و هەڵوێستیشا دژ بە ئەرەگیرکاری و وەرتەسککەرڎەیۊ ئازاڎییەکا لاو بنەیانەو بارزانییوە. هێمن مامەند ڕۊنامەنویس و چالاکی مەدەنی و سیاسی، لە چەمپەنەکەوتەێوە تایبەتنە پەی ئاژانسوو هەواڵوو فوراتی (ANF) قسێش کەرڎێ.

 

هێمن مامەند ڕۊنامەنویس و چالاکی مەدەنی کە ماوەو زیاتەر جە ٢٠ ساڵان هەرمانەی ڕۊنامەنویسییە کەرۊ ، گۊڤار،پەلیانە و ڕادوێننە، نامێبریا ئەوەڵۊ چەمپەنەکەوتەکەینە بە ئشناسای وێش دەسش پەنە کەرد.

بۊنەو ئەرەگیرکەرڎەی هەولێریوە ناچار کریانۍ شارەکەیم جیا بازوو

چالاکەکە بۊنەو دۊخی سیاسی و ئەرەگیرکەرڎەی شارەکەی لاو پەدەکەیۊ و دەوڵەتی ئەرەگیرکەروو تورکیایوە  ناچارکریان  هەولێری جیا بازۊ و واتش: "من خەڵکوو هەولێرینا و تاتە و بابام و ئەدام خەڵکوو هەولێرینۍ، وەلۍ چوار ساڵێن بۊنەو بارودۊخی سیاسی و ئەرەگیرکەرڎەی هەولێریوە لاو بنەیانەو بارزانی و دەوڵەتی ئەرەگیرکەروو تورکیوە شاروو سلێمانیینە مژیوو و ناچار کریانا هەولێری جیا بازوو. هەڕەشۍ و گێرتەیەکاو سەروو من و ئازارەکێم کە لاو بنەیانەو بارزانی و ئانیشاوە، کە هامکارۍ یانەو بارزانینۍ فرە فرێنۍ دەیان جارۍ گیریێنمۍ ساڵەو ٢٠١٧ لاو هێزێوە ئەمنیی پەدەکەیۊ ئڕفانیانا و ساڵەو ٢٠١٩ ماوەو حەفتێوە سەروو سکاڵاو مەتین بارزانی برازاو نێچیرڤان بارزانی گیریانا، کە دماتەر سەروو ئی کەیسەیە بە شێوەی غیابی دووۍ ساڵۍ حوکم دریانا."

بۊنەو پەشتیوانیکەرڎەیشاوە، پەدەکە هامڕا و دۊسەکێمش ئازار دێنێ

درێژەو قسەکاشنە سەبارەت بە بەرڎەوامیی پاشێلکارییەکاو وەراوەریش، کە پەدەکەی و بنەیانەو بارزانیی کەرڎێنۍ، هێمن مامەند واتیچش: "ساڵەو ٢٠٢٠ینە نزیکەو دووۍ مانگا زیندانوو پەدەکەی و بنەیانەو بارزانیینە بێنا، ١٢ دۊسیێم هەنۍ کە لاو خودوو مەسرور بارزانی و داواکاری گردینوو ئەنجوومەنی دادوەریی هەولێری و بنەیانەو بارزانییوە، چندین سکاڵۍ تەرۍ لاو وەرپەرساو پارتییوە سەرم تۊمارۍ کریێنۍ و دوۍ کەیسێم  یەکلایۍ بیێنێوە و بە غیابوو چوار ساڵا حوکم دریانا، سزایۍ ماددییەی فرێم دێنە. پەنج کەسۍ کە هامڕۍ و دۊسێمنۍ پێسە هەرمانبەری و پارێزنەری بیێنۍ کەفیلوو دۊسییەکام پاسەیچ سەروو من عەزیەت دریێنۍ و باجێوە ماددیی فرەم دان. ماوەو چوار ساڵان نەتاوانم بلووە هەولێر، کە شاروو تاتەی و بابایا و یادگاریی زارۊڵەییما."

پێسەو هەرێمێوە تورکیای مامەڵە چەنی هەولێری و بادینانی کریۊ

مامەند درێژەو قسەکاشنە باسوو دڕندەیی، گێرتەی و سیاوگیرییەکاو پەدەکەیش کەرد و ئاشکراش کەرد: " ساڵەو ٢٠٢٠ سەعات ٩ شەوۍ هێزێوە فرەی ئەمنی پەدەکەی و بنەیانەو بارزانی ورشا کوا سەروو یانەیم و پەی ماوەو ١٠ ڕوا گیریانێ. دماو وەربییەیم دیدارێوەنە پەی کەناڵێوە ئەرەیاونای، واتم کە بەرڎەوام بوو جە مدرامانی دژوو نادادی و زوڵم و ستەمی و تەنیا دماو ٢٥ سەعاتا دماو قسەکام و سەعات ١:٣٥ سەرسەعبی هێزێوە پەدەکەی و بنەیانەو بارزانی ورشا کوا سەروو یانەیم، وەختێوەنە بە پاو  قەراروو وەزارەتوو دلۍ ماوەی پەنج ساڵان 'نمەبۊ بە حیچ نۊعۍ دماو وەررنیشتی ورکوویۊ سەروو یانەو تۊمەتبارا' وەختێوەنە من ڕۊنامەنویس و چالاکنا، ئانە کە قەت فکرم مەشۊوە  وەختۍ ورشا کوا سەرم عەزیەتوو ئەدێمشا دا و دەسش ئێشش یاوا پەنە و ئیسەیچ پا ئێشێوە مناڵنۊ منیچ بۊنەو ئەرەگیرکەرڎەی شارەکەیمۊ نمەتاوو گێڵووە، چونکوم دەوڵەتی ئەرەگیرکەروو تورکی پێسە شارێوە تورکی تەماشەو هەولێری و بادینانی کەرۊ."

بنەیانەو بارزانیی بیێنۍ بە چەمساقۍ دوژمنا

ڕۊنامەنویسەکە، پێناسێوە بنەیانەو بارزانییش کەرد و واتش: "لاو گرد کەسیوە  ئاشکران کە خێڵەکییێنۍ، باوڕشا بە دیموکراسی و پرەنسیپەکاو ئازاڎیی نییا، پەوکای بنەیانەو بارزانی بە درێژایی تارێخیی پەوکای دوژمنی نیێنێرە دەسەڵاتنە و بە وێسەپنای ئامێنۍ سەروو دەسەڵاتی، دوژمن و ئەرەگیرکەر ئا بنەیانەشە هەرماندارۍ کەرڎێنۍ، کە دۊزی ڕەواو کوردی گول کەرا و دلێشنە بەرا. حەرچندە خێڵەکاو کوردی کۊمەڵێو پرەنسیپۍ جوانێشا هەنۍ، ئەڵام بنەیانەو بارزانی حیچ پێناسێوە ورمەگێرا چونکوم نە دکتاتۊرێنۍ، نە فیوداڵیزمێنۍ، نە ناسوینالیستۍ و نە مارکسیێنێ. پەوکای بنەیانەو بارزانی حیچ پێناسێوە ورمەگێرا، تەنیاا هەرمانەشا بەیاگەیاونای هەرمانەو دوژمنین و خزمەتکارییشانە و ئەرکدارۍ کریێنۍ بەوەی دۊزوو کوردی دلێنە بەرا و گولش کەرانێ."

بنەیانەو بارزانی سەدان چالاکۍ و کەسایەتێشا گەشمەرڎۍ کەرڎێنێ

ئا ڕۊنامەنویسە باسوو تارێخوو کۊکوشییەکاو بنەیانەو بارزانییش کەرد و واتش: "بنەیانەو بارزانی بە درێژایی تارێخی دەیان کۊکوشیێشا کەرڎێنۍ، پێسە گەشمەرڎەکەرڎەی (فاخیر مێرگەسوری، بنەیانەکاو حەمەد ئاغا)ی کۊکوشکەرڎەی گەشمەرڎاو گۊڤاروو وەڵاتی ساڵەو ١٩٩٧کە تا ئیساتۍ جەنازەی مەبارەکوو ئی ڕۊنامەنویسا دیار نییا. دماو ساڵاو نەوەدەکایچ گەشمەردکەرڎەی ڕەئوف ئاکرێی، پارێزنەر نوری لانەکەلی، زەرڎەشت عوسمان، سۊرانی مامەحەمە، وەدات حوسێن، شوکری ڕێکانی و فرۍ تەرێچ بە دەسوو بنەیانەو بارزانی گەشمەرڎۍ کریێنۍ، بە پاو داتاێوە ساڵاو نەوەدەکاوە تا ئیساتۍ زیاتەر جە ٣٠٠ ڕۊنامەنویس و چالاک و پارێزنەرا لاو بنەیانەو بارزانییوە گەشمەرڎۍ کریێنێ."

بنەیانەو بارزانیی کەسە نزیکەکایچشا لێنە بەرڎێنۍ

هێمن مامەند تیشکەش وستە سەروو تەرسەو بنەیانەو بارزانیی جە دلێنە بەرڎەی حەرکەسێوەنە، کە پێسە ئادیشا فکرۍ نەکەرۊوە و تەنانەت دلێنەبەرڎەی کەسە نزیکەکاشا، و واتش: "بە درێژایی تارێخی بنەیانەو بارزانیی هەمیشە ناکۊکۍ بیێنۍ چەنی ئانیشا کە هامفکرێشا نەبیێنێ. پەی نموونەی چەنی کەساو بنەیانەکەیشا پێسە عەبدولمسەور بارزانی و ئەیوب بارزانی و ئیسەیچ ئەدهەم بارزانی مەنتێقەکەش جیا ئاستەن و نمەتاوۊن بگێڵۊوە لاو کەسو کارەکەیش و سلێمانیینە مژیوۊ. پێسە لاتاوە ئاشکران ئیساتێنە ڕوانە مێرگەسوور و بلە و بارزاننە، کوڕەکەو مەسعود بارزانی کە نامێش مستەفان سیاوگیریی کەرۊ و شەوانە دەیان کەسۍ گێرۊ. دیما چند ڕۊی ویەرڎەنە شەوکەت حەسکۊ وەرپرسوو پاسەوانەکاو نێچیرڤان بارزانی دماو دوۍ ساڵا زیندانیکەرڎەی ئاوراێنە کوشتشا، وەفاشا پەی کەسئ نییەنە و حەرکەسێوە هامفکرشا نەبۊ تیرۊرش کەرا و دلێشنە بەرا دەکەن."

سەرتاسەروو عێراقینە تەنیا زیندانەکاو پەدەکەینە ڕۊنامەنویسۍ زیندانیکریۍ هەنێ

هێمن مامەندی ڕۊنامەنویس و چالاک، باسوو خراپیی دۊخوو ڕۊنامەنویساش کەرد لاو پەدەکەیۊ و واتش: "ئیساتێنە موینمۍ سەرتاسەروو عێراقی و هەرێموو کورڎسانینە کۊو ١٨ پارێزگایانە بەداخۊ چوار ڕۊنامەنویسۍ ئینۍ زینداننە کە هامپیشێما (سلێمان ئەحمەد، شێروان شێروانی، گۊهەدار زێباری و قارەمان شوکری)ینۍ زیندانوو پەدەکەینە. هەرپاسە دەیان ڕۊنامەنویسۍ تەرێچ ئاوارۍ و دەربەدەرۍ بیێنۍ، ئینە جگە جە گەنجاو شیلادزۍ کە بە پاو ڕاپەرساێوە تەرسەو هەڕەشا و سیاوگیرییەکاو دەوڵەتی ئەرەگیرکاروو تورکی و بنەیانەو بارزانی و پەدەکەینە، زیاتەر ٨٠٪و گەنجا ئاگەشا جیا ئاستەن."

بنەیانەو بارزانی نمەتاوانۍ دەنگی ناڕازی کپ کەرانێ

ڕۊنامەنویسەکە بەرڎەوامی قسەکاشنە واتش: "چونکوم بنەیانەو بارزانی حیچ پێناسێو ورمەگێرا پەوکای گەرەکشانە پی حکومڕانییە شکسوارڎەیشا خەڵکی بێدەنگۍ با، سەرڎەشت عوسمانشا گەشمەرڎە کەرد ئجیاشا خەڵک بێدەنگ بۊ، ئەڵام ئیساتۍ وەشبەختانە سەدان سەرڎەشت عوسمانۍ هەنی، گەرەکشابۍ شیلادزۍ کپکەراوە بەڵام ئیساتۍ دەیان گەنجۍ تەرۍ  کورڎساننە و ئەورووپانە دەنگی ناڕازینۍ، بنەیانەو بارزانی ئینەشا پەی مەلۊ سەر و ئا کپ و بێدەنگییەو هەولێری و بادینانی ڕوۍ تەقۊوە سەروو بنەیانەیشارە."

دماڕوێوە تاریک چەمەڕوانوو بنەیانەو بازرزانیین

سەبارەت بە فشارەکاو ئازاڎیوازا پەی سەروو دەسەڵاتوو بنەیانەو بارزانی، چالاکەکە واتش: "وەشبەختانە ئیساتۍ چالاکۍ ئەورووپای و دلێشانە (مەکی ئامێدی، قادرنادر) و هامرۍ تەرۍ دۊسیۍ فرە خاسێشا هەنۍ، کە ٣٣٢ لاپەڕێنۍ کە ٢٥ سکاڵێنۍ و دادگاو ئەمریکاینە سەرشا تۊمارۍ کریێنۍ، ئی سکاڵۍ بنەیانەو بارزانییشا فرە نیگەرانۍ کەرڎێنۍ چونکوم مزانا، کە دماڕوۍ تاریک ئینا وەرڎەمشانە، کە ئیتر مەتاوا دەنگوو ئازاڎی کپ کەرا."

مەسروور بارزانی تیرۊرسا

هێمن مامەند ڕۊنامەنویس و چالاک، ئاماژەش پانەیە دا، کە مەسرور بارزانی تیرۊرسا و دەسش جە تیرۊرکەرڎەی ڕۊنامەنویسانە هەن و واتش: "وەشبەختانە چند ڕۊی ویەرڎەنە چەنی هامڕایام شێروان شێروانی پەیوەندییم کەرد و پەوپەڕوو ورەی و ئیرادەیۊ  و وێگێرییوە قسێش کەرڎۍ و دلۍ زیندانینە باسش کەرد کە مەسرور بارزانی تیرۊرسا و واچی دەیان جارۍ زینداننە هاوار کەروو و ماچوو مەسرور بارزانی تیرۊرسا، بەڵۍ مەسرور بارزانی تیرۊرسا و تاوانبارا بە تیرۊرکەرڎەی هامڕا و هامپیشەما سەرڎەشت عوسمانی".

دەزگاو پارێزنای ئینا خزمەتوو ئەرەگیرکەری و بنەیانەو بارزانیینە

ئا ڕۊنامەنویس و چالاکە واتیچش: "ئێمە تەسەورما کەرڎەبۍ، کە چی کابینەنە کابینێوە پۊلیسی بۊ و تروسکایۍ کە پەی دەنگە ئازاڎەکا هەن و ئومێدا مەمەنۊ چونکوم مەسرور بارزانی، کە کوڕوو مەسعود بارزانیین، باوڕیش بە ئازاڎیی نییا و دەزگێوە ئەمنی و هەواڵگێرییوە ئامان، کە دەزگاو ئاژانسوو پارێزناین، کە ئی ئاژانسە ئاژانسێوە حیزبیین و بە هیچ نۊعۍ خزمەتوو خەڵکوو کورڎسانینە نەبییەن و خزمەتوو ئەرەگیرکەری و بنەیانەکەو وێشنە بییەن".

 سنووروو دەسەڵاتوو بنەیانەو بارزانیینە هیچ ئازاڎیێوە نەمەنەن

نامێبریا باسش جە ڕاپۊرتە میاندەوڵەتییەکا کەرد، کە باسوو نەمەنەی ئازاڎیی کەرا، سەیەو حوکمڕانیی بنەیانەو بارزانیینە و واتش: "ئێمە تەسەورما کەرڎەبۍ، کە مەسرور بارزانی بۍ سەروو دەسەڵاتی ئانە دەنگی ئازاڎی کپ بۊ بەداخەوە پاسەیچ بەرشی، ئیساتۍ بە پاو "ڕاپۊرتەو ئەمنیستی میاندەوڵەتی، ڕاپۊرتەو یونامی، ڕاپۊرتەو وەزارەتوو بەروو ئەمریکای، ڕاپۊرتەو هاوسی بەریتانی، ڕاپۊرتەو سەنتەروو میترۊی" بە دەیان ڕاپۊرتۍ تەرۍ ئاشکراشا کەرڎەن، کە چی کابینەنە ئازاڎی ڕابەروستەی و ئازاڎیی هەرمانۍ ڕۊنامەوانیۍ گێڵانۊ خاڵەو سفری، هەولێر و بادینان یاگۍ ئارامۍ نییەنۍ پەی ڕۊنامەنویسا ئینۍ گرد بە ڕاپۊرتە و بەڵگەی دروس ماچاما پەنە، کە بەداخۊ چی کابینەنە ئازاڎیی ڕابەروستەی و  ڕۊنامەگەری بەتایبەتی سنووروو بنەیانەو بارزانیینە گێڵانۊ پەی خاڵەو سفری و حیچ ترووسکێوە ئازاڎیی نەمەنەن".

مشۊم بنەیانەو بارزانی باجوو گردوو تاوانەکاشا بدانێ

هەرپاسە هێمن مامەند، باسوو نزیکبییەیۊ و دماییئامای بنەیانەو بارزانییش کەرد دماو ئانەی، کە دوژمن و ئەرەگیرکەرۍ هەرمانەشا پەنەشا نەمەنە و واتش: "بنەیانەو بارزانی بە دەنگوو خەڵکی نامێنۍ و بە دیموکراسی نامێنۍ سەروو کورسیی دەسەڵاتی، دوژمنی نیێنێرە و هەرمانەش دێنۍ تا کوردی لەکەدار کەرا و دۊزوو کوردی گول کەرا، وەشبەختانە ئیساتۍ دوژمن هەرمانەش پەنە نەمەنێنۍ  و بانقەکاشا بلۊکۍ کەرۊ و چارەنویسشا هەمان چارەنویسوو قەزافی و سەدام حوسێن و دکتاتۊرە دلێنەشییەیەکای تەرین، کە دوژمن و ئەرەگیرکەرۍ هەرمانەشا پەنەشا مەمەنۊ و زەڕەکەیشا بلۊک کەرا و لاشا مدا جە دەسەڵاتی، ئیساتێچ بنەیانەو بارزانی دلۍ وێشانە ناکۊکێنۍ و خاس مزانا، کە ڕوۍ سیاو چەمەڕوانیشا کەرۊ و مشۊم  باجوو ئی تاوانا بدا کوشتەی، تاڵانکەرڎەی سامانوو وەڵاتئ، ئارڎەی ئەرەگیرکەرا و بنیادنیای ٨٤ بنکە و سەروازگە و دەوڵەتی ئەرەگیرکەروو تورکی سایۍ بنەیانەو بارزانیینە ئیساتێنە دلۍ خاکوو کورڎسانینە هەولێرنە و بادیناننە بنکێشا هەنێ".

"هەڕە سەرەو ئا دوژمنیرە هومێدش بە بەندیخانەین"

ئا ڕۊنامەنویس و چالاکە باسوو بێکاریگەریی زیندانیکەرڎەیش کەرد سەروو ئازاڎیوازا و واتش: "قانعی شاعیر ماچۊ "هەڕە سەرەو ئا دوژمنەیرە، کە هومێدش بە بەندیخانەین"، ئێمە نموونێمان فرێنۍ بەڕێز ڕابەر ئۊجەلان ٢٥ ساڵێن ئینا زینداننە بەڵام تاوانش زینداننە ١٠ هەزار لاپەلۍ بنویسۊ و تاوانش  پەنج بەرگۍ مانیفێست و وەرگێرینامە بنویسۊ و زینداننە دروشموو "ژەنی، ژیوای، ئازاڎی"یش  ساڵەو ٢٠١٣باس کەرد و ٢٠٢٢ دماو نۊ ساڵا وینمۍ وەرکەوتوو کورڎسانینە و گردوو  جیهانینە بە زوانە جیاوازەکا شانازیی کەرا بە دروشموو "ژەنی، ژیوای، ئازاڎی"یوە.

ئایندێوە نزیکەنە گردما ئازاڎۍ بیمێ

ئینجا نامێبریا بەگەشوینیوە باسوو قۊناغوو دماو نەمەنەی بنەیانەو بارزانییش کەرد و واتش: "بنەیانەو بارزانی کە ئیسە زیندانێوە گەورەشا وەشکەرڎەن ناوچەکانی مەنتێقەکاو چێروو دەسەڵاتیشانە، پێسە شێروان شێروانیی پەیوەندییە تەلەفۊنییەکەشنە پەنەش واتا 'حیچ عارەزووێم نییا بەو بەروو زیندانی چونکە من بە فکر ئازاڎنا، بەر زیندانێوە گەورەن"، کە بنەیانەو بارزانیی بە هامکاریی دەوڵەتی ئەرەگیرکاروو تورکیای وەششا کەرڎەن مەمەنۆ و ئایندێوە نزیکەنە هەرێموو کوردسانی و خەڵکوو کوردسانی گردما ئازادێ بیمێ." 

هەرمانە کەرمۍ پەی بڕیەی دەسوو ئەرەگیرکەرا خاکەکەمانە

ئاخروو قسەکاشنە، هێمن مامەند ڕۊنامەنویس و چالاکی مەدەنی و سیاسی، پەی ئاژانسوو هەواڵوو فورات (ANF)ی واتش: "هەمیشە زیندان یاگۍ قارەمانا و ئانیشان کە جوان ویرۍ کەراوە، بەدڵنیاییوە هامڕێما بە سەرەبەرزی و بە ئەزموونێوە تازە و بە مدرامانێوە مۊدێرنەتەر زینداننە مەیا بەرۊ و خەباتوو وێما کەرمۍ پەی ناستەی دەسوو ئەرەگیرکەری خاکەکەمانە و پەی پێوەژیواێوە جوانی و کورڎسانێوە جوانی و ئازاڎی، دماجار ئازاڎیی سەرگنۊ".