جە ئیسەنە هەورامان هیچش پەی واتەی نییا، ئانەی هەنش قسەکەردەی و ژاوەژاوا، حەر ئینەیچەنە پاسەش کەردەن باسوو ویەردە و وێما کەرمێ، تاوو واچوو ئێمەی هەورامی جە ئیسەنە کۆسێنمێ و باسوو ڕیشو بابایما کەرمێ و فەخرش پۆوە کەرمێ.

باسکەردەی جە ویەردەی ئەگەر نەلۆ دلێ فەلسەفەو تارێخیوە بێجگە کاوێژکەردەی مەتاوی حیچ نامێوە تەرەش بنیەی،

قسەکەردەی ژاوەژاو درووس کەرۆ، واتەیچ مانا پەی قەزیەکێ گێڵنۆوە، ئانەی جە ئیسەنە هەورامییەکێ پۆشۆ خجڵیێنێ بێجگە قسەکەردەی حیچی تەر نیا، چوون قسەکەردەی هیچ ئەنجامێوە ڕاسینەش چەنە مەگنۆوە. دلێ قسەکەردەینە گرد کەسێ قسێ کەرۆ گۆشگیرت نیا، گرد کەسێ ڕێسای ڕێسۆ، قسەکەردەیچ فەلاقەو مەژگیت کەرۆ. دلێ مەجلیسوو ئیسەو هەورامییەکانە کاتێ قسێ سەروو هەورامانی کەرا، دمایی بزیەرە حۆلت کەرا و ئەجۆ تەوەرگێ کوانی.

تاوی واچی هەورامیی ئیسەی فرە دوۆ، ئەجۆ دووکەنە، پەی ئانەی ئی کاوێژ و ڕێستەیە جیا بازمێ ئەشۆم قسەکەردەی فاڕمێ بە واتەی.

واتەی جۆرێ جە پەیام و گوتاریش چەنەن مانا پەی ئا چێوی گێڵنۆوە، هەکە هەورامییەکێ بییەن بابەت لاشاوە، چی وەختەنە واتەی هەورامانەنە نییا، ئەننا چێوێ ڕووە دێ هەورامانی جە ڕووە کولتووری و شارستانیەتەکەیۆ وزێ وەڵێ و جە قۆناغەو مردایۆ واڕێشۆ پەی قۆناغێوە تەری.

یۆ چا کێشا هەکە هەنێ پاسەش کەردەن هەورامان ویەردەیش ژاۆوە ئانەن ئا کەسێ هەکە بیێنێ دەمڕاسش، قسەکەرێنێ تەنیا دڵسۆزی و عونسووریەتی هانی دێنێ خجڵیا هەورامانیوە، جە وەختێنە فکر و ویرۆکەردەی تاوۆ هەورامانی ڕزگار کەرۆ ئینەیچ جە ئیسەو هەورامانینە نیا.

ویرۆکەردەی واتەیش چەنە گنۆوە، هەستوسۆزیچ تەنیا قسێش چەنە گناوە، زوانیچ دلێ قسەکەردەینە هیچش نیا واچۆش تەنیا ژاوەژاوێوە دروس کەرۆ.

نویستەی: ئاراس ڕەفێق

س.ز