حوسییەکێ دەینوو هجوومێوە تەریشا گێرت گەردەن
حوسییەکاو یەمەنی واتشا، کەنداوو عەدەنینە دژوو کەشتیێوە بەریتانی هجوومشا کەردەن. هەرپاسە یۆبییەی ئەورووپای واتشا، کە بەحری سوورنە دەسشا بە 'هەرمانەو پارێزنای' کەردەن.
یەحیا ساری قسەکەری سەروازیی حوسییەک بەیاننامێوەنە ئەرەیاوناش، کە سەرهەڵدێرەکاو یەمەنیش بە مووشەکی بەحریی کەشتییە بەریتانیەکەیشا بە نامێ ڕوبیماریوە کەنداوو عەدەنینە کەردێنێ ئامانج.
کەشتییەکە ئیماراتی یۆگێرتەو عەرەبییوە بەرەو سەرنیشت لوێ و قەراربێ بیاوۆ شاروو ڤارنای بولگاریانە.
حوسییەکێ وەڵاشا کەردەنۆ "مەجالشا دان کارمەنداو کەشتییەکەی بە سڵامەت دوورێ گناوە".
قسەکەری سەروازیی حوسییەکا ئەرەیاوناش، کە کەشتییەکە "زەرەرێوە فرە"ش وەرکەوتەن و ڕووبەڕوو نوقمبییەی بۆوە کەنداوو عەدەنینە.
حوسییەکێ کە مەنتێقێ وەرفراوانوو یەمەنیشا ئینا دەسۆ، بانگەشەو ئانەیە کەرا کە ئی هجوومی پەی پەشتیوانی وەنەو فەلەستینییەکا کریۆ.
چی بەینەنە سەرۆکوو کۆمیسیۆنوو ئەورووپای ڕۆو دووەشەممەی بەیاننامێونە واتش، کە بۆنەو هجووموو حوسییەکاوە، یۆبییەی ئەورووپای بەڕسمی هەرمانەو پارێزنای هاموشۆوی بەحری، بەحری سوورنە گێرتەن گەردەن.
