ئەرەیاوناێوی هامبەشەنە دژوو ئەرەگیرکارییەکاو دەوڵەتی ئەرەگیرکەروو تورکی سەروو خاکوو پانیشتوو  کوردستانیوە؛ ژمارێوە شێخێ هۆزەكاو عێراقی هجوومەکاو دەوڵەتوو توركی ئەرەگیرکەری پەی سەروو خاكوو هەرێموو كوردستانیشا ئیدانە كەرد و واتشا: دەوڵەتوو توركی هەرێموو كوردستانی ئەرەگیر مکەرۆ و پەشتیوانیی وەنەو داعشی مکەرۆ، هاموەخت ستایشوو پەکەکەیشا كەرد و جەختشا كەردۆ، كە دژوو چەتەکاو داعشی مدرانۆ.

حەر لە ئەرەیاونایەکەینە باس جە ئامانجوو سوپای ئەرەگیرکەرەو تورکی مکەرۆ و ئانە ئامان: "دەوڵەتی ئەرەگیركەروو توركی بەردەواما جە هجوومە سیستماتیكییەكا پەی سەروو خەڵكی هەرێموو كوردستانوو عێراقینە، بە ئامانجوو چۆڵكەردەی دەگا و شارەكا و سۆچنایشا، هەرپاسە هەڕەشێ وەنەو  ئەرەنیشتاو دەگایەکا مکەرۆ، تا یانە و مڵکوو وێشا جیا بازانە و مەنتێقەکەی بکەرانە بە مەنتێقێوی سەروازیی بە بەهانێ ناڕەوێ."

'پەکەکە جەنگوو داعشی و تیرۆریش کەرد'

 درێژەو ئەرەیاونایەکەینە هۆزەکاو عێراقی ستایشوو کۆشیای پەکەکەی مکەرانە جەنگوو دژ بە داعشینە و واتەنشا: "ئێمە فرە خاس مزانمێ پەکەکە جەنگوو تیرۆری و داعشی کەرێنێ، بەڵام توركیا پاڵپەشتیی داعشی کەرێ، گردوو ئا هەرماناو دەوڵەتی ئەرەگیركەروو توركی مکەرۆشا، تەنیا بە ئامانجوو هجوومکەردەی سەروو گەلاو عێراقی بەگردی و كوردی بەتایبەتی، بە ئامانجوو ئەرەگیركەردەی مەنتێقەکاو هەرێمی."

ئەرەیاونایەکەینە وزیان ڕووە، کە دەوڵەتوو تورکی ئەرەگیرکەری تاوانوو جەنگی وەراوەروو خەڵکی و ژیوگەی مکەرۆ و ئەرەیاونانیچشا: "ئی هجوومێ زیادێ مبانە پەی ئاستوو تاوانوو جەنگی، كە ئینسانبیەی و سرووشتی تێك مدانە، گردوو ئی تاوانە دڕندانایچە بیێنێ بایسوو وێرانكاریێوی گەورەو ژیوگەی و جوگرافیاو هەرێموو كوردستانوو عێراقی، وەراوەریچەنە پەدەكە هامبەشا و حكومەتوو بەغدایچ بێدەنگەن، بێدەنگیێوی گوماناوی سەبارەت بە تاوانەكاو دەوڵەتی ئەرەگیركەروو توركی وەش مکەرۆ. پێویسا گلێرگەی میاندەوڵەتی و حكومەتوو بەغدای ڕاوشۆنی پێویس بگێرانێنە وەر و ڕاگێریی چی هجوومە بەربەرییە پەی سەرووخاكی و گەلەكەیما بگێرانە، ئێمەیچ ئامادێنمێ وەرگێریی جە سەروەریی عێراقی بكەرمێ، بەپێچەوانەو ئانەیوە دەوڵەتی ئەرەگیركەروو توركی ویرێش چەنە مکەرۆوە، سەبارەت بە فاڕیای دیمۆگرافی و تاڵانكەردەی سامانوو عێراقی."

 ئاخرۆ ئا هۆزێ جگە جە شەرمەزارکەردەی هجوومەکا، هامسۆزیی وێشا پەی گەلوو پانیشتوو کوردستانی بەربوزانە و بانگەوازوو بەروستەی هەڵوێستی مکەرانە و ماچا: "ئێمە جە شێخ و عەشیرەت و كەسایەتییەكاو عێراقی، ئی هجوومە  سیستماتیكییا ڕەت مکەرمێوە، بانگەوازیچ وەنەو گلێرگەی میاندەوڵەتی و حكومەتوو بەغدای و پەرلەمانوو عێراقی مکەرمێ، كە وەرپەرسیی مرۆیی و ئەخلاقی و یاسایی وێشا سەبارەت پی تاوانە نائینسانا و دماییئاردەی پی هجوومە بەردەواما دەوڵەتی ئەرەگیركەروو توركی بگێرانە گەردەن."

نامێ ئا شێخا دژوو ئەرەگیرکارییەکاو دەوڵەتوو تورکی مدرێنێوە: 

            شێخ تەکلیف ئال عەبدعەلی جبوور، شێخی گردینوو عەشیرەتوو جبووری.

            سەید ئەحمەد عەلەوی حەیدەری، شێخی گردینوو ساداتی حەیدەری.

            سەید نازم شەریفی، شێخوو ساداتوو شرفە فوراتی دلێڕاسینەنە.

            شێخ مالک جاسم عیفاری، شێخوو عیفاری فوراتی دلێڕاسینەنە.

            سەید خەزعەلی عەتییە موسەویی دیوانییەنە.

            شێخ زەهیر کازم مەرهوون، شێخی گردینوو کەریتی.

            شێخ جەمال فەرید حەمیداوی، شێخی گردینوو حەمیداتی.

            شێخ ئەمیر موسەنا حسناوی، شێخی گردینوو بەنی حەسەنی.

            شێخ موحان میریی ئال عەتییە، شێخی گردینوو ئال شبلی.

            سەید حسێن بەرەکات شامی، شێخی گردینوو ساداتوو غەوالبی.

            شێخ متعب محەممەد شەمەری، شێخوو عەشایەرەکاو شەمەری فوراتی دلێڕاسینەنە.

            شێخ محەممەد عەبدولئەمیر شەعلان کەرعاوی، شێخی گردینووعەشایەرەکاو ئەکرەعی.

            شێخ ڕەعد حسێن خەفاجی، شێخوو خەفاجییەکا نەجەفی.

            شێخ خالد جاهل ناتوور، شێخوو بنەیانەو شەبەلی دیوانییەنە.

            سەید حەمید مەرزوک عەبادی، شێخی گردینوو عەوابدی.