ئارۆ جە قەزاو کەلارینە جە مېیانو ئیدارەو گەرمیانی پرۆسەو دەنگدای تایبەتی دەسش پنەکەرڎ، جە چوار بنکێنە پڕۆسەو هۆرچنیەی ملۆڕاوە کە ٤٢٦١ کەسۍ مافو دەنگدایشا هەن.

سەعات ٧و سەرسەعبو ئارۆی جە قەزاو کەلارینە پڕۆسەو دەنگدای تایبەتی دەسش پنەکەرد، هامشێوەو گرڎو شار و ناوچەکا هەرێموو کوردەسانی، چێرو چەمڎاری کۆمیسیۆنو باڵاو سەربەخۆو هۆرچنیەکا عێراقینە  پڕۆسەکە بە شێوێوە عال ملۆڕاوە.

هامکات نوێنەرو گرڎو لایەنە سیاسییەکا چەمڎاری پڕۆسەکەی مکەرا، دەنگدەدارا هێزە تایبەتەکا بە گەرمو گوڕیۆ بەشداری هۆرچنیەکەی مکەرا.

قەرارا دەنگدای تایبەت تا سەعات ٦:٠٠ و وێرەگای بەردەوام بۆ. نزیکەو ٢١٦ هەزار کەسا جە سەران سەرو هەرێمینە، کە مکەرۆ رێژەو٧.٤٪و کۆو دەنگدەرا مافو بەشداریشا جە دەنگدای تایبەتەنە هەن.

رۆو یەکشەممەی ٢٠و ئارگای(ئۆکتۆبەر)ی پرۆسەو دەنگدای گرڎیی ملۆڕاوە و بە گرڎی ٢ ملیۆنۍ و ٢٠٨ هەزارۍ و ١١٥ دەنگدەرۍ مافو بەشداریشا جە پرۆسەکەنە هەن.