جە شارو دیواندەرەی سەر بە پارێزگاو سنەی،  چوارەمین ئەرمانگاو ”دەسنۋیسۍ زۋانو هۆرامیۍ“ ساز کریاوە. ئەرمانگاکە جە کتێبخانەو گردینو شارەکەیەنە بەرپا کریان و تا رۊو جەمە (هەینی) ئایندەی پەی حەزکەراو زۋان و تاریخو هەورامانی کریانەوە.
ئەرمانگاکە کە جەلاو شیوا محەمەدی-ێوە سەرپەرشتی مکریۆنە، زیاتەر جە ٣٠٠ نوسخۍ و ۋێنۍ تاریخیۍ گرنگۍ زۋان و ئەدەبیات و ژیۋای چینە،جیاۋازەکانو مەردومی، جەوێش گێرۆنە.
نوسخە دەسنۋیسەکۍ و هەرپاسە ۋێنەکۍ جە ئەرشیفی کەسیی، بنکەو ژینی جە پانیشتو کوردستانی، کتێبخانەکۍ ئێران، ئاڵمان، تورکیا، دانیمارک و بەریتانیای بەدەس وزیێنۍ.
وەڵتەر ئەرمانگاکە جە زانشتگاو تارانی، زانشتگاو کوردستانی و تەلارو ئاسف دیوانی جە سنە ساز کریابۍ.