کەجەکە بە ئەرەیاۋنێوە کۆمکوژی سەرو عەلەوییەکاش شەرمەزار کەرڎ و واتش: "جە سووریا و ۋەرکۊتوو مېیامینینە ڕای حەقەتینەو ئاشتی، زهنیەت و سیستەمو نەتەوەی دیموکراتیکین کە جە لایەنو ڕابەر ئاپۆیۆ پەرەش پنەدریان."
ئەرەیاۋناکەو کەجەکەی پی جۊرەنە:
"ماوەو ئی حەفتەینە چا شۊنانە کە عەلەویۍ فرێش چنە مژیوا، هرووژمو سەرو عەلەوییەکا زیاڎش کەرڎەن و بە دەیان هەزار عەلەویۍ کوشیێنۍ. دیمەنە وەڵاکریاوەکۍ جە میدیاکانە دڕندەیی کۆمکوژییەکا نیشانە مڎا. بە تنی کۆمکوژی سەرو عەلەوییەکا شەرمەزار مکەرمۍ. سەرساغی جە گرڎو گەلا سووریای و بە تایبەت جە گەلوو عەلویی موازمۍ. بە مەڵامەتوو ئا ئاژەیۆ فرە ناڕەحەتێنمۍ. واوەی ئەرەیاۋنمێش گەلوو کوردی ئینا چنی گرڎو گەلا سووریای و پەشتیوانیشا مکەرۆ.
جە مانگەو ڕەمەزاندینەکە پەی موسڵمانا مانگێوە پیرۆزەنە، ۋنمتەی بە دڵنیاییوە قەڎەغەن و ئەنجامدای کۆمکوژیی پی جۆرە جە لایەنو مرۆڤایەتی و موسڵمانایچۆ یاگۍ نیگەرانین. چڼە تاوانێوە گۊرێنە جە دژو مرۆڤایەتی ئاڼنەیچ گونا‌حێوە گۊرەن. ئەنجامدای کۆمکوژی پی جۊرە جە لایەنو کەسانێوە کە ماچا ئیسلامی بە بنەما هۆر گێرا، بە حیچ جۊرۍ یاگۍ قبوڵ کەردەی نییا. ئەنجامدای ئی ڕەفتا حیچ پەیوەندیێوەش بە ئیسلامەتیۆ نییا. کەسانێ کە ئیسلامی بە بنەما هۊرگێرا، پېسە ئانەی کە کۆمکوژی نمەکەرا، هامکات جە مانگۊو ڕەمەزانینە ۋنی نمەمجا و ۋنمتەی بە حەرام مزانا. کەسانێ کە چی مانگە مبارەکێنە کە سەرەکیتەرین شەرتەو ئیسلامی جابەجێ نمەکەرا و ۋێشا پېسە موسڵمانی نیشانە مڎا، کەسانێوە دووە ڕوو و درۆزنێنۍ. ۋەرو ئی مەڵامەتیە وەڵۍ گرڎ کەسێنە مشۊم خودو موسڵمانا جە دژو ئی کۆمکوژییە دڕندانەیە دەنگشا هۊربڕا.
سازکەردەو ئی کۆمکوژییە جە لایەنو حکومەتو شامیوە مەترسیێوە گۊرەن سەرو ئایندەو سووریای. ئینە بەشێوێوە ڕۊشن نیشانەش مڎۆ کە سووریا و گەلوو سووریای ڕووبەڕوو چ جۆرە مەترسیێوە بیێنێوە. مشۆم گرڎما ئی مەترسییا بوینمۍ و گرڎ کەسێ جە دژوو ئینەی هەڵوێس هۊرگێرۆ. سەرەڕاو ئانەی کە زهنیەت و پراکتیکی خاس موینیۆ جە پاڵپەشتیکەردەی هەتەشەی، بێدەنگی جە ۋەرا ۋەرو ئی کۆمکوژییەینە ئا هێزۍ بە پاڵپەشتیشا پەی هەتەشەی بە ڕەوا موینا و دژایەتینەکەردەیشا بە شێوێوە بەهێز قبوڵ نمەکریۆ. گەلاو سووریای ۋەرو زهنیەتو مەزهەبی، تاکپەرسی و ئەوەمەڼنەیی ڕووبەروو هرووژمو کۆمکوژی بیێنێوە. مەڵامەتی سەرەکی کۆمکوژییەکا، ئی زهنیەتە ئەوەمەڼنە، تاکپەرس و مەزهەبیەنە. نمەبۆ پاڵپەشتی ئی زهنیەتەیە بکریۆ. ئا کەسۍ تا ئارۆ پەشتگیری ئی زیهنییەتەیشا کەرڎەن و بە پاڵپەشتیشا ڕەوایەتیشا پنەدان، هامکارۍ ئی تاوانانۍ. جە ئیساتێوە ۋەرپرسیاری گرڎو کۆمکوژییەکا کە ئەنجام مڎریا کەسانێوەنۍ کە پاڵپەشتی ئی زیهنیەتەیە مکەرا. پی مەڵامەتۆ داوا جە گرڎ کەسێ مکەرمۍ ڕووەدایەکا ۋەرو چەما گێرا و بە شێوێوە ئی کۆمکوژییە وەحشیانەو سەرو عەلەوییەکا بە تنی شەرمەزار بکەرا و جە دژش هەڵوێس نیشانە بڎا. ئانەی پەنەوازا جە سووریانە بکریۆ، کۊششا پەی وەڵێوستەی سیستەمێوە سیاسی دیموکراتیکی کە گرڎو گەلا سووریای، گلېرگەو سووریای و پێکئامایە چاندییەکا و باوەڕدارییە جیاوازەکا جە ۋێش گێرۊنە و گرڎی گێرۆنە ۋێش. ئا چێوەی پەشتگیریش ۋنە بکریۆ پەنەوازا ئی هەوڵ و زهنیەتە دیموکراتیکییە بۆ.
جارێوەتەر ڕۊشن بیەنۆ جە سووریا و ۋەرکۊتوو مېیامینینە ڕای حەقەتینەو ئاشتی، زیهنیەت و سیستەمو نەتەوەی دیموکراتیکیا کە جە لایەنو ڕابەر ئاپۆیۆ وەڵێوزیان و پەشت هێقما بە واڵەو-برایەتی گەلا، یەکسانی و پێوەرەژیوای. پی کۆمکوژییەو سەرو عەلەوییەکا جارێوەتەر ڕۊشن بیۆ کە حیچ جۆرە ئاوەزیەتۍ نەتەوەپەرسی، مەزهەبپەرسی و تاکپەرسی نمەبا بە چارەسەری و جگە جە پێکئاوردەی کۆمکوژی کە بۆ بە شەرم پەی مرۆڤایەتی بەدەر چانەی حیچ چێوە بە دەسنمۍ. بانگەوازو "ئاشتی و گلېرگەی دیموکراتیک"ی ٢٧و شوباتو ڕابەر ئاپۆی جە بنەمانە بە مەرامو پېسە وەرگێرتەی جە کۆمکوژی، دمایی ئاردەی بە جەنگی جە ۋەرکۊتوو مېیامینینە، دڎانیای بە مافو گرڎ کەسێرە و ژیۋایۍ ئازادیرە نریان. ئیمکانو ڕزگاربیەی ۋەرکۊتوو مېیامینی و مرۆڤایەتی بە جابەجێ کەردەی ئی مانیفێستۆیۆین. سووریایی دیموکراتیک و ۋەرکۊتوو مېیامینو دیموکراتیکی گەرەنتی ژیۋایۍ ئازادی و دیموکراتیکین، پەی گرڎو شوناسە چېردەسەکا و بەتایبەت پەی گەلی، باوەڕی و ژەنا."
