هامسەرۆکایەتی دەسەو ڕاوەبەری کەجەکەی ئەرەیاۋناش کە دەوڵەتوو تورکی جە چوارچێوەو ئامانجەکاشەنە پۍ قڕکەردەو کوردا جە شەنگال، سلێمانی و کەلارەنە هجووم کەرۆ و داواش جە گرڎ لێوە کەرد کە ۋەرا ۋەر پا هجووما مرداوە.
هامسەرۆکایەتی دەسەو ڕاوەبەری کەجەکەی ئەرەیاۋنێوەش وەڵا کەردۆ، کە پی جۆرەنە:
"جە ماوەو حەفتەی ویەردەینە دەوڵەتوو تورکی ئەرەگیروو قڕکەری جە شەنگال، سلێمانی و کەلارەنە هجومش کەرد و پا مەڵامەتۆ چن کەسێوە گەشمەرڎۍ بیۍ. ئێمە ئا کۊکوشیا دەوڵەتوو تورکی کە چنی هامکارەکاش ئەنجامش دێنۍ، بە تنی شەرمەزار کەرمۍ، گەشمەرڎا بە رێز و پنەزانایۆ ویرمارمێوە. هجوومەکۍ شەنگال، سلێمانی و کەلاری پێسە هجوومەکا وەڵتەری جە چوارچێوەو قرکەردەی کوردانە ئەنجامدریێنۍ. دەوڵەتوو تورکی کۆلۆنیالیستی قڕکەری بە هجومەکاش پۍ سەروو سەرمەشقا کۊشیای ئازاڎیی گەرەکشا گەلی تەرسنۆ، چۊکشا پنە بڎۊرە و سەروو ئا بنەمایۍ پلانەکاو ۋێش پۍ جینۆسایدی و قڕکەردەی جابەجێ کەرۆ. داوا جە گرڎ کەسۍ کەرمۍ کە جە دژوو دوژمنکارییەکاو دەوڵەتوو تورکی شان بە شانوو گەلوو کوردی ۋەران ۋەر بە هجوومەکا قڕکەردەی کوردا هەڵوێس نیشانە بڎا و ۋەرا ۋەرشا مرداوە.
دەوڵەتوو تورکی حۊڵ مڎۆ پلانێوە تازۍ جە پانیشتوو کوردسانینە جابەجێ کەرۆ
دەوڵەتوو تورکی پلانێوە تازۍ سەروو پانیشتی وزۆ بواروو جابەجێ کەردەیۆ. پۍ ئانەی پلانەو ئەرەگیرکەردەی پانیشتی بە ئەنجام بیاونۆ فشاە وزۆ سەروو حکومەتوو عێراقی و یەنەکەی، پۍ ئانەی پێسە پەدەکەی هامکاری و داردەسەیی سەروو ئاڎیشارە مسەپنۆ. دەوڵەتوو تورکی جە ڕاو ئا هجووماوە حۊڵ مڎۆ دەوڵەتوو عێراقی و یەنەکەی چەمتەرس کەرۆ. دەوڵەتوو تورکی و دەسەڵاتداری ئاکەپە-مەهەپەی کە جە ۋەرا ۋەروو کۊشیای ئازاڎیی کوردسانینە شکسش ئاردەن، بە قووڵکەردەیۆ جەنگی جە هەرێمەکەنە گەرەکشا بیاوۆ بە ئەنجام. هەڕەشۍ و هجوومەکۍ پۍ سەروو هێزە وڵاتپارێزەکا جە عێراق و پانیشتوو کوردسانینە، ئا پلانە چەپەڵاو دەوڵەتوو تورکی وزاڕووە و ئاشکراش کەرا. دەسەڵاتداری ئاکەپە- مەهەپەی بە هەڵوێسوو ۋێش کۊتەن پێگێوە پا جۆرۆ کە زەرەر بە گرڎ کەسۍ میاونۆ. بە مەغزۍ قڕکەر، نەژاڎپەرس، نەتەوەپەرس و نیم-عوسمانی جمۊوە. جە ۋەرکەوتوو دلێڕاسەینە بە قووڵکەردەیۆ جەنگی گەرەکشا ئیسفاڎە چا ئاژەیە کەرۆ و سەروو دەوڵەتا هەرێمەکەیرە زاڵ بۆ.
دەوڵەتوو تورکی گەرەکشا قڕکەردەی ئێزدییەکا تەمام کەرۆ
جە هجوومەکەو سەروو شەنگالینە وڵاتپارێزی قارەمانوو ئێزدیی سەعدون میرزا عەلی گەشمەرڎة بی. هجوومەکەو شەنگالی هجوم بۍ پۍ سەروو ئیراڎەو ئازاڎیی مەردمی ئێزدیما. دەوڵەتوو تورکی گەرەکشا خەڵکوو ئێمەی ئێزدیی قڕ کەرۆ، کە داعش نەتاوابێش ئانەی بەئەنجام بیاونۆ. هجوومەکۍ سەروو شەنگالی گردشا پا ئامانجۆ ئەنجام مڎریا.
عەبدولقادر سەبری تۆپراک کە سلێمانینە گەشمەرڎە بی، بە مەڵامەتوو فاشیزموو ئاکەپە-مەهەپەیوە ناچار بیەبۍ سەرنیشتوو کوردسانی جیابازۆ و جە پانیشتوو کوردسانی جە شاروو سلێمانینە ئەرەنیشتە بیەبۍ. ئا رۆڵە بەقیمەتەو گەلوو کوردی کە دلۍ گەلینە پێسە د.سەبری ئشناسیۍ، بە رەنجوو شاناو ۋێش بژێوی ژیۋایش حاسڵ کەرۍ، جە هەمان وەختەنە ۋۍ بەخشانە خزمەتی گەورە بە گەلەکەیش کەرۍ. ئاڎ جە هەمان وەختەنە رۆڵەو گەشمەرڎێوە بۍ. هەڤاڵ سەبری هەڵای زاوڵە بۍ، تاتەش هەڤاڵ رێزان بەشداروو ریزەکاو کۊشیای ئازاڎیی کوردسانی بی و جە سەرەتاو ساڵەکا ١٩٩٠ینە گەشمەرڎەبی.
جە هجوومەکەو کەلاریچەنە کادروو جمیەرەکەیما هەڤاڵ شەڤگەر گەشمەرڎەبی. هەڤاڵ شەڤگەر جە ساڵەو ٢٠٢٢ێوە جە پانیشتوو کوردسانینە درێژە بە کۊشیای دۍ، هەرمانەی سیاسیە کەرۍ. جە کەسایەتی حەر یەرە گەشمەرڎەکەینە، ئێمە گرڎوو گەشمەرڎا ئاخێزی و دیموکراسی بە رێز و پنەزانایۆ یاڎکەرمێوە و ئەرەیاۋنمێش کە وەرم و ئاواتوو گەشمەرڎاما مارمێنە دی".
