کۆمیتەو پەیوەندییەکا کەجەکەی ئەرەیاۋناش، کە دەوڵەتوو تورکی پلانێوە تازۍ ئەرەگیریش ئینا دەسۆ و پەدەکەیچ حۊڵ مڎۆ دەوڵەتوو عێراقی پەلکێشوو هامکاری چنی دەوڵەتوو تورکی کەرۆ. کەجەکە جە دژوو ئانەی بانگەوازێوەش ئاراسەو هێزەکا پانیشتی و دەسەڵاڎدارا عێراقی کەرد.
جە ئەرەیاۋناکەنە کۆمیتەو پەیوەندییەکا کەجەکەی ئاماژەش پانەی کەردەن کە جە دمایین هجوموو ئەرەگیری دەوڵەتوو تورکینە جە دەگاو کافیای دووۍ هاموڵاتیۍ مەڎەنیۍ گەشمەرڎۍ بیۍ، سەرەڕاو شەرمەزارکەردەی ئا کۊکوشییە سەرەوەشیش جە بنەیانەو ئا دووە گەشمەرڎەیە کەردەن و جەختش کەردەنۆ " ئی هجوومە وەحشیانەو دەوڵەتوو ئەرەگیری تورکیای ئا ڕاسیە سەلەمنۆ کە تورکیا دژوو گرڎ کوردێوەن و مجیای ۋنەو کوردی و کاولکەردەی نیشتمانوو کوردا پۍ ۋێش بە هەرمانۍ رەوا مزانۆ".
کەجەکە ئانەش یاڎ ئاردۆ کە بە مەڵامەتوو هجومەکا دەوڵەتوو تورکی ئەرەگیریوە سەڎان دەگۍ چۆڵۍ کریێنۍ و ژمارێوە فرە جە هاموڵاتیا مەدەنی بە مەڵامەتوو بۆردومانەکاوە گەشمەرڎۍ و زامڎارۍ بیێنۍ و بە سەڎان گەریلێچ بە مەڵامەتوو بەکارئاردەی چەکی کیمیاۋیۆ گەشمەرڎۍ بیێنۍ ئەرەیاۋنانش: "ئینە شاڵاوێ تازەو کیمیاۋارانی و ئەنفالیا کە سەروو دەسوو دەوڵەتوو ئەرەگیری تورکیای ئەنجام مڎریۆ و دەسەڵاتوو پەدەکەیچ هامشێوەو جاش و موستەشارەکا سەردەموو بەعسی هامبەشوو ئی ئەنفالەینە، چەمساغیش پۍ کەرۆ، تاوانەکاشا پەردەپۆش کەرۊ و تەنانەڎ حەقشا پنە مڎۆ. واتە دەوڵەتوو تورکی و پەدەکەی ئەنفالێوە تازە سەروو کوردسانیرە مسەپنا" ئانەیچش وستەن ڕووە، "دەسەڵاڎداراو پەدەکەی گەرەکشانە دەوڵەتوو عێراقی پەلکێشوو هامکاریکەردەی دەوڵەتوو تورکی کەرا چی پرۊسە تازەو ئەنفالی و ئەرەگیریەینە".
جە دمادمایینە کەجەکە داواش جە گرڎوو هێزەکا پانیشتوو کوردسانی و حکومەتوو عێراقی کەردەن، جە دژوو ئی هجووم و کۊکوشیا دەوڵەتوو تورکی هەڵوێس هۊرگێرا و پی جۆرە ڕا چانەی گێرا کە دەوڵەتوو تورکی زیاتەر و زیاتەر ۋنەو هاموڵاتییا پانیشتوو کوردسانی مجۊنە.
دەقوو ئەرەیاۋناکەی:
"پۍ راو گرڎینی
جە هجووم و فڕۆکە جەنگییەکا دەوڵەتوو ئەرەگیری تورکیاینە پۍ سەروو کەش و "سیارێ' دەگاو کافیای سەربە شارەدەگاو دینارتەی جە هەرێموو بادینانی، دووۍ هاموڵاتیۍ پانیشتوو کوردسانی بە نامەکا "بەشیر عومەر عەلی" و "عارف تەها"ی گەشمەرڎۍ بیۍ. گەشمەرڎە بەشیر و گەشمەرڎە عارف جە وەختێنە بیۍ بە ئامانجوو سوپاو ئەرەگیری تورکیای کە دلۍ باخی و زەمین و دەگاو ۋێشانە خجڵۍ هەرمانۍ بێنۍ. چێگەنە سەرەڕاو شەرمەزارکەردەی ئا کۊکوشییە سەرەوەشی جە گرڎوو مەردموو پانیشتوو کورڎسانی و بەتایبەتی بنەیانەو ئا دووە گەشمەرڎەیە کەرمۍ. ئی هجوومە وەحشیانەو دەوڵەتوو ئەرەگیری تورکیای ئا ڕاسیە سەلەمنۆ کە تورکیا دژوو گرڎ کوردێوەن و مجیای ۋنەو کوردی و کاولکەردەی نیشتمانوو کوردا پۍ ۋێش بە هەرمانۍ رەوا مزانۆ".
جە ئاکاموو هجومەئەرەگیریەکا دەوڵەتوو تورکیاینە پۍ سەروو پانیشتوو کوردسانی تا ئیسە نزیکەو هەزار دەگایا چۆڵۍ و کاولۍ کریێنۍ ، سەڎان هاموڵاتیۍ گەشمەرڎۍ بیێنۍ، بە سەڎانیچ زامڎارۍ بیێنۍ و دەیان هەزارێچ سەروو ماوا و خاکوو ۋێشاوە ئاوارۍ بیێنۍ و حەرپاسە سەڎان گەریلۍ ئازاڎیی کوردسانیچ جە ئاکاموو بەکار ئاردەی چەکی کیمیاۋینە گەشمەرڎۍ بیێنۍ. ئینە شاڵاوێ تازەو کیمیاۋارانی و ئەنفالیا کە سەروو دەسوو دەوڵەتوو ئەرەگیری تورکیای ئەنجام مڎریۆ و دەسەڵاتوو پەدەکەیچ هامشێوەو جاش و موستەشارەکا سەردەموو بەعسی هامبەشوو ئی ئەنفالەینە، چەمساغیش پۍ کەرۆ، تاوانەکاشا پەردەپۆش کەرۊ و تەنانەڎ حەقشا پنە مڎۆ. حەرپاسە ڕا چانەی گێرۆ کە هەڵوێسی جەماوەری و نیشتمانپەروەری جە دژوو ئی کۊکوشیا وەڵۍ گنۆ. واتە تورکیا و پەدەکە ئەنفالێوە تازە سەروو کوردسانیرە سەپنانە. جە وەختێنە کە ۋنەو سوورەو هامنیشتمانیاو پانیشتی بە دەسوو دەوڵەتوو فاشیستی تورکیای مجیۆ و پی جۊرە گەشمەرڎۍ کریا، دەسەڵاڎدارا پەدەکەی سەروو فەرشی سووریۆ پێشوازی جە دەسەڵاڎدارا تورکیای کەرا، باوشیشا کەرا پۊرە و دەس وزا دلۍ دەسیشا و پۆز پۍ کامێراکا مڎاۋنە.
دەوڵەتوو فاشیستی تورکیای بە سەرۆکایەتی ئەردۆغانی و باخچەلی خەریکوو متەیرەو پلانێوە تازۍ و ۋەرفراوانۍ ئەرەگیرین جە دژوو پانیشتوو کوردسانی. سەردای وەزیرە تیرۆریستەکا تورکیای پۍ هەولێری و بەغڎای ئاماڎەکاریین پۍ ئی هجوومەیە. دەسەڵاڎدارا پەدەکەی گەرەکشانە دەوڵەتوو عێراقی پەلکێشوو هامکاریکەردەی دەوڵەتوو تورکیای کەرا چی ئەنفالە تازە و ئەرەگیرییەینە. حەرپۊکەی بانگەوازیما هەن پۍ گرڎوو هێز و لایەنەکا پانیشتوو کوردسانی و حەرپاسە دەسەڵاڎدارا دەوڵەتوو عێراقی کە جە دژوو ئی هجووم و کۊکوشیا دەوڵەتوو تورکیای هەڵوێس هۊرگێرا و پی جۆرە ڕا چانەی گێرا کە تورکیا زیاتەر و زیاتەر ۋنەو هاموڵاتییا پانیشتوو کوردسانی مجۆ.
چێگەنە جارێوەتەر پەرسە و سەرەوەشی ۋێما ئاراسەو گەلوو پانیشتوو کوردسانی و بەتایبەتی بنەیانەو گەشمەرڎە عارفی و گەشمەرڎە بەشیری کەرمۍ و ۋێما بە هامبەشوو ئێشی و خەم و پەژارەیتا مزانمۍ. جە خوڎای گۊرەی داواکارێنمۍ کە گیانوو هەر دووو گەشمەرڎەی بە بەهەشتی فراوانی شاڎ کەرۊ و سوکنای و دڵنەوایی بە بنەیانەی قارەمانیشا بەخشۆ و حەرپاسە وەعد و پەیمان مڎەیمۍ کە سەروو رێبازوو گەشمەرڎە هەڵمەت دێرەلووکی بە گوڕتەرکەردەی و برەودای حەرچی زیاتەر بە کۊشیای جە دژوو فاشیزمی و ئەرەگیری و بەکرێگێرتەی حەقەو ۋنەو گەشمەرڎا کەرمێوە".
